Kubasika ya Nzozulu ya Nkengi Yina Kele ti Kingelesi ya Pete
BETO kele na kyese ya kuzabisa beno nde yantika na nimero yai, beto tabasisaka konso ngonda Nzozulu ya Nkengi yina kele ti Kingelesi ya pete. Yo tavanda ti masolo ya kulonguka, mpi kana kisika kele, ti mwa masolo yankaka. Beto kekwikila nde, Nzozulu ya Nkengi yai talungisa mpusa ya kimpeve ya Bambangi ya Yehowa mingi. Sambu na nki?
Kingelesi kele ndinga yina ketubamaka mingi na bampangi na beto ya kezingaka na bansi yai: Fiji, Ghana, Kenya, Liberia, Nigeria, Papouasie-Nouvelle-Guinée, mpi îles Salomon. Ata bampangi na beto yina lenda tuba bandinga yankaka ya babwala na bo, mbala mingi bo kesadilaka Kingelesi na balukutakanu ya dibundu mpi na kisalu ya bilanga. Kansi, Kingelesi yina bo kesadilaka kevandaka pete kuluta yina beto kesadilaka na mikanda na beto. Dyaka, kele ti basambidi yankaka ya Yehowa yina mekwendaka kuzinga na bansi yina bo fwete sadila Kingelesi sambu na kusolula ti bantu ata bo kezabaka yo mbote-mbote ve. Mpi, kele ve ti bisika yina bo lenda kwenda na balukutakanu ya dibundu ya kesalamaka na ndinga na bo.
Masolo yina beto kelongukaka konso mposo na kulonguka ya Nzozulu ya Nkengi, kele masolo ya mfunu yina kesadisaka beto na kudya madya ya kimpeve na ntangu ya mbote. Yo yina, sambu na kusadisa bampangi yonso na kubaka mambote na malongi yai, Nzozulu ya Nkengi yina kele ti Kingelesi ya pete kesadila bangogo mpi ntubilu ya pete. Nimero yai ya mpa tavanda ti mpusu ya zulu ya kuswaswana. Bakantu-dyambu, baparagrafe, bangyufula ya mvutukilu, mpi bifwanisu yina kele na masolo ya kulonguka ya Nzozulu ya Nkengi yina kele ti Kingelesi ya pete tavanda kiteso mosi ti yina kele na Nzozulu ya Nkengi yina beto kesadilaka banda ntama. Mpidina, bampangi yonso lenda landa kulonguka na konso Nzozulu ya Nkengi mpi kupesa bamvutu. Sambu na kumona luswaswanu na kati ya bangogo ya ba Nzozulu yai zole, tala mbandu ya kele na nsi ya lutiti ya mekatuka na paragrafe ya 2 ya disolo ya kulonguka ya ntete ya Nzozulu yai.
Beto kele ti kivuvu nde ngidika yai ya mpa tapesa mvutu na bisambu ya bampangi mingi yina kusambaka Yehowa nde: “Pesa mono mayele sambu mono longuka bansiku na nge.” (Nk. 119:73) Beto ketula ntima nde, bantu yina mezaba mbote-mbote ve Kingelesi, mpi baleke yina keyantika kutuba Kingelesi, tavanda ti makuki ya kuyidika mbote-mbote Kulonguka ya Nzozulu ya Nkengi ya konso mposo. Beto kepesa matondo mingi na Yehowa, sambu na nsadisa ya ‘zola ya bampangi na beto bakristo’ yandi kesadila “mpika ya kwikama mpi ya mayele” sambu na kupesa beto madya mingi ya kimpeve.—1 Pie. 2:17; Mat. 24:45.
Nto-Kimvuka ya Bambangi ya Yehowa