Bansoba ya Kitoko Sambu na Nzozulu ya Nkengi!

¹ Na luyantiku ya mvula yai, mabundu kuzwaka luzayisu yai ya kitoko: Yantika na Yanuari 2008, Nzozulu ya Nkengi tavanda ti banimero zole ya kuswaswana. Nimero mosi tavanda sambu na bantu yonso mpi yankaka sambu na dibuta na beto ya Bukristu! Ziku nge kekudiyula nde: ‘Bazulunalu zole yai taswaswana na nki? Inki kele mambote ya kuvanda ti banimero ya kuswaswana? Keti beto takuta mambu ya mpa na banimero yina?’

² Baluswaswanu: Beto tabingaka nimero ya kele ti dati ya 1 ya konso ngonda nde Nimero ya Bantu Yonso. Masolo yonso yina tavanda na nimero yina, bo tayidika yo sambu na mambote ya bantu yonso. Beto tabingaka nimero yina tavanda ti dati ya 15 ya konso ngonda nde Nimero ya Kulonguka, mpi beto takabulaka yo ve na kisalu ya bilanga. Yo tavanda ti masolo yonso ya kulonguka sambu na ngonda ya mvimba mpi masolo yankaka yina tavanda mfunu mingimingi sambu na Bakristu yina mekudipesaka. Nimero ya Bantu Yonso ya Nzozulu ya Nkengi tabenda kaka ve dikebi ya Bambangi, kansi yo tabenda mingimingi dikebi ya bantu yina kele ve Bambangi kansi ya kendimaka Biblia. Mpi, beto talanda na kubasisa Réveillez-vous ! sambu na bantu yonso, yika mpi bantu yina kekwikilaka ve na Nzambi mpi bayina kele na mabundu yina kele ve ya Bukristu.

³ Mambote: Na Nimero ya Kulonguka, beto tavanda dyaka ve ti mfunu ya kutendula bangogo bonso “mupasudi-nzila” na mitindu yina bantu yina kele ve Bambangi lenda bakisa. Nimero yai tavanda mpi ti bansangu ya mfunu ya bo tayidika kaka sambu na Bambangi ya Yehowa mpi balongoki ya Biblia yina keyela mbote na kimpeve. Ebuna, inki beto lenda tuba sambu na Nimero ya Bantu Yonso? Sambu mambu yina nimero yai tatubila mpi mutindu beto tasonika yo tavanda sambu na bantu yonso, muntu yina kele ve Mbangi tasepela na kutanga zulunalu yango banda na luyantiku tii na nsuka. Ya kyeleka, konso Mbangi ya Yehowa tabaka mambote na kutanga konso nimero. Sambu beto takabulaka kaka Nzozulu ya Nkengi mosi ti Réveillez-vous ! mosi na kisalu ya kusamuna konso ngonda, beto tavanda ti ngonda ya mvimba sambu na kubongisa bangogo ya mbote ya kutuba na ntwala ya kupesa baperiodike.

⁴ Mambu ya Mpa: Nimero ya Bantu Yonso ya Nzozulu ya Nkengi tavanda ti mwa mambu ya mpa ya kitoko ya beto keyidika. Disolo mosi tatubilaka malongi ya luyantiku ya Biblia na mutindu mosi ya pete kibeni. Disolo yankaka tatubilaka mutindu Biblia lenda sadisa mabuta. Nimero yango tavanda mpi ti masolo ya kulonguka sambu na baleke. Konso nimero tavandaka ti disolo mosi ya ketubila baverse ya sikisiki ya Biblia yina talonga beto mambu ya metala kimuntu ya Yehowa.

⁵ Beto kesamba nde Yehowa kusakumuna ngidika yai ya mpa ya Nzozulu ya Nkengi. Bika nde zulunalu yango ti Réveillez-vous ! kusadisa bantu mingi mpenza ya kele ya kuyilama na kuwa nsangu ya mbote.​—⁠Mat. 10:⁠11.