Moize—Muntu ya Lukwikilu
LUKWIKILU KELE INKI?
Mutindu Biblia ke monisaka yo, “lukwikilu” kele kuvanda ti bivuvu yina me simbama na banzikisa ya ngolo. Muntu yina kele ti lukwikilu ke vandaka ti kivuvu nde Nzambi ta lungisa balusilu na yandi yonso.
INKI MUTINDU MOIZE MONISAKA LUKWIKILU?
Moize vandaka kubaka balukanu yina monisaka nde yandi vandaka kukwikila na balusilu ya Nzambi. (Kuyantika 22:15-18) Yandi zwaka dibaku ya kuvanda ti luzingu ya mbote mpi ya kimvwama na Ezipte, kansi yandi buyaka yo, mpi “yandi solaka nde bo monisa yandi mpasi ti bantu ya Nzambi na kisika ya kumona kiese ya ntangu fioti ya disumu.” (Baebreo 11:25) Keti yandi bakaka lukanu yina kukonda kuyindula mpi na nima waka mawa sambu na yo? Ve, sambu Biblia ke tuba nde Moize “bikalaka ngolo bonso nde yandi vandaka kumona Muntu yina ke monanaka ve.” (Baebreo 11:27) Moize waka ve mawa na nima sambu na balukanu yina yandi bakaka ti lukwikilu.
Moize sadisaka bantu ya nkaka na kuvanda ti lukwikilu ya ngolo. Mu mbandu, tala mambu yina salamaka ntangu bantu ya Izraele monaka bonso nde bo kangamaka na mutambu sambu basoda ya Farao vandaka kulanda bo na nima mpi Nzadi-Mungwa ya Mbwaki vandaka na ntwala na bo. Sambu bo waka boma na diambu yina vandaka kumonana bonso kigonsa ya nene, bantu ya Izraele didilaka Yehowa mpi Moize. Inki Moize salaka?
Ziku, Moize zabaka ve nde Nzambi zolaka kukabula Nzadi-Mungwa ya Mbwaki sambu na kukangudila bantu ya Izraele nzila ya kutina. Ata mpidina, Moize vandaka ti kivuvu nde Nzambi ta sala kima mosi sambu na kutanina bantu na yandi. Mpi mpusa ya Moize vandaka nde bampangi na yandi, disongidila bantu ya Izraele kuvanda mpi ti kivuvu yina. Biblia ke tuba nde: “Moize tubaka nde: ‘Beno mona boma ve. Beno vanda na kikesa, ebuna beno tala nki mutindu Mfumu Nzambi ke gulusa beno bubu yai.’” (Kubasika 14:13) Keti Moize nungaka na kusadisa bantu ya Izraele na kukuma ti lukwikilu ya ngolo? Ee, Biblia ke tuba sambu na Moize kaka ve kansi mpi bantu yonso ya Izraele nde: “Sambu na lukwikilu, bo zengaka Nzadi-Mungwa ya Mbwaki bonso nde yo vandaka ntoto ya kuyuma.” (Baebreo 11:29) Lukwikilu ya Moize natilaka yandi mpi bantu ya nkaka yina landaka mbandu na yandi balusakumunu mingi.
INKI MALONGI BETO KE BAKA?
Beto lenda landa mbandu ya Moize kana beto ke baka balukanu yina ke monisa nde beto ke kwikilaka na balusilu ya Nzambi. Mu mbandu Nzambi me silaka na kulungisa bampusa na beto ya kinsuni kana beto ke tula lusambu na yandi na kisika ya ntete na luzingu na beto. (Matayo 6:33) Ya kieleka, sambu bantu mingi ke tulaka bima ya kinsuni na kisika ya ntete, yo lenda vanda mpasi na kutelamina mpusa yina ke monana mingi bubu yai. Kansi beto lenda tula ntima nde, kana beto ke sala yonso yina beto lenda sala sambu na kukumisa luzingu na beto pete mpi ke tula dikebi ya mingi na lusambu ya Yehowa, yandi ta lungisa bampusa na beto yonso. Yandi ke sila beto nde: “Mono ta bikisa nge ve ata fioti mpi mono ta yambula nge ve ata fioti.”—Baebreo 13:5.
Beto ke salaka mpi bikesa sambu na kusadisa ba nkaka na kukumisa lukwikilu na bo ngolo. Mu mbandu, bibuti ya mayele ke zabaka nde bo kele ti dibaku ya kusadisa bana na bo na kuvanda ti lukwikilu na Nzambi. Ntangu bana ke yela, bo fwete zaba mpenza nde Nzambi kele mpi yandi ke pesaka beto bansiku ya kuzaba mambu ya mbote mpi ya mbi. Diaka, bibuti fwete zikisa nde bana na bo ke bakisa mpi ke kwikila nde kulanda minsiku ya Nzambi kele nzila ya kuluta mfunu na luzingu. (Yezaya 48:17, 18) Bibuti ke pesaka bana na bo dikabu ya kuluta mfunu ntangu bo ke sadisaka bana na bo na kukwikila nde Nzambi “kele mpi nde yandi ke pesaka matabisi na bayina ke salaka bikesa ya masonga sambu na kumona yandi.”—Baebreo 11:6, Holy Bible—Easy-to-Read Version.