BAMVUTU NA BANGIUFULA YA BIBLIA

Inki mutindu makwela lenda vanda na kiese?

Bandongisila ya Biblia ya ke tadila kusala makwela ya kiese ke nungaka sambu yo me katukaka na Muyantikisi ya makwela, Yehowa Nzambi. Yo ke longaka beto na kuyedisa bikalulu yina lenda sala nde makwela kuvanda ya kiese mpi yo ke kebisaka beto na bankadilu yina lenda bebisa makwela. Yo ke longaka beto mpi mayele ya kusolula yina ke tomisaka kiese na makwela.​—Tanga Bakolosai 3:8-10, 12-14.

Babakala mpi bankento fwete pesana lukumu mpi luzitu. Ntangu bo zole ke ndima mikumba yina Nzambi me pesaka bo na makwela, bo lenda vanda na kiese.​—Tanga Bakolosai 3:18, 19.

Inki ke sadisaka makwela na kuzinga mingi?

Bankwelani lenda bikala kumosi kana bo ke zolana. Nzambi ke longa beto mutindu ya kumonisa zola. Yandi ti Mwana na yandi, Yezu, kele bambandu ya kukuka ya me tala zola ya kuditambika.​—Tanga 1 Yoane 4:7, 8, 19.

Kana babakala mpi bankento ke zitisa makwela bonso ngidika ya me katuka na Nzambi, bo ta bikala kumosi. Nzambi salaka makwela sambu yo vanda kimvuka ya kimakulu na kati ya bakala mpi nkento sambu mabuta kuvanda na lutaninu. Makwela lenda zinga mingi sambu Nzambi salaka babakala ti bankento sambu bo sadisana na kinsuni mpi na mawi. Yandi salaka bo mpi na kifwani na yandi, ti makuki ya kufulula zola na yandi.​—Tanga Kuyantika 1:27; 2:18, 24.