Keti Bana Fwete Longuka Mambu ya Nzambi?

“Beto kele ti mabundu mingi ya kepusaka beto na kumenga bantu yankaka, kansi yina kepusaka beto na kuzola bankaka kele fyoti.”​—JONATHAN SWIFT, ENGLISH AUTHOR.

SWIFT kutubaka dyambu yai na mvu-nkama ya 18, kansi bubu yai bantu mingi tandima dyambu yina. Nkutu, bantu yankaka kendimaka nde bibuti fwete longa ve bana na bo mambu ya Nzambi. Bo keyindulaka nde bana yina keyelaka na mabuta yina bantu kesambilaka, kelongamaka ve mbote.

Inki nge keyindula? Inki kele nsa ya kuluta mbote na ndonga ya bansa yai melanda?

● Bibuti fwete longa ve bana na bo mambu ya Nzambi.

● Bibuti fwete vingila tii ntangu bana na bo tayela na ntwala ya kulonga bo mambu ya dibundu.

● Ntangu bana kele ya fyoti, bibuti fwete longa bana na bo mambu yina bo kekwikilaka na yina metala Nzambi. Kansi, ntangu bana tayela bibuti fwete syamisa bo na kuyindula bo mosi na mambu yango.

● Bana fwete landa balukwikilu ya bibuti na bo kukonda kudiyula kana yo kele mbote to mbi.

Keti Dibundu Kebebisaka Bana?

Kibuti yonso yina kezolaka mwana na yandi tazola ve nde yandi kubeba. Kansi, keti mambu yina kesalama kendimisa mabanza ya bantu yina kebuyisaka bana na kulonguka mambu ya Nzambi? Bubu yai na nsungi ya bamvula, bantu yina kesalaka bansosa melongukaka bupusi yina balukwikilu ya bibuti kevandaka ti yo na luzingu ya bana na bo. Inki bo melongukaka na bansosa na bo?

Bantu yango memonaka nde na kisika nde dibundu kubebisa bana, yo kesadisaka bo na kuyela mbote. Rapore mosi yina kubasikaka na mvu 2008 na zulunalu mosi (Social Science Research)a kutubaka nde: “Dibundu mesadisaka bibuti na kuvanda ti bangwisana ya mbote na kati na bo mpi bana na bo.” Rapore yango kutubaka dyaka nde: “Yo kemonana nde dibundu mpi mambu ya Nzambi kele mfunu na luzingu ya bantu mpi sambu dibuta kuvanda na bangwisana ya mbote.” Tala mutindu dyambu yina kewakana ti mambu yai ya Yezu Kristu kutubaka: “Kiese na bantu yina kele na nzala ya mambu ya kimpeve, sambu Kimfumu ya zulu kele ya bo.”​—Matayo 5:3, NW.

Inki beto lenda tuba sambu na bantu yina ketubaka nde bana fwete yela ntete na ntwala ya kulonguka mambu ya Nzambi mpi ya dibundu? Bantu yango kevilaka dyambu yai: Butomfu ya mwana kele bonso kantini ya mpamba yina yo kelomba kufulusa. Bibuti fwete sala nsola; ya kufulusa “kantini” yango na nzo ti minsiku ya bikalulu ya mbote mpi malongi ya mbote to kubika nde malongi ya mingi yina kekatukaka na nganda kufulusa mabanza mpi ntima ya mwana.

Inki Kele Kinsweki?

Mambu yina melutaka kemonisa nde, bantu lenda sadila bangindu ya dibundu bonso bikuma ya kubakila bankaka bangindu ya mbi mpi kumenga bo. Yo yina, nki mutindu bibuti lenda buya nde dyambu yina Jonathan Swift kutubaka kusalama ve? Inki mutindu bo lenda longa bana na bo malongi yina tasadisa bo na kuzola bankaka?

Kinsweki kele na bamvutu ya bangyufula yai tatu: (1) Inki mambu bana fwete longuka? (2) Nani fwete longa bo? (3) Inki kele mutindu ya mbote ya kulonga bo?

[Noti na nsi ya lutiti]