“Zikisa Mambu ya Kuluta Mfunu”

1, 2. Inki mbikudulu ya me tala bilumbu ya nsuka bendaka mpenza dikebi ya balongoki ya Yezu, mpi sambu na nki?

PIERE, Yakobo, Yoane, mpi Andre bikalaka kaka bo mosi ti Longi na bo. Mambu yina Yezu katukaka kutuba sambu na kubeba ya tempelo vandaka kaka kuyangisa mabanza na bo. (Mar. 13:1-4) Yo yina, bo yulaka yandi nde: “Songa beto, Inki ntangu mambu yai ta salama, mpi inki ta vanda kidimbu ya kukala na nge mpi ya nsukilu ya ngidika ya bima?” (Mat. 24:1-3) Yezu yantikaka na kuzabisa bo mambu yina ta nata bansoba ya ngolo na luzingu ya bantu kaka ve, kansi mpi mambu yina ta monisa nde beto me kuma na bilumbu ya nsuka ya ngidika ya bima ya mbi ya Satana. Ntembe kele ve nde, mosi ya mambu yango bendaka mpenza dikebi ya balongoki na yandi. Na nima ya kutubila mambu ya mpasi mu mbandu bamvita, nzala mpi kufwa bansiku, Yezu bikulaka nde diambu mosi ya mbote ta salama na bilumbu ya nsuka. Yandi tubaka nde: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, mpi na nima nsuka ta kwisa.”​—Mat. 24:7-14.

² Balongoki ya Yezu samunaka nsangu ya mbote ya Kimfumu kumosi ti yandi. (Luka 8:1; 9:1, 2) Mbala ya nkaka, bo yibukaka diaka mambu yai yandi tubaka: “Ya kieleka, bambuma ya kukatula kele mingi, kansi bansadi kele fioti. Yo yina, beno bondila Mfumu ya kisalu ya kukatula bambuma na kutinda bansadi na kisalu na yandi ya kukatula bambuma.” (Luka 10:2) Kansi nki mutindu bo lendaka kusamuna “na ntoto ya mvimba” mpi kuta kimbangi “na makanda yonso”? Bansadi ya kisalu zolaka kukatuka wapi? Kana ntangu yina bo vandaka ti Yezu kilumbu yina, bo vandaka ti makuki ya kumona na mabanza na bo mambu yina zolaka kusalama na makwisa, ntembe kele ve nde bo zolaka kuyituka na kumona kulungana ya bangogo ya nkufi yina beto ke tanga ntangu yai na Matayo 24:14!

3. Inki mutindu Luka 21:34 ke lungana bubu yai, mpi nki bangiufula beto fwete kudiyula?

³ Mbikudulu ya Yezu ke lungana na bilumbu na beto. Bamilio ya bantu me vukana sambu na kusamuna nsangu ya mbote ya Kimfumu na ntoto ya mvimba. (Yez. 60:22) Kansi Yezu monisaka nde na bilumbu ya nsuka, yo ta vanda mpasi sambu na bankaka na kutula kisalu ya kusamuna na kisika ya ntete. Mambu ya nkaka ta katula dikebi na bo mpi bo ‘ta kuma kizitu.’ (Tanga Luka 21:34.) Beto mpi ke mona kulungana ya bangogo yina. Bansadi ya nkaka ya Nzambi ke vila nzila. Yo ke monana na balukanu yina bo ke baka na yina me tala kisalu ya kinsuni, banzo-nkanda ya nda, kusosa bima mingi ya kinsuni, mpi na kiteso ya ntangu yina bo ke lutisa na bansaka. Bampangi ya nkaka ke lemba nitu sambu na bampasi mpi basusi ya luzingu ya konso kilumbu. Kudiyula nde: ‘Ebuna mono? Balukanu yina mono ke bakaka ke monisaka nde, mono ke tulaka nki mambu na kisika ya ntete?’

4. (a) Polo sambaka sambu na nki diambu na yina me tala Bakristu ya Filipi, mpi sambu na nki? (b) Inki beto ta tubila na disolo yai mpi yina ke landa, mpi yo ta sadisa beto na nki?

⁴ Yo lombaka nde, Bakristu ya mvu-nkama ya ntete kusala bikesa sambu na kutula mambu ya kimpeve na kisika ya ntete. Yo yina, Ntumwa Polo sambaka sambu nde bampangi ya Filipi ‘kuzikisa mambu ya kuluta mfunu.’ (Tanga Bafilipi 1:9-11.) Bonso ntumwa Polo, Bakristu mingi ya ntangu yina monisaka “kikesa mingi kibeni sambu na kuzabisa ndinga ya Nzambi kukonda boma.” (Bafi. 1:12-14) Mutindu mosi bubu yai, bampangi mingi na kati na beto ke samuna Ndinga ya Nzambi ti kikesa yonso. Ata mpidina, kutadila mambu yina ke salama bubu yai na organizasio ya Yehowa lenda sadisa beto na kudipesa mingi diaka na kisalu ya kusamuna! Na disolo yai, beto ta tadila bangidika yina Yehowa me bakaka sambu nde Matayo 24:14 kulungana. Inki kele lukanu ya ntete-ntete ya organizasio yango, mpi nki mutindu kuzaba mambu yina lenda siamisa beto mpi mabuta na beto? Na disolo yina ke landa, beto ta tadila mambu yina lenda sadisa beto na kukanga-ntima mpi kulanda kutambula ti organizasio ya Yehowa.

KITINI YA ZULU YA ORGANIZASIO YA YEHOWA KE KWENDA NA NTWALA

5, 6. (a) Sambu na nki Yehowa pesaka bambona-meso na yina me tala kitini ya organizasio na yandi ya zulu? (b) Inki mambu Ezekiele monaka na mbona-meso?

⁵ Kele ti mambu mingi yina Yehowa monaka mbote na kukotisa ve na Ndinga na yandi ya kusonika. Mu mbandu, yandi me zabisaka beto mambu mingi ve na mutindu butomfu ya muntu to luyalanganu ke salaka, ata kuzaba mambu yina zolaka kusepedisa beto ngolo kimbeni! Kansi, Yehowa me zabisaka beto mambu yina beto kele na yo mfunu sambu na kubakisa lukanu na yandi mpi kuzinga na kuwakana ti yo. (2 Tim. 3:16, 17) Yo yina, beto kele na kiese mingi na mutindu Biblia ke sadisaka beto na kuzaba mwa mambu na yina me tala kitini ya organizasio ya Yehowa yina ke monanaka ve! Beto ke vandaka na kiese ya mingi ntangu beto ke tangaka mutindu mukanda ya Yezaya, Ezekiele, Daniele, mpi mbona-meso ya Yoana yina kele na mukanda ya Kusonga ke tubilaka organizasio ya Yehowa yina kele na zulu. (Yez. 6:1-4; Ezek. 1:4-14, 22-24; Dan. 7:9-14; Kus. 4:1-11) Yo kele bonso nde Yehowa me kangula rido mpi me pesa beto nzila ya kumona mambu ya nkaka yina ke salama na zulu. Sambu na nki Yehowa me zabisaka beto mambu yina?

⁶ Yehowa ke zola nde beto zaba nde beto kele na kati ya kitini ya organizasio mosi ya luyalanganu ya mvimba. Kele ti mambu ya nkaka yina beto lenda mona ve, yina ke salama sambu nde balukanu ya Yehowa kulungana. Mu mbandu, Ezekiele monaka kitini ya organizasio ya Yehowa yina ke monanaka ve, yina monisamaka na pusu-pusu mosi ya nene kibeni na zulu. Pusu-pusu yango vandaka kutambula ntinu mingi kibeni mpi vandaka kubaluka mbala mosi na ndambu ya nkaka. (Ezek. 1:15-21) Konso ntangu yina makulu na yo vandaka kubaluka, pusu-pusu yango vandaka kusala bitamina ya nda kibeni. Diaka, na mbona-meso yango, Ezekiele monaka na kiteso ya mwa fioti Ntwadisi ya pusu-pusu yango. Yandi tubaka nde: ‘Mono monaka kima mosi vandaka kusema bonso wolo yina bo me vukisa ti arza, ke monana bonso tiya na lweka na yo. Yo vandaka bonso lukumu ya Yehowa.’ (Ezek. 1:25-28) Ntembe kele ve nde, Ezekiele yitukaka ngolo ntangu yandi monaka mbona-meso yai! Yandi monaka nde Yehowa ke zabaka mambu yonso yina ke salamaka na organizasio na yandi, mpi yandi ke twadisaka yo na nzila ya mpeve santu na yandi. Yo ke monisa mpenza na mutindu ya kuyituka nde, kitini ya zulu ya organizasio ya Yehowa ke kwenda na ntwala!

7. Inki mutindu mbona-meso ya Daniele ke pusa beto na kutudila Yehowa ntima?

⁷ Daniele mpi monaka mambu mingi yina lenda pusa beto na kutudila Yehowa ntima. Yandi monaka Yehowa, yina bo ke monisa bonso ‘mbuta-muntu ya mununu,’ me vanda na kiti ya kimfumu ya ke monika bonso nde yo ke pela tiya. Mpi kiti yango vandaka ti makulu. (Dan. 7:9) Yehowa zolaka nde, Daniele kumona nde organizasio na yandi me telama ve kisika mosi, mpi yo ke lungisa lukanu na yandi. Daniele monaka mpi ‘muntu mosi yina vandaka bonso mwana ya muntu,’ disongidila Yezu, yina bakaka kiyeka ya kutwadisa kitini ya organizasio ya Yehowa yina kele na ntoto. Luyalu ya kukuka ya Yezu ta vanda kaka ve ya bamvula fioti. Kansi, ‘kimfumu na yandi ta zinga kimakulu, mpi ata muntu mosi ve ta botula kiyeka na yandi.’ (Dan. 7:13, 14) Yo ke siamisa beto na kutula ntima na Yehowa mpi kundima mambu yina yandi ke sala. Yandi pesaka “kiyeka, lukumu ti ngolo ya kimfumu” na maboko ya Mwana na yandi, Yezu yina mekamaka mpi bikalaka ya kwikama. Yehowa ke tudilaka Mwana na yandi ntima. Yo yina, beto mpi fwete tula ntima na luyalu ya Yezu.

8. Mbona-meso yina Yehowa pesaka na Ezekiele mpi Yezaya pusaka bo na kusala nki, mpi yo fwete pusa beto na kusala nki?

⁸ Mbona-meso ya kitini ya organizasio ya Yehowa yina ke monanaka ve fwete pusa beto na kusala nki? Bonso Ezekiele, mambu yina Yehowa ke sala fwete pusa beto na kumonisa luzitu mpi kudikulumusa ya ngolo. (Ezek. 1:28) Kuyindulula organizasio ya Yehowa lenda pusa beto na kudipesa mingi na kisalu na yandi kaka mutindu Yezaya salaka yo. Ntangu yandi zwaka dibaku ya kuzabisa bankaka mambu yina Yehowa ke sala, Yezaya ndimaka dibaku yango kukonda keti-keti. (Tanga Yezaya 6:5, 8.) Yezaya vandaka ti kivuvu nde ti lusadisu ya Yehowa, yandi lendaka kununga konso mpasi yina yandi lendaka kukutana ti yo. Mutindu mosi bubu yai, mwa mambu yina beto me zaba sambu na kitini ya organizasio ya Yehowa yina ke monanaka ve fwete pusa beto na kuzitisa yandi mpi kudipesa mingi na kisalu na yandi. Kumona mutindu organizasio yango ke kwenda na ntwala mpi ke sala yonso sambu na kulungisa balukanu ya Yehowa, ke pesa beto kikesa mpenza!

KITINI YA ORGANIZASIO YA YEHOWA YINA KELE AWA NA NTOTO

9, 10. Sambu na nki Yehowa kele na mfunu nde kitini ya organizasio yina ke monana kuvanda?

⁹ Na nzila ya Mwana na yandi, Yehowa me salaka kitini ya organizasio na yandi awa na ntoto, yina ke sala na kuwakana ti kitini ya organizasio na yandi yina ke monanaka ve. Sambu na nki yo lombaka nde organizasio mosi yina ke monana kuvanda sambu na kulungisa kisalu yina bo ke tubila na Matayo 24:14? Beto tadila bikuma tatu.

¹⁰ Ya ntete, Yezu tubaka nde kisalu yina ya kusamuna ta nata balongoki na yandi “tii na kisika ya kuluta ntama ya ntoto.” (Bis. 1:8) Ya zole, yo lombaka nde bangidika kubakama sambu na kupesa madia ya kimpeve mpi kulungisa bampusa ya bantu yina ke sala kisalu yango. (Yoa. 21:15-17) Ya tatu, yo lombaka nde bangidika kubakama sambu nde bantu yina ke samuna nsangu ya mbote kuvukana kumosi sambu na kusambila Yehowa mpi kulonguka mutindu ya kusala kisalu yango. (Baeb. 10:24, 25) Yo lombaka nde, organizasio mosi kuvanda sambu na kulungisa balukanu yai yonso. Sambu nde balongoki ya Kristu kulungisa mukumba na bo, yo lombaka nde bo yidika mbote-mbote kisalu yina.

11. Inki mutindu beto ke monisaka nde, beto ke pesaka maboko na bangidika yina organizasio ya Yehowa ke bakaka?

¹¹ Inki mutindu beto ke monisaka nde beto ke pesaka maboko na bangidika yina organizasio ya Yehowa ke bakaka? Mutindu mosi kele ya kutula ntima na beto ntangu yonso na bantu yina Yehowa mpi Yezu me ponaka sambu na kutwadisa kisalu na beto ya kusamuna. Bubu yai, kele ti bisalu to mambu mingi ya nsi-ntoto yai ya lenda benda dikebi ya bampangi yina ke twadisaka beto. Ata mpidina, inki kele lukanu ya ntete-ntete ya kitini ya organizasio ya Yehowa yina ke monana?

BO TULAKA DIKEBI NA “MAMBU YA KULUTA MFUNU”

12, 13. Inki mutindu bankuluntu ke lungisaka mikumba na bo, mpi sambu na nki yo ke pesa nge kikesa?

¹² Na nsi-ntoto ya mvimba, bankuluntu ya kuyela ke ponamaka sambu na kuvanda bankengi mpi kutwadisa kisalu ya kusamuna Kimfumu na bansi yina bo ke zingaka. Ntangu bo ke bakaka balukanu, bo ke sosaka lutwadisu na Ndinga ya Nzambi na kukumisaka yo ‘mwinda ya ke pela na nzila na bo, yo ke tambusaka makulu na bo’ mpi ke sambaka na masonga yonso sambu na lutwadisu ya Yehowa.​—Nk. 119:105; Mat. 7:7, 8.

¹³ Kaka bonso bampangi yina vandaka kutwadisa dibundu na mvu-nkama ya ntete, bankuluntu yina ke twadisaka kisalu ya kusamuna bubu yai ke kudipesaka “na kisambu mpi na kisalu ya ndinga.” (Bis. 6:4) Bo ke vandaka na kiese mingi na kumona kuyela ya kisalu ya kusamuna nsangu ya mbote na bansi na bo mpi na ntoto ya mvimba. (Bis. 21:19, 20) Bo ke tudilaka ve bampangi na bo bansiku mingi. Kansi, bo ke landaka Masonuku mpi lutwadisu ya mpeve santu ya Nzambi ntangu bo ke bakaka bangidika yina kele mfunu sambu nde kisalu ya kusamuna kukwenda na ntwala. (Tanga Bisalu 15:28.) Mpidina, bampangi-babakala yina ke twadisaka beto ke pesaka mbandu ya mbote na bampangi yonso ya mabundu na bo.​—Baef. 4:11, 12.

14, 15. (a) Inki bangidika ke bakamaka na nsi-ntoto ya mvimba sambu na kusadisa beto na kusamuna mbote? (b) Inki mutindu nge ke kudiwaka sambu na lusadisu yina nge pesaka na kusamuna Kimfumu?

¹⁴ Mingi na kati na beto ke monaka ve kisalu ya ngolo yina ke salamaka sambu na kuyidika madia ya kimpeve yina beto ke bakaka na nzila ya mikanda na beto, balukutakanu ya dibundu mpi ya nene. Mu mbandu, mafunda ya bampangi ya luzolo ya mbote ke salaka kisalu ya ngolo sambu na kubalula madia ya kimpeve na bandinga kiteso ya 600 na mpila nde bantu mingi kulonguka “mambu ya nene ya Nzambi.” (Bis. 2:7-11) Batoko ya babakala mpi ya bankento ke salaka na bamasini yina ke salaka na vitesi ya ngolo sambu na kuniema mikanda mpi kukangisa yo. Na nima, bo ke kabulaka mikanda yango na mabundu ata yina kele na babwala ya ntama mpenza.

¹⁵ Bangidika mingi ke bakamaka sambu na kusadisa beto na kudipesa mingi na kisalu ya kusamuna nsangu ya mbote kumosi ti bampangi ya mabundu na beto. Mu mbandu, mafunda ya bampangi ya luzolo ya mbote ke sadisaka na kisalu ya kutunga Banzo ya Kimfumu mpi Banzo ya Balukutakanu ya Nene. Bankaka ke pesaka lusadisu ya nswalu-nswalu na bampangi yina me kutana ti bisumbula ya lugangu to bayina ke bela maladi ya ngolo. Bampangi ya nkaka ke yidikaka balukutakanu ya nene mpi ya distrike mpi bankaka ke longaka na banzo-nkanda ya Biblia. Yai kele kaka mwa bisalu fioti yina mingi na kati na beto ke monaka ve. Inki kele lukanu ya bisalu yina yonso? Kusadisa beto na kusamuna mbote-mbote nsangu ya mbote, kulungisa mambote ya kimpeve ya bampangi yina ke salaka kisalu yango, mpi kusadisa bantu ya nkaka na kukwisa na lusambu ya kieleka. Mambu yina yonso ke monisa mpenza nde, kitini ya organizasio ya Yehowa yina kele awa na ntoto ke tulaka ntangu yonso dikebi na mambu ya kuluta mfunu!

LANDA MBANDU YA ORGANIZASIO YA YEHOWA

16. Inki mambu nge lenda longuka na lusambu na beno ya dibuta to na kulonguka na nge mosi?

¹⁶ Keti mbala na mbala nge ke bakaka ntangu ya kuyindulula mambu yina organizasio ya Yehowa ke salaka? Na lusambu na bo ya dibuta to na kulonguka na bo mosi, bampangi ya nkaka ke bakaka ntangu ya kusala bansosa sambu na kuzaba mbote-mbote mambu yango mpi kuyindulula yo. Mu mbandu, beto lenda zaba mambu mingi kana beto longuka bambona-meso yina Yehowa pesaka na Ezekiele, Daniele, mpi Yoane. Mukanda Les Témoins de Jéhovah : Prédicateurs du Royaume de Dieu, mpi mikanda ya nkaka to ba video yina kele na ndinga na beno lenda sadisa nge na kuzaba mbote-mbote organizasio ya Yehowa.

17, 18. (a) Disolo yai me sadisa nge na nki mambu? (b) Inki bangiufula beto fwete kudiyula?

¹⁷ Kuyindulula mambu yina Yehowa ke sala na nzila ya organizasio na yandi kele mbote sambu na beto. Kumosi ti organizasio yai ya mbote, bika nde lukanu na beto kuvanda ya kulanda kutula dikebi na mambu ya kuluta mfunu. Kusala mpidina ta pesa beto kikesa ya kuvanda ti lukanu yina Polo vandaka ti yo; yandi sonikaka nde: “Sambu beto kele ti kisalu yai sambu na mawa yina Nzambi wilaka beto, beto ke yambula ve.” (2 Bak. 4:1) Yandi siamisaka mpi bampangi na yandi ya kisalu nde: “Bika beto yambula ve na kusala mambu ya mbote, sambu na ntangu yina me fwana, beto ta katula bambuma kana beto lemba ve.”​—Bag. 6:9.

¹⁸ Keti yo kele ti bansoba yina beto mosi to dibuta na beto fwete sala sambu na kuzaba mambu yina kele ya kuluta mfunu na luzingu na beto ya konso kilumbu? Keti beto lenda kumisa luzingu na beto pete to kulutisa ntangu mingi ve na bansaka sambu na kudipesa mingi na kisalu yai ya kuluta mfunu, disongidila kisalu ya kusamuna? Na disolo yina ke landa, beto ta tadila mambu tanu yina ta sadisa beto na kulanda kutambula ti organizasio ya Yehowa.