BAMVUTU NA BANGIUFULA YA BIBLIA

Nzambi kele muntu ya nki mutindu?

Nzambi kele mpeve mpi yandi ke monanaka ve. Yandi gangaka zulu, ntoto ti bima yonso ya ke zingaka. Ata muntu mosi ve gangaka Nzambi—yandi kele ti luyantiku ve. (Nkunga 90:2) Nzambi ke zolaka nde bantu kusosa yandi mpi kuzaba kieleka ya me tala yandi.—Tanga Bisalu 17:24-27.

Beto lenda zaba zina ya Nzambi. Beto lenda bakisa bikalulu na yandi ntangu beto ke tala bima yina yandi me gangaka. (Baroma 1:20) Kansi sambu na kuzaba Nzambi mbote-mbote, beto fwete longuka Ndinga na yandi, Biblia. Yo ke sadisaka beto na kuyikana ti kimuntu ya zola ya Nzambi.—Tanga Nkunga 103:7-10.

Inki mutindu Nzambi ke tadilaka kukonda lunungu?

Yehowa, Ngangi na beto ke mengaka kukonda lunungu. Mpi yandi gangaka bantu na kifwani na yandi. (Kulonga 25:16) Yo yina, bantu mingi na kati na beto mpi ke mengaka kukonda lunungu. Nzambi ke vandaka ve na kisina ya kukonda lunungu yina kele na nziunga na beto. Nzambi pesaka muntu kimpwanza ya kupona. Diambu ya mawa kele nde bantu mingi ke sadilaka kimpwanza na bo ya kupona na mutindu ya mbi, mpi ke salaka mambu ya kukonda lunungu. Biblia ke tuba nde Yehowa ke waka mpasi na ntima.—Tanga Kuyantika 6:5, 6; Kulonga 32:4, 5.

Yehowa ke zolaka lunungu, mpi yandi ta pesa ve nzila nde kukonda lunungu kubikala kimakulu. (Nkunga 37:28, 29) Biblia ke sila nde ntama mingi ve Nzambi ta manisa mambu yonso ya kukonda lunungu.—Tanga 2 Piere 3:7-9, 13.