Abrahami Muntu ya Kikesa

Abrahami ketala mutindu dibuta na yandi mpi bansadi na yandi keyilama sambu na kukwenda na Kanana. (Kuyantika 12:1-5) Na kutalaka kibuka ya bantu yina ketula ntima na yandi sambu na kuzinga, Abrahami bakisaka na mayele yonso mukumba yina yandi kele na yo sambu na bantu yina. Inki mutindu yandi talungisa bampusa na bo ya kinsuni na insi ya nzenza? Keti mukumba yai zolaka kuvanda ve mpasi na mbanza Ure yina vandaka kisika mosi ya mbote ti nseke ya nene, ntoto mpi masa ya mbote? Inki tasalama kana yandi bela to kufwa na ntoto ya mpa? Nani talungisa bampusa ya dibuta na yandi? Kana Abrahami waka boma ya mambu yai, yandi bikaka ve nde boma yina kulembisa yandi. Yandi bakaka lukanu ya kusala mambu yina, ya kulemfuka na bansiku ya Nzambi yo vanda na konso dyambu yina zolaka kusalama​—dyambu yai kemonisa kikesa ya kyeleka.

KIKESA KELE INKI? Kikesa ketendula kuvanda ngolo disongidila, kuvanda ve madidi-madidi. Kuvanda kikesa ketendula ve nde muntu lenda wa ve boma. Kansi, muntu yina Nzambi mepesa kikesa kesalaka mambu kukonda boma.

INKI MUTINDU ABRAHAMI MONISAKA KIKESA? Abrahami vandaka ti luzolo ya kusala mambu yina Nzambi vandaka kuzola ata bantu yankaka vandaka kusala yo ve. Yandi yelaka na kisika yina bantu vandaka kusambila banzambi mingi mpi biteki. Kansi, yandi yambulaka ve nde boma ya mambu yina bantu yankaka tayindula kukanga yandi nzila ya kusala mambu yina yandi zabaka nde yo kele mbote. Kansi, Abrahami zingaka na mutindu ya kuswaswana mpi solaka na kusambila kaka Nzambi mosi disongidila Yehowa, Nzambi ya Kuluta Kuzanguka.​—Kuyantika 14:21, 22.

Abrahami tulaka lusambu ya Nzambi ya kyeleka na ntwala ya bampusa na yandi ya kinsuni. Yandi vandaka ti luzolo ya mbote ya kuyambula luzingu ya mbote na mbanza Ure mpi ya kukwenda na ntoto ya zelo na zelo, ti kivuvu nde Yehowa talungisa bampusa na yandi ya kinsuni. Ya kyeleka, mutindu bamvula vandaka kuluta ziku Abrahami yindulaka bimvwama yankaka yina yandi vandaka ti yo na mbanza Ure. Kansi Abrahami vandaka kundima nde Yehowa talungisa ntangu yonso bampusa na yandi mpi ya dibuta na yandi. Sambu yandi bakisaka nde Yehowa kele Muntu ya kuluta mfunu na luzingu na yandi, Abrahami bakaka kikesa ya kulemfukila bansiku ya Nzambi.

INKI MALONGI BETO KEBAKA? Beto lenda landa mbandu ya Abrahami na kuyedisaka kikesa ya kulemfukila Yehowa, ata bantu yankaka na lweka na beto kelemfukila yandi ve. Mumbandu, Biblia kelongaka nde banduku mpi bampangi yina kele ti mabanza ya mbote lenda telamina bantu yina kenwanina lukwikilu yina bo kele na yo na Yehowa Nzambi. (Yoane 15:20) Kansi, ntangu beto kendima nde mambu yina beto melongukaka na yina metala Yehowa kele kyeleka, beto kenwanina balukwikilu na beto ti luzitu yonso.​—1 Piere 3:15.

Beto lenda kwikila mpi na lusilu ya Nzambi yina kemonisa nde yandi talungisa bampusa ya bantu yina kekwikilaka na yandi. Lukwikilu ya mutindu yai kepesaka beto kikesa ya kutula dikebi na mambu ya kimpeve na kisika ya kutula dikebi na mambu ya kinsuni na luzingu na beto. (Matayo 6:33) Tala mutindu dibuta mosi kusalaka yo.

Ata bo vandaka ti bana ya babakala zole ya fyoti, Doug ti Becky vandaka ti mpusa ya kukwenda na insi yina mfunu ya bansamuni ya nsangu ya mbote ya Biblia vandaka mingi. Na nima ya kusala bansosa na dikebi yonso mpi ya kusala bisambu ya ngolo, bo bakaka lukanu ya kulungisa lukanu na bo. Doug ketuba nde: “Yo lombaka kuvanda kikesa sambu na kubaka bana mpi kukwenda kukonda kuzaba mpenza mutindu mambu tasalama kuna. Kansi, ntangu beto yantikaka kuyindula dyambu yina, beto tubilaka mbandu ya Abrahami ti Sara. Kuyindula mutindu bo tulaka ntima na Yehowa​—mpi mutindu yandi vandaka kusadisa bo ntangu yonso—​kusadisaka beto mpenza.”

Na kutadilaka luzingu na bo na nsi ya nzenza, Doug ketuba nde: “Beto bakaka mambote na mutindu ya kuyituka.” Yandi ketendula nde: “Sambu luzingu na beto kevandaka ya kukonda mindondo na mbanza yai, beto kelutisaka kilumbu kumosi na dibuta​—kesamunaka, kesolulaka ti bantu ya dibuta mpi kesakanaka ti bana. Yo kele mawi yina kemonisa kimpwanza yina kele mpasi na kutubila.”

Ya kyeleka, bantu yonso ve lenda sala nsoba ya nene ya mutindu yai. Kansi, beto yonso lenda landa mbandu ya Abrahami ntangu beto ketula lusambu ya Nzambi na beto na kisika ya ntete, ti kivuvu nde yandi tasadisa beto. Ntangu beto kesala buna, beto kemonisa nde beto kelanda ndongisila yai ya Biblia ya ketuba nde: “Beto ke na kikesa ntangu beto ke tuba mambu yai, nde: ‘Mfumu Nzambi muntu ke sadisaka mono, yo yina mono ta wa boma ve.’”​—Baebreo 13:5, 6.

[Lupangu/​Kifwanisu ya kele na lutiti 7]

Nkento Yina Vandaka Kutina Nzambi Boma mpi Nkwelani Mosi ya Mbote

Sara kwelaka muntu ya vandaka ti lukwikilu ya ngolo. Kansi, nkento yai ya vandaka kutina Nzambi boma pesaka mbandu mosi ya mbote mpenza. Ya kyeleka, mbala tatu ya mvimba Biblia ketubila zina na yandi bonso mbandu ya mbote ya kulanda ya nkento yina tinaka Nzambi boma. (Yezaya 51:1, 2; Baebreo 11:11; 1 Piere 3:3-6) Ata Masonuku ketubilaka ve mambu mingi na yina metala nkento yai ya mbote, beto lenda bakisa nde yandi vandaka ti bikalulu ya mbote.

Mumbandu, yindula mutindu Sara salaka mambu ntangu Abrahami zabisaka yandi ntuma yina Nzambi pesaka sambu na kukatuka na mbanza Ure. Keti yandi kudiyulaka na wapi bo zolaka kukwenda mpi sambu na inki? Keti yandi kudiyangisaka sambu na bampusa na bo ya kinsuni? Keti yandi waka mawa sambu yo lombaka nde yandi yambula banduku na yandi mpi dibuta na yandi kukonda kuzaba kana bo tamonana dyaka to ve? Ntembe kele ve nde yandi yindulaka mambu ya mutindu yai. Ata mpidina, na luzolo yonso yandi yambulaka bo mpi tulaka ntima nde Yehowa tasakumuna yandi sambu na bulemfu na yandi.​—Bisalu 7:2, 3.

Sara vandaka kaka ve nsadi yina lemfukilaka Nzambi kansi mpi nkwelani mosi mbote. Na kisika ya kutelamina bakala na yandi sambu na kutwadisa mambu ya dibuta, Sara yedisaka zola ya kyeleka sambu na bakala na yandi mpi vandaka kusadisa yandi sambu na kutwadisa dibuta na bo. Na kusalaka buna, Sara kudiyidikaka disongidila nde yandi kudikumisaka kitoko na bikalulu na yandi ya mbote.​—1 Piere 3:1-6.

Keti bikalulu yai lenda natila bankento ya bubu yai mambote? Nkento mosi na zina ya Jill, yina kele na makwela ya kyese tuka bamvula kuluta 30 ketuba nde: “Mbandu ya Sara melonga mono nde mono fwete tuba na pwelele yonso mpi mono fwete monisa dibanza na mono na bakala na mono.” Yandi keyika nde: “Kaka na ntangu yina, bakala na mono vandaka ti mukumba ya kubaka lukanu ya nsuka, sambu yandi kele mfumu ya dibuta. Kana yandi baka lukanu, mono kele ti mukumba ya kusala yonso yina mono lenda sala sambu lukanu yina kulungana.”

Ziku, dilongi ya nene yina beto lenda baka na mbandu ya Sara kele yai: Ata yandi vandaka kitoko mingi, Sara yambulaka ve nde kitoko na yandi kukumisa yandi lulendo. (Kuyantika 12:10-13) Kansi, na kudikulumusa yonso Sara sadisaka Abrahami na bantangu ya mpasi mpi ya kyese ya luzingu na bo. Ntembe kele ve nde Abrahami ti Sara vandaka bankwelani ya kwikama, ya kudikulumusa mpi ya zola disongidila bankwelani yina vandaka kudinatila mpenza balusakumunu.