BAMVUTU NA BANGIUFULA YA BIBLIA
Keti kivuvu kele sambu na bafwa?
Lufwa kele bonso mpongi sambu bafwa ke zabaka ata kima ve, mpi bo lenda sala ata kima ve. Kansi, muntu yina gangaka luzingu lenda vutula bafwa na luzingu na nzila ya lufutumuku. Sambu na kumonisa nde yandi ta sala yo, Nzambi pesaka Yezu ngolo ya kuvutula bafwa mingi na luzingu.—Tanga Longi 9:5; Yoane 11:11, 43, 44.
Na nki mutindu lufwa kele bonso mpongi?
Nzambi me sila nde bafwa yina kele na mabanza na yandi ta futumuka na nsi-ntoto ya mpa ya lunungu. Bantu yina ta futumuka fwete bikala ntete na maziamu tii ntangu Nzambi ta vutula bo diaka na luzingu. Nzambi Nkwa-Ngolo Yonso kele ti mpusa ya kusadila ngolo na yandi sambu na kuvutula bafwa na luzingu.—Tanga Yobi 14:14, 15.
Lufutumuku ta vanda inki mutindu?
Ntangu Nzambi ta futumuna bantu, bo ta vanda ti makuki ya kudizaba, kuzaba banduku mpi mabuta na bo. Ata nitu ya muntu me pola, Nzambi lenda futumuna yandi ti nitu ya mpa.—Tanga 1 Bakorinto 15:35, 38.
Bantu fioti kibeni ta futumuka sambu na kuzinga na zulu. (Kusonga 20:6) Bantu mingi yina ta futumuka ta zinga na ntoto yina ta kituka paladisu. Bo ta yantika luzingu ya mpa ti kivuvu ya kuzinga mvula na mvula.—Tanga Nkunga 37:29; Bisalu 24:15.