Lukanu ya Baperiodike na Beto Kele ya Kubenda Dikebi ya Bantu ya Mutindu na Mutindu
1. Inki mutindu kimvuka ya mpika ya kwikama mpi ya mayele kelandaka mbandu ya ntumwa Polo?
1 Kaka mutindu ntumwa Polo kusobaka mutindu na yandi ya kuzabisa nsangu ya mbote sambu na kununga “bantu” ya mitindu yonso, kimvuka ya mpika ya kwikama mpi ya mayele kesadilaka bazulunalu na beto sambu na kulonga bantu ya bisika ya kuswaswana mpi ya balukwikilu ya kuswaswana. (1 Kor. 9:22, 23) Sambu na kusadila mbote Nzozulu ya Nkengi mpi Réveillez-vous ! beto fwete bakisa mpi kuyibuka bantu yina fwete tanga yo.
2. Bo kebasisaka Réveillez-vous ! sambu na kubenda dikebi ya banani?
2 Réveillez-vous !: Lukanu ya zulunalu yai kele ya kubenda dikibi ya bantu yina mefwanana ti bantu yina ntumwa Polo kubingaka nde “bantu ya Atene.” (Bis. 17:22) Bantu yina vandaka ve Bakristu, mpi bo vandaka ti nzayilu ya fyoti ya Masonuku. Mutindu mosi, bo kebasisaka Réveillez-vous ! sambu na bantu yina kele ti nzayilu ya fyoti ya Biblia to bayina kele ve ti yo. Ziku bo kezabaka ve ata kima mosi na yina metala malongi ya Bukristu, yo lenda vanda nde bo ketulaka dyaka ve ntima na mabundu, to mbala yankaka bo kebakisaka ve nde Biblia kele na mbalu mingi. Kikuma ya ntete-ntete ya Réveillez-vous ! kele ya kundimisa bantu yina ketangaka yo nde Nzambi ya kyeleka kele. Kikuma na yo yankaka kele ya kusadisa bantu yina ketangaka yo na kuvanda ti lukwikilu ya ngolo na Biblia mpi kubakisa nde Bambangi ya Yehowa kele ya kuswaswana ti bimvuka yankaka ya mabundu.
3. Bo kesonikaka konso nimero ya Nzozulu ya Nkengi sambu na banani?
3 Nzozulu ya Nkengi: Bo kebasisaka nimero ya bantu yonso ya zulunalu yai sambu na bantu yina kele ti mwa luzitu sambu na Nzambi mpi sambu na Masonuku. Bo kele ti mwa nzayilu ya Biblia kansi bo kebakisaka ve mbote-mbote malongi na yo. Bo kele kiteso mosi ti bantu yina Polo kubingaka nde bantu yina “ke sambaka Nzambi.” (Bis. 13:14-16) Bo mesonikaka ntete-ntete nimero ya kulonguka ya Nzozulu ya Nkengi sambu na Bambangi ya Yehowa. Polo kundimaka nde bantu yina vandaka kutanga mikanda na yandi kuzabaka mbote Masonuku mpi kuvandaka ti nzayilu ya sikisiki ya kyeleka. (1 Kor. 1:1, 2) Mutindu mosi, bo kesonikaka masolo ya nimero ya kulonguka sambu na bantu yina kekwisaka na balukutakanu na beto mpi meyikanaka ti malongi mpi bangogo yina Bambangi kesadilaka.
4. Sambu na nki beto fwete zaba mbote mambu yina kele na konso periodike ya beto kesadila na kisalu ya bilanga?
4 Ata yo kelombaka nde beto pesa bantu baperiodike yonso zole, mbala mingi beto ketubilaka kaka periodike mosi na bangogo na beto ya kukotila na masolo. Yo yina, baka lukanu ya kuzaba mbote mambu yina kele na konso periodike. Mpidina nge tavanda ya kuyilama mbote sambu na kubakisa nimero yina mefwana sambu na konso muntu yina nge takutana ti yandi.