Longuka na Ndinga ya Nzambi

Keti Kivuvu Kele Sambu na Bafwa?

Disolo yai kebasisaka bangyufula yina ziku nge mekudiyulaka mpi yo kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Inki kele kivuvu sambu na bafwa?

Ntangu Yezu kukumaka na Betania penepene na Yeruzalemi, nduku na yandi Lazare kufwaka tuka bilumbu iya. Yezu kukwendaka na mazyamu ti Marta mpi Maria bampangi ya muntu yina kufwaka. Na nima ya ntangu fyoti, bantu mingi kukwisaka pana. Keti nge lenda yindula kyese yina Marta mpi Maria kuwaka, ntangu Yezu kufutumunaka Lazare?​—Tanga Yoane 11:20-24, 38-44.

Marta vandaka kukwikila nde bafwa tafutumuka. Bansadi ya kwikama ya Yehowa mezabaka tuka ntama nde, na makwisa Nzambi tafutumuna bafwa sambu bo zinga dyaka na ntoto.​—Tanga Yobi 14:14, 15.

2. Inki kele nkadilu ya bafwa?

Ata ngolo ya luzingu to “mpeve” kesalaka nde bantu mpi bambisi kulanda kuzinga, beto kevandaka ve bampeve yina kevandaka ti nitu ya kinsuni. (Longi 3:19; Kuyantika 7:21, 22) Beto kele bingangwa ya kinsuni yina kusalamaka na putulu. (Kuyantika 2:7; 3:19) Ntangu butomfu na beto kefwaka, mabanza na beto mpi kefwaka. Yo yina, na nima ya kufutumuka, Lazare kutubaka ve ata kima mosi sambu na mambu yina yandi monaka na lufwa, sambu bafwa kezabaka ve ata kima mosi.​—Tanga Nkunga 146:4; Longi 9:5, 10.

Ya kyeleka, bafwa lenda nyokwama ve. Yo yina, dilongi yina ketubaka nde Nzambi kenyokulaka bantu na nima ya lufwa kele ya luvunu. Yo kekusilaka Nzambi makambu. Dibanza ya kunyokula bantu na tiya kevwenzaka Nzambi.​—Tanga Yeremia 7:31.

3. Keti beto lenda solula ti bafwa?

Bafwa lenda tuba ve. (Nkunga 115:17) Kansi, ntangu bawanzyo ya mbi kesolulaka ti bantu, bo lenda kusa na kudimonisaka nde bo kele mpeve ya muntu yina kufwaka. (2 Piere 2:4) Yehowa kebuyisaka kusolula ti bafwa.​—Tanga Kulonga 18:10, 11.

4. Banani tafutumuka?

Na nsi-ntoto ya mpa yina kekwisa, bamilio ya bantu yina kele na mazyamu tavutuka na luzingu. Ata bantu yankaka yina kusalaka mambu ya mbi sambu bo zabaka ve Yehowa, tafutumuka.​—Tanga Luka 23:43; Bisalu 24:15.

Bantu yina tafutumuka tavanda ti makuki ya kulonguka kyeleka ya metala Nzambi mpi kumonisa lukwikilu na bo na Yezu na kulemfukilaka yandi. (Kusonga 20:11-13) Bantu yina tafutumuka mpi tasala mambu ya mbote tazinga kimakulu na ntoto. Kansi, bantu yankaka yina tafutumuka talanda kusala mambu ya mbi. Bo tafutumuka “sambu na kubaka ndola.”​—Tanga Yoane 5:28, 29.

5. Lufutumuku kelonga beto nki na yina metala Yehowa?

Lufutumuku tasalama sambu Nzambi kutindaka mwana na yandi na kupesa luzingu na yandi sambu na beto. Yo kele nzikisa ya kemonisa zola mpi mambote ya Yehowa yina beto mefwana ve na kubaka.​—Tanga Yoane 3:16; Roma 6:23.

Sambu na kuzaba mambu mingi, tala kapu 6 mpi 7 ya mukanda yai, Inki Biblia Kelongaka Mpenza?, yina Bambangi ya Yehowa mebasisaka.

[Kifwanisu ya kele na lutiti 22]

Nzambi kusalaka Adami na putulu