‘Kulemba Ve’

1, 2. Na nki mutindu kuzaba nde beto kele na kati ya organizasio ya Yehowa ya luyalanganu ya mvimba ke pusa beto na kutudila yandi ntima mingi?

KUZABA nde beto kele na kati ya organizasio mosi ya luyalanganu ya mvimba ke pesa beto kiese mingi. Bambona-meso yina kele na Ezekiele kapu 1 mpi Daniele kapu 7 ke monisa pwelele, mutindu Yehowa ke twadisa mambu mpi ke nata yo tii na nsuka. Yezu ke twadisa kitini ya organizasio ya Yehowa yina kele awa na ntoto na mutindu yandi ke tula dikebi na kisalu ya kusamuna nsangu ya mbote, ke lungisa bampusa ya kimpeve ya bantu yina ke sala kisalu yango, mpi ke pesa maboko sambu nde bantu ya nkaka mingi kukwisa na lusambu ya kieleka ya Yehowa. Mambu yina yonso fwete pusa beto na kutudila organizasio ya Yehowa ntima ya mvimba!​—Mat. 24:45.

² Kudiyula bangiufula yai: Keti mono ke tambula kumosi ti organizasio yai ya kuluta mbote? Keti kikesa na mono sambu na kisalu ya kusamuna ke landa kukuma mingi to ke kulumuka? Kana beto ke kudiyula bangiufula yai, beto lenda bakisa nde beto me yantika kulemba to kikesa na beto me yantika kukulumuka. Yo lenda kumina beto. Na mvu-nkama ya ntete, yo lombaka nde ntumwa Polo kusiamisa bampangi na yandi Bakristu na kufulula mbandu ya kikesa ya Yezu. Polo tubaka nde, yo zolaka kusadisa bo na ‘kukonda ve kikesa mpi na kulemba nitu ve.’ (Baeb. 12:3) Mutindu mosi mpi, kutadila mbote-mbote disolo yina me luta, yina monisaka mambu yina organizasio ya Yehowa ke sala, ta sadisa beto mingi na kutanina kikesa na beto mpi kulanda kukanga-ntima.

3. Inki beto fwete sala sambu na kulemba ve, mpi inki beto ta tubila na disolo yai?

³ Kansi, Polo monisaka nde kele ti mambu ya nkaka yina beto fwete sala kana beto ke zola kulemba ve. Yandi tubaka nde beto fwete landa “kusala mambu ya mbote.” (Bag. 6:9) Yo yina, kele ti mambu yina beto fwete sala. Bika beto tadila mambu tanu yina lenda sadisa beto na kuvanda kaka kikesa mpi kulanda kutambula na vitesi mosi ti organizasio ya Yehowa. Na nima beto mosi ta baka lukanu kana kele ti mambu yina beto to dibuta na beto fwete tudila dikebi ya mingi.

KUVUKANA SAMBU NA KUPESANA KIKESA MPI KUSAMBILA NZAMBI

4. Sambu na nki beto lenda tuba nde, kuvukana na balukutakanu kele kitini ya mfunu ya lusambu ya kieleka?

⁴ Banda ntama, balukutakanu ke vandaka ntangu yonso diambu ya mfunu mingi sambu na bansadi ya Yehowa. Na zulu, Yehowa ke salaka balukutakanu ti bingangwa ya mpeve na bantangu yina me fwana. (1 Bant. 22:19; Yobi 1:6; 2:1; Dan. 7:10) Na Izraele ya ntama, yo lombaka nde dikanda ya Izraele kuvukana ‘sambu nde konso muntu kuwa mpi kulonguka.’ (Kul. 31:10-12) Na mvu-nkama ya ntete, Bayuda vandaka ti kikalulu ya kukwenda na basinagoga sambu na kutanga Masonuku. (Luka 4:16; Bis. 15:21) Ntangu dibundu ya Bukristu salamaka, kuvukana na balukutakanu vandaka kaka diambu ya mfunu mpi tii bubu yai yo ke vandaka kaka kitini ya mfunu ya lusambu na beto. Bakristu ya kieleka, ‘ke tulanaka dikebi sambu na kupesana kikesa ya kumonisa zola mpi ya kusala bisalu ya mbote.’ Beto fwete landa ‘kupesana kikesa, mpi kusala yo mingi kuluta sambu beto ke mona kilumbu ya Yehowa ke finama.’​—Baeb. 10:24, 25.

5. Inki mutindu beto lenda pesana kikesa na balukutakanu na beto?

⁵ Mutindu mosi yina beto ke pesanaka kikesa kele ntangu beto ke pesaka bamvutu na balukutakanu na beto. Beto lenda monisa lukwikilu na beto na meso ya bantu yonso ntangu beto ke pesa bamvutu na ngiufula ya paragrafe mosi, ke tendula mutindu ya kusadila verse mosi, ke ta eksperiansi mosi ya nkufi ya ke monisa mfunu ya kuzitisa minsiku ya Biblia, to ke sala yo na mitindu ya nkaka. (Nk. 22:22; 40:9) Ya kieleka, nge mpi ke monaka nde ata beto ke kwisaka na balukutakanu tuka bamvula mingi, kuwa bakomantere yina bampangi na beto ya babakala to ya bankento ke pesaka yo vanda bambuta to baleke, ke pesaka beto kikesa mingi.

6. Inki mutindu balukutakanu ke sadisaka beto na kubikala ngolo na kimpeve?

⁶ Inki kele bikuma ya nkaka yina ke salaka nde, bisika ya beto ke sambilaka Nzambi kuvanda mfunu mingi sambu na kuvukana mbala na mbala? Balukutakanu ya dibundu, mpi balukutakanu ya distrike to ya nene,ke sadisaka beto na kutuba ti kikesa, kununga kimbeni to kusamuna na bantu ya teritware na beto yina ke monisaka ve dikebi. (Bis. 4:23, 31) Masolo ya Biblia ke pesaka beto kikesa mpi ke kumisaka lukwikilu na beto ngolo. (Bis. 15:32; Bar. 1:11, 12) Malongi mpi kikesa yina beto ke bakaka na balukutakanu na beto ke sadisaka beto na kuvanda ti kiese ya kieleka mpi ‘kubaka kupema na bantangu ya mpasi.’ (Nk. 94:12, 13) Komite Sambu na Kulonga ya Nto-Kimvuka ke twadisaka kisalu ya kuyidika madia yonso ya kimpeve sambu na kulonga bansadi ya Yehowa na nsi-ntoto ya mvimba. Beto kele mpenza na ntonda ya mingi na bangidika yonso yina ke bakamaka sambu nde, beto baka malongi ya mbote na balukutakanu na beto ya konso mposo mpi ya konso mvula!

7, 8. (a) Inki kele lukanu ya ntete-ntete ya balukutakanu na beto ya dibundu? (b) Inki mutindu balukutakanu ke sadisaka nge na kimpeve?

⁷ Kansi, kele ti diambu ya nkaka ya mfunu mingi kuluta mambote yina konso muntu ke bakaka na balukutakanu. Lukanu ya ntete-ntete yina beto ke vukanaka na balukutakanu kele ya kusambila Yehowa. (Tanga Nkunga 95:6.) Beto kele mpenza ti dibaku ya mbalu ya kukumisa Nzambi na beto! (Bakol. 3:16) Yehowa me fwana na kubaka lusambu yina beto ke pesaka yandi mbala na mbala ntangu beto ke vukanaka na balukutakanu mpi ke pesaka bamvutu na balukutakanu yango. (Kus. 4:11) Yo yina, beto fwete yituka ve na mutindu Biblia ke siamisa beto na kuyambula “ve kuvukana na balukutakanu na beto, mutindu bantu ya nkaka kele ti kikalulu ya kusala”!—Baeb. 10:25.

⁸ Keti beto ke monaka balukutakanu bonso ngidika yina ke sadisaka beto na kukanga-ntima tii ntangu Yehowa ta fwa ngidika yai ya mbi ya bima? Kana yo kele mpidina, balukutakanu na beto ta vanda mosi ya “mambu ya kuluta mfunu” yina beto fwete pesaka ntangu ya mingi ata beto kele ti mambu mingi ya kusala na luzingu na beto. (Bafi. 1:10) Kana yo me salama nde beto me konda kuvukana ti bampangi na beto na balukutakanu sambu na kusambila Yehowa, yo fwete vanda sambu na kikuma mosi ya kuluta mfunu mpenza.

SOSA BANTU YA NTIMA YA MASONGA

9. Inki mutindu beto me zaba nde kisalu ya kusamuna kele mfunu mingi?

⁹ Kudipesa mingi na kisalu ya kusamuna ke sadisaka beto mpi na kulanda kutambula ti organizasio ya Yehowa. Yezu yantikaka kisalu yai ntangu yandi vandaka awa na ntoto. (Mat. 28:19, 20) Yantika ntangu yina, kisalu ya kusamuna Kimfumu mpi ya kukumisa bantu balongoki kele mambu yina organizasio ya Yehowa ya mvimba ke tulaka na kisika ya ntete. Mambu yina bampangi mingi me kutanaka ti yo na bilumbu na beto ke ndimisa nde, bawanzio ke pesaka maboko na kisalu na beto mpi ke twadisaka beto na bantu yina kele ti “nkadilu ya mbote sambu na kubaka luzingu ya mvula na mvula.” (Bis. 13:48; Kus. 14:6, 7) Kitini ya organizasio ya Yehowa yina kele awa na ntoto ke bakaka bangidika sambu na kupesa maboko na kisalu yai ya kuluta mfunu. Keti nge mpi ke tulaka kisalu ya kusamuna na kisika ya ntete?

10. (a) Pesa mbandu ya ke monisa mutindu beto lenda landa kusepela na kieleka. (b) Inki mutindu kisalu ya kusamuna ke sadisaka nge na kulemba ve?

¹⁰ Kuvanda kikesa na kisalu ya kusamuna ke sadisaka beto na kulanda kusepela na kieleka. Beto tadila mambu yina Mitchel tubaka, yina kele nkuluntu mpi mupasudi-nzila ya ntangu yonso tuka bamvula mingi. Yandi ke tuba nde: “Mono ke sepelaka kuzabisa bantu kieleka. Kana mono me tanga disolo mosi na Nzozulu ya Nkengi to na Réveillez-vous ! ya mpa, mono ke yitukaka ngolo na kumona mayele, ngangu mpi kuwakana yina ke vandaka na masolo yango. Mono ke vandaka na kiese ya kubasika na kisalu ya kusamuna sambu na kumona mutindu bantu ya nkaka mpi ta sepela na masolo yango, mpi na mutindu mono lenda benda dikebi na bo. Kisalu na mono ya kusamuna ke sadisaka mono na kubikala ngolo na kimpeve. Mono ke salaka mambu yonso ya nkaka na ntwala to na nima ya ntangu yina mono me tulaka sambu na kisalu ya kusamuna.” Mutindu mosi, kana beto kele ti mambu mingi ya kusala na kisalu ya Nzambi, yo ta sadisa beto na kuvanda ngolo na kimpeve na bilumbu yai ya nsuka.​—Tanga 1 Bakorinto 15:58.

BAKA MAMBOTE NA MIKANDA NA BETO

11. Sambu na nki beto fwete dia madia yonso ya kimpeve yina Yehowa ke pesaka beto?

¹¹ Sambu na kupesa beto ngolo, Yehowa ke pesaka beto madia mingi ya kimpeve na nzila ya mikanda. Ntembe kele ve nde, nge lenda yindula kilumbu mosi yina nge tangaka disolo mosi na mukanda na beto mpi nge tubaka nde: ‘Yai kele mpenza diambu yina mono vandaka na yo mfunu! Yo kele bonso nde Yehowa sonikisaka yo kaka sambu na mono!’ Yo ke salamaka ve na kintulumukina. Yehowa ke longaka beto mpi ke twadisaka beto na nsadisa ya bangidika yina. Yandi tubaka nde: “Mono ta songa nge nzila ya nge fweti landa, mono ta longa nge mambu yonso.” (Nk. 32:8) Keti beto ke salaka bikesa sambu na kudia madia yonso ya kimpeve yina beto ke bakaka mpi kuyindulula yo? Kusala mpidina ta sadisa beto na kulanda kubuta bambuma mpi kulemba ve na kimpeve na bilumbu yai ya nsuka mpi ya mpasi.​—Tanga Nkunga 1:1-3; 35:28; 119:97.

12. Inki lenda sadisa beto na kubaka madia na beto ya kimpeve na mbalu?

¹² Yo kele mbote na kutadila kisalu ya ngolo yina ke salamaka sambu nde, beto baka mbala na mbala madia yai ya kimpeve ya ke pesaka beto mavimpi ya mbote. Komite Sambu na Kusonika ya Nto-Kimvuka ke twadisaka kisalu ya kusala bansosa, kusonika, kutanga masolo yina bo me sonikaka dezia, kupona bifwanisu mpi bafoto, mpi kubalula mikanda yina ta basika tanga mpi yina bo ta tula na Internet. Na nima, bafiliale yina ke niemaka mikanda ke tindaka yo na mabundu ya pene-pene mpi ya ntama. Sambu na nki kisalu yai ke salamaka? Sambu nde bansadi ya Yehowa kudia mbote-mbote na kimpeve. (Yez. 65:13) Yo yina, bika nde beto sala bikesa sambu na kudia madia yonso ya kimpeve yina ke basikaka na mikanda na beto na nzila ya organizasio ya Yehowa.​—Nk. 119:27.

PESA MABOKO NA BANGIDIKA YA ORGANIZASIO YA YEHOWA

13, 14. Banani na zulu ke pesaka maboko na bangidika ya organizasio ya Yehowa, mpi nki mutindu beto lenda monisa nde beto ke pesaka maboko na bangidika yina ke bakama awa na ntoto?

¹³ Na mbona-meso mosi, ntumwa Yoane monaka Yezu ke twadisa mpunda ya mpembe sambu na kununga bantu yina ke telaminaka Yehowa. (Kus. 19:11-15) Kuzaba nde bawanzio ya kwikama kele na nima ya Yezu tanga mpi Bakristu yina bo me tulaka mafuta ya me katuka na nsi-ntoto sambu bo me nunga mpi me baka lufutu na bo na zulu, ta kumisa ngolo lukwikilu na beto! (Kus. 2:26, 27) Bo kele mbandu ya mbote ya ke siamisa beto na kupesa maboko na bangidika yina organizasio ya Yehowa ke baka!

¹⁴ Mutindu mosi, kibuka ya nene ya bantu ke pesa maboko na kisalu ya Bakristu yina bo me tulaka mafuta ya kele ntete na ntoto, bayina ke twadisa organizasio ya Yehowa bubu yai. (Tanga Zakaria 8:23.) Inki mutindu konso muntu na kati na beto lenda monisa nde yandi ke pesaka maboko na bangidika yina organizasio ya Yehowa ke bakaka? Mutindu mosi kele, na kulemfukaka na bantu yina ke twadisa beto. (Baeb. 13:7, 17) Bulemfu yango fwete yantika na bantu yina ke twadisa dibundu na beto. Keti mambu yina beto ke tubaka sambu na bankuluntu ke monisaka nde beto ke zitisaka bo mpi kisalu na bo ya kinkengi? Keti beto ke siamisaka bana na beto na kuzitisa babakala yai ya kwikama mpi kusolula ti bo sambu na kulomba bandongisila ya Masonuku? Kele mpi ti mitindu ya nkaka yina beto lenda pesa maboko na organizasio ya Yehowa. Mu mbandu, keti dibuta na beto ke tubilaka mutindu beto lenda sadila mbongo na beto sambu na kupesa maboko na kisalu yina ke salama na nsi-ntoto ya mvimba na nzila ya makabu na beto? (Bing. 3:9; 1 Bak. 16:2; 2 Bak. 8:12) Keti beto ke bakaka na mbalu dibaku ya kutula bunkete na Nzo ya Kimfumu? Mpeve ya Yehowa ke salaka mbote-mbote kisalu na yo kisika yina luzitu mpi bumosi kele. Mpeve yango ta landa kusadisa beto na kulemba ve na bilumbu yai ya nsuka.​—Yez. 40:29-31.

ZINGA NA KUWAKANA TI NSANGU YINA BETO KE SAMUNAKA

15. Sambu na nki beto fwete nwanaka ntangu yonso sambu na kuzinga na kuwakana ti lukanu ya Yehowa?

¹⁵ Sambu beto kanga-ntima mpi kulanda kutambula ti organizasio ya Yehowa, beto fwete zinga na kuwakana ti nsangu yina beto ke samunaka na ‘kulandaka kuzikisa mambu yina Mfumu ke ndimaka.’ (Baef. 5:10, 11) Nitu na beto ya kukonda kukuka, Satana mpi nsi-ntoto yai ya mbi ke pusaka beto ntangu yonso na kunwana ti bupusi ya mbi. Bankaka na kati na beno bampangi ya babakala mpi ya bankento ke nwanaka mvita ya ngolo konso kilumbu sambu na kutanina bangwisana na beno ya mbote ti Yehowa. Yo ke sala nde Yehowa kuzola beno diaka mingi. Beno lemba ve! Kuzinga na kuwakana ti lukanu ya Yehowa ta pesa beto kiese ya mingi mpi ta ndimisa beto nde lusambu na beto kele ya mpamba ve.​—1 Bak. 9:24-27.

16, 17. (a) Inki beto fwete sala kana beto me sala disumu ya nene? (b) Mbandu ya Anne lenda longa beto nki?

¹⁶ Kansi, nki beto fwete sala kana beto me sala disumu ya nene? Sosa lusadisu kukonda kusukinina. Kubumba disumu yina ta kumisa diaka mambu mbi. Kuvila ve nde, ntangu Davidi bumbaka disumu na yandi; yandi tubaka nde: ‘Nitu na mono vandaka kulemba sambu mono vandaka kudila ntangu yonso.’ (Nk. 32:3) Ya kieleka, kubumba disumu ta lembisa beto na mabanza mpi na kimpeve, kansi muntu yina ‘ke funguna disumu na yandi mpi ke balula ntima Nzambi ta wila yandi mawa.’​—Bing. 28:13.

¹⁷ Beto tadila mbandu ya Anne.a Ntangu yandi vandaka toko, yandi vandaka mupasudi-nzila ya ntangu yonso. Kansi na nima, yandi yantikaka kusala mambu ya mbi na kinsweki. Yo vandaka kuyangisa kansansa na yandi. Yandi ke tuba nde: “Mambu yina kumaka kuyangisa kansansa na mono. Mono vandaka diaka ve ti kiese mpi mono kumaka kuniokwama ntangu yonso na mabanza.” Na nima, yandi salaka nki? Yandi ke tuba nde, kilumbu mosi na lukutakanu bo tendulaka Yakobo 5:14, 15. Anne bakisaka nde yandi vandaka na mfunu ya lusadisu mpi kwendaka na bankuluntu sambu na kusadisa yandi. Ntangu yandi ke yindula mambu yina, yandi ke tuba nde: “Baverse yina vandaka bonso nkisi yina Yehowa sonikaka sambu na kubelula mono na kimpeve. Kunwa nkisi yango ke vandaka pete ve kansi yo ke belulaka. Mono sadilaka ndongisila ya Masonuku mpi yo sadisaka mono.” Na nima ya mwa bamvula, Anne kumaka diaka kikesa na kimpeve mpi ntangu yai, yandi ke sadila Yehowa ti kansansa ya mbote.

18. Inki fwete vanda lukanu na beto?

¹⁸ Yo kele dibaku mosi ya mbote mpenza na kuvanda na luzingu na bilumbu yai ya nsuka mpi kuvanda na kati ya organizasio ya Yehowa! Bika nde lukanu na beto kuvanda ya kumona ve mpamba lukumu yina. Kansi, beto sala bikesa sambu nde beto yonso na kati ya dibuta kukwenda mbala na mbala na balukutakanu ya dibundu na beto, kusamuna na kikesa yonso sambu na kusosa bantu ya ntima ya masonga, mpi kubaka mambote na madia ya kimpeve yina beto ke bakaka na nzila ya mikanda. Diaka, bika nde beto pesa maboko na bantu yina ke twadisa beto mpi beto zinga na kuwakana ti nsangu yina beto ke samunaka. Kana beto ke sala mpidina, beto ta landa kutambula ti organizasio ya Yehowa mpi ta lemba ve na kusala mambu ya mbote!