Watchtower MIKANDA YA KE NA INTERNET
Watchtower
MIKANDA YA KE NA INTERNET
Kikongo (Rép. dém. du congo)
  • BIBLIA
  • MIKANDA
  • BALUKUTAKANU
  • w25 septembre balut. 8-13
  • Mambu ya Kusala Ntangu Bo Me Sadila Nge Mambu ya Mbi?

Kele ve ti video sambu na mambu ya nge ke sosa.

Kifu me salama na ntangu ya kubaka video.

  • Mambu ya Kusala Ntangu Bo Me Sadila Nge Mambu ya Mbi?
  • Nzozulu ya Nkengi Ke Samunaka Kimfumu ya Yehowa (Nimero ya Kulonguka)—2025
  • Tubantu-diambu
  • Mambu ya Mutindu Mosi
  • YEHOWA MPI YEZU KE ZOLAKA VE ATA FIOTI MAMBU YA MBI
  • INKI YEZU SALAKA NTANGU BANTU VANDAKA KUSADILA BANKAKA MAMBU YA MBI?
  • LANDA MBANDU YA YEZU NTANGU NGE KE MONA MAMBU YA MBI KE SALAMA
  • MAMBU YA BETO LENDA SALA NTANGU BANTU KE SADILA BETO TO BANKAKA MAMBU YA MBI
  • Mutindu Nge Lenda Kanga Ntima Ntangu Bantu Ke Sadila Nge Mambu ya Mbi
    Nzozulu ya Nkengi Ke Samunaka Kimfumu ya Yehowa (Nimero ya Kulonguka)—2024
  • Keti Bantu Ta Monaka Lunungu Yina Bo Ke Sosaka?
    Masolo mpi Bavideo
  • Bamvutu na Bangiufula ya Biblia
    Nzozulu ya Nkengi Kesamunaka Kimfumu ya Yehowa—2014
  • “Keti Nzambi Me Konda Lunungu”
    Kwenda Pene-Pene na Yehowa
Tala Mambu Mingi
Nzozulu ya Nkengi Ke Samunaka Kimfumu ya Yehowa (Nimero ya Kulonguka)—2025
w25 septembre balut. 8-13

DISOLO YA KULONGUKA 37

NKUNGA 114 “Monisa Ntima ya Nda”

Mambu ya Kusala Ntangu Bo Me Sadila Nge Mambu ya Mbi

“Yandi landaka kutula kivuvu nde lunungu ta vanda, kansi, tala! kukonda lunungu vandaka.”​—YEZ. 5:7.

NA BUNKUFI

Mutindu mbandu ya Yezu ke sadisa beto na kuzaba mambu ya mbote ya kusala ntangu bo me sadila beto to bantu ya nkaka mambu ya mbi.

1-2. Inki bantu mingi ke salaka ntangu bo ke mona mambu ya mbi ke salama mpi nki beto lenda kudiyula?

BUBU yai, bo ke sadilaka bantu mingi mambu ya mbi sambu bo kele bansukami, sambu na kisika yina bo me katukaka, sambu na mpusu na bo ya nitu to sambu na bikuma ya nkaka. Bantu mingi ke niokwamaka sambu na lukasi ya bamvwama yina ke zolaka kaka kukuma ti mbongo mingi mpi bamfumu ya luyalu yina ke sosaka kaka mambote na bo. Mambu yina mpi mambu ya nkaka ya mbi yina bantu ke salaka, lenda niokula beto to bantu ya nkaka.

2 Bantu mingi ke waka makasi ntangu bo me sadila bo to bantu ya nkaka mambu ya mbi. Beto yonso ke zolaka nde bo sadila beto mambu ya mbote mpi beto zinga na ngemba. Bantu ya nkaka ke kotaka na bimvuka yina ke sosaka kuyidika mambu. Bo ke songaka baluyalu mambu yina bo fwete sala, bo ke teleminaka baluyalu mpi bansiku to bo ke ponaka bamfumu ya politiki yina ke songaka bo nde bo ta yidika mambu. Kansi Biblia ke longaka bansadi ya Yehowa ‘na kukota ve na mambu ya nsi-ntoto’ mpi na kuvingila nde Kimfumu ya Nzambi kukatula mambu yonso ya mbi. (Yoa. 17:16) Kansi beto ke waka mpasi mpi bantangu ya nkaka makasi ntangu beto ke mona mpila bo ke sadila bantu ya nkaka mambu ya mbi. Beto lenda kudiyula nde: ‘Inki mono fwete sala? Keti, kele ti kima yina mono lenda sala sambu na kumanisa mambu yina ya mbi bubu yai?’ Sambu na kupesa bamvutu na bangiufula yina, beto tadila ntete mutindu Yehowa mpi Yezu ke waka ntangu bo ke monaka mambu ya mbi ke salama.

YEHOWA MPI YEZU KE ZOLAKA VE ATA FIOTI MAMBU YA MBI

3. Sambu na nki beto ke waka mpasi ntangu bo ke sadila beto to bantu ya nkaka mambu ya mbi? (Yezaya 5:7)

3 Biblia ke monisa kikuma yina ke salaka nde beto kudiyangisa ntangu bo me sadila beto to muntu ya nkaka mambu ya mbi. Biblia ke tuba nde Yehowa me salaka beto na kifwani na yandi mpi nde yandi “ke zolaka lunungu.” (Nk. 33:5; Kuy. 1:26) Yandi ke sadilaka ve bantu mambu ya mbi ata fioti mpi yandi ke zolaka ve nde muntu kusadila muntu ya nkaka mambu ya mbi. (Kul. 32:3, 4; Mika 6:8; Zek. 7:9) Mu mbandu na bilumbu ya profete Yezaya, Yehowa waka “bidilu ya mpasi” ya bantu ya Izraele ntangu bantu ya insi na bo vandaka kuniokula bo. (Tanga Yezaya 5:7.) Yehowa pesaka ndola na bantu yina vandaka kufwa bansiku na yandi mbala na mbala mpi na bayina vandaka kuniokula bantu ya nkaka.​—Yez. 5:5, 13.

4. Inki mutindu disolo mosi yina kele na Baevanzile ke monisa mutindu Yezu ke kudiwaka ntangu bantu ke sadila muntu mambu ya mbi? (Tala mpi kifwanisu ya ke wakana ti paragrafe yai.)

4 Bonso Yehowa, Yezu mpi ke zolaka nde bantu kusadila bankaka mambu ya mbote. Ntangu yandi vandaka na ntoto, kilumbu mosi yandi kutanaka ti muntu mosi yina vandaka ti diboko ya kuyuma. Yezu wilaka muntu yina mawa mpi belulaka yandi. Kansi bamfumu ya mabundu yina vandaka ntima ya mbi vandaka ve na mawa sambu na muntu yina. Bo vandaka makambu ngolo mpi bo sosaka kutendula nsiku ya Kisabatu na mutindu na bo mosi na kisika ya kusadisa muntu yina vandaka na mpasi. Inki mutindu Yezu kudiwaka? Yandi ‘waka mawa mingi kibeni sambu na ntima-ngolo na bo.’​—Mar. 3:1-6.

Na sinagoga, Yezu ke tubila bamfumu ya mabundu ya Bayuda mambu ya muntu yina kele diboko ya kuyuma yina yandi ke zola kubelula. Bamfumu ya mabundu ke tala Yezu na disu ya mbi.

Bamfumu ya mabundu ya Bayuda vandaka ve kuwila bantu yina vandaka kuniokwama mawa, kansi Yezu vandaka kuwila bo mawa (Tala paragrafe 4)


5. Inki beto fwete vila ve sambu na makasi yina beto lenda wa ntangu beto ke mona mutindu bantu ke sadila bankaka mambu ya mbi?

5 Sambu Yehowa mpi Yezu ke waka makasi ntangu bantu ke sadilaka bantu ya nkaka mambu ya mbi, yo kele ve mbi kana beto mpi me wa makasi. (Baef. 4:26) Kansi beto fwete vila ve nde ata beto wa makasi, yo ta sala ve nde bantu kuyambula kusadila bantu mambu ya mbi. Nkutu, kana beto wa makasi mingi mpi beto yala yo ve, beto lenda niokwama na mabanza mpi kubela. (Nk. 37:1, 8; Yak. 1:20) Yo yina, nki beto fwete sala ntangu beto ke mona mambu ya mbi? Beto lenda baka dilongi na mbandu ya Yezu.

INKI YEZU SALAKA NTANGU BANTU VANDAKA KUSADILA BANKAKA MAMBU YA MBI?

6. Ntangu Yezu vandaka na ntoto, nki mambu ya mbi vandaka kusalama? (Tala mpi kifwanisu ya ke wakana ti paragrafe yai.)

6 Ntangu Yezu vandaka na ntoto, yandi monaka mutindu bantu vandaka kusadila bankaka mambu ya mbi kibeni. Yandi monaka mutindu bamfumu ya mabundu vandaka kuniokula bantu. (Mat. 23:2-4) Yandi zabaka mutindu bamfumu ya nku ya luyalu ya Roma vandaka kuniokula bantu. Bayuda mingi vandaka kuzola diaka ve nde Roma kuyala bo. Bankaka nkutu salaka bimvuka sambu na kunwanisa bantu ya Roma. Kansi Yezu salaka ve bimvuka sambu na kusosa kuyidika mambu mpi yandi kotaka ve ata na kimvuka mosi. Ntangu yandi zabaka nde bantu vandaka kuzola kutula yandi ntotila, yandi tinaka.​—Yoa. 6:15.

Yezu ke tambula yandi mosi na ngumba. Bantu mingi me vukana na nsi ya ngumba.

Ntangu bantu sosaka kutula Yezu mfumu, yandi tinaka (Tala paragrafe 6)


7-8. Sambu na nki Yezu sosaka ve kukatula mambu ya mbi ntangu yandi vandaka na ntoto? (Yoa. 18:36)

7 Ntangu Yezu vandaka na ntoto, yandi kudikotisaka ve na mambu ya politiki sambu na kusosa kukatula mambu ya mbi yina yandi vandaka kumona. Sambu na nki? Sambu yandi zabaka nde bantu kele ve ti nswa ya kudiyala bo mosi mpi bo ta kuka ve. (Nk. 146:3; Yer. 10:23) Bo ta kuka mpi ve kukatula kisina ya bampasi yonso. Satana Diabulu muntu ke yala nsi-ntoto yai. Yandi kele nku mpi yandi ke pusaka bantu mingi na kusala mambu ya mbi. (Yoa. 8:44; Baef. 2:2) Diaka, ata bantu ya mbote ta kuka ve kukatula mambu ya mbi ya ke salama na ntoto yai sambu bo kele bantu ya kukonda kukuka mpi bo ke salaka ve mambu ya mbote ntangu yonso.​—Lon. 7:20.

8 Yezu zabaka nde kaka Kimfumu ya Nzambi mpamba ta katula mambu yina kele na kisina ya bampasi yonso. Yo yina, yandi kudipesaka na “kusamuna mpi kuzabisa nsangu ya mbote ya Kimfumu ya Nzambi.” (Luka 8:1) Yandi ndimisaka “bantu yina kele na nzala mpi kiwina ya lunungu” nde mambu yonso ya mbi ta mana. (Mat. 5:6 tala mpi noti ya kulongukila na Biblia ya Kifalansa; Luka 18:7, 8) Bimvuka ya bantu me salaka sambu na kuyidika mambu ta kuka ve kumanisa yo, kansi luyalu ya Nzambi ya kele na zulu, yina “kele ve ya nsi-ntoto yai,” ta manisa yo.​—Tanga Yoane 18:36.

LANDA MBANDU YA YEZU NTANGU NGE KE MONA MAMBU YA MBI KE SALAMA

9. Inki ke ndimisa nge nde kaka Kimfumu ya Nzambi mpamba ta katula bampasi yonso?

9 Bubu yai, mambu ya mbi ke salama diaka mingi kuluta ntangu Yezu vandaka na ntoto. Ata mpidina, kisina ya bampasi na ‘bilumbu yai ya nsuka’ kele kaka Satana mpi bantu ya kukonda kukuka yina yandi ke sadila. (2 Tim. 3:1-5, 13; Kus. 12:12) Bonso Yezu, beto ke zaba nde kaka Kimfumu ya Nzambi mpamba ta katula kisina ya bampasi yonso. Sambu beto ke kudipesaka na kulonga nsangu ya Kimfumu ya Nzambi, beto ke kotaka ve na bimvuka yina ke teleminaka baluyalu mpi beto ke tulaka ve ntima na baluyalu ya bantu. Beto tadila mbandu ya mpangi-nkento Stacy.a Na ntwala ya kuzaba kieleka, yandi vandaka kukota mbala na mbala na bimvuka yina vandaka kusosa kuyidika mambu. Kansi na nima, yandi yantikaka kudiyula kana mambu yina bo vandaka kusala ta yidika kibeni mambu. Yandi ke tuba nde: “Ntangu mono vandaka na bimvuka yina, mono vandaka kudiyula kana mono vandaka kibeni na nzila ya mbote. Kansi ntangu yai ya mono me kumaka kudipesa na kulonga nsangu ya Kimfumu ya Nzambi, mono me bakisaka kibeni nde mono kele na nzila ya mbote. Mono ke zaba nde Yehowa ta sadisa mbote bantu yina bo ke niokula kuluta mutindu mono zolaka kusala yo.”​—Nk. 72:1, 4.

10. Inki mutindu mambu ya bimvuka yina ke sosaka kuyidika mambu ke salaka ke wakanaka ve ti mambu yina Yezu tubaka na Matayo 5:43-48? (Tala mpi kifwanisu ya ke wakana ti paragrafe yai.)

10 Bimvuka yina ke sosaka kuyidika mambu ke salaka mbala mingi mambu yina bo ke zola, bo ke vandaka makasi mpi mambu yina bo ke salaka ke wakanaka ve ti mbandu ya Yezu mpi malongi na yandi. (Baef. 4:31) Mpangi Jeffrey ke tuba nde: “Mono ke zaba nde ntangu bantu ke sosa kutula ngemba, yo lenda baluka mbala mosi mpi bo yantika kusala mubulu mpi kubotula bima ya bantu.” Kansi Yezu longaka nde beto fwete sadila bantu yonso mambu na zola ata bantu yina ke ndima beto ve to ke niokula beto. (Tanga Matayo 5:43-48.) Bansadi ya Yehowa ke salaka yonso sambu na kulanda mbandu ya Yezu.

Mpangi-nkento mosi ke kudiyangisa ve mpi yandi ke tala na ntwala ntangu yandi ke luta kimvuka mosi yina ke telemina luyalu na bala-bala ya nene.

Bubu yai, yo ke lombaka kikesa sambu na kukota ve na mambu ya politiki (Tala paragrafe 10)


11. Sambu na nki yo lenda vanda mpasi bantangu ya nkaka na kulanda mbandu ya Yezu?

11 Ata beto ke zaba nde Kimfumu ya Nzambi ta katula mambu yonso ya mbi, yo lenda vanda mpasi na kulanda mbandu ya Yezu ntangu bo me sadila beto mambu ya mbi. Beto tala mambu yina kuminaka mpangi Janiya, yina bo sadilaka mambu ya mbi sambu na mpusu na yandi ya nitu. Yandi ke tuba nde: “Mono waka makasi mingi mpi mpasi mingi na ntima mpi mono zolaka nde bo pesa bantu yina ndola. Yo yina ngindu kwisilaka mono na kukota na kimvuka mosi yina ke teleminaka bantu yina ke niokulaka bantu ya mpusu ya nkaka. Mono yindulaka nde kusala mutindu yina ta sadisa mono na kudiwa mbote.” Kansi na nima mpangi Janiya bakisaka nde yandi fwete soba. Yandi ke tuba nde: “Mono vandaka kundima mambu yina bantu vandaka kutuba mpi kutudila bo ntima na kisika ya kutudila Yehowa ntima. Mono katukaka na bimvuka yina yonso.” Ata beto me wa makasi ntangu bo me sadila beto to bantu ya nkaka mambu ya mbi, beto fwete yala makasi na beto mpi beto kota ve na mambu ya politiki to na kimvuka mosi.​—Yoa. 15:19.

12. Sambu na nki yo kele mfunu na kupona mbote mambu yina beto ke tanga mpi yina beto ke wa?

12 Inki lenda sadisa beto na kuyala makasi ntangu bo me sadila beto to bantu ya nkaka mambu ya mbi? Bantu mingi ke ponaka mbote bima yina bo ke tala, ke tanga mpi ke widikila. Yo ke sadisaka bo mbote. Batelevizio mpi masolo yina kele na Internet ke tubilaka mingi mutindu bantu ke sadilaka bankaka mambu ya mbi mpi mambu yina bimvuka ya ke sosaka kuyidika mambu ke salaka. Mbala mingi, bantu yina ke pesaka bansangu ke tubilaka bangindu na bo kansi ve mambu yina salamaka kibeni. Ata bansangu yango kele ya kieleka, kuyindula yo mingi ta soba ve ata kima. Kana beto ke wa bansangu yina mingi, beto lenda kudiyangisa mingi, kuwa makasi kukonda mfunu to kulemba nitu. (Bing. 24:10) Nkutu yo lenda sala nde, beto tula diaka ve Kimfumu ya Nzambi na kisika ya ntete mpi kuvila nde yo mpamba ta katula bampasi yonso.

13. Inki mutindu kutanga Biblia konso kilumbu ta sadisa beto ntangu bantu ke sadila beto to bantu ya nkaka mambu ya mbi?

13 Kana beto ke tanga Biblia konso kilumbu mpi beto ke yindula mambu yina beto ke tanga, yo ta sadisa beto na kuzaba mambu yina beto fwete sala ntangu bo me sadila beto to bantu ya nkaka mambu ya mbi. Mpangi Alia waka mpasi mingi ntangu bo vandaka kusadila bantu mambu ya mbi na kisika yina yandi vandaka kuzinga. Yandi vandaka kuwa makasi sambu bo vandaka ve kupesa bantu yina ya mbi ndola. Yandi ke tuba nde: “Mono kudiyulaka nde, ‘keti mono ke ndima kibeni nde Yehowa ta manisa bampasi yina?’ Na ntangu yina, mono tangaka Yobi 34:22-29. Baverse yina yibusaka mono nde Yehowa ke monaka mambu yonso. Kaka yandi mpamba muntu me zaba lunungu na mutindu ya kukuka mpi kaka yandi muntu ta katula bampasi yonso.” Kansi nki beto lenda sala ntangu beto ke vingila nde Kimfumu ya Nzambi kukatula mambu yonso ya mpasi?

MAMBU YA BETO LENDA SALA NTANGU BANTU KE SADILA BETO TO BANKAKA MAMBU YA MBI

14. Inki beto lenda sala sambu na kukuma ve bonso bantu yina ke sadilaka bankaka mambu ya mbi? (Bakolosai 3:10, 11)

14 Beto ta kuka ve kukanga bantu nzila ya kusadila bantu mambu ya mbi. Kansi beto lenda baka lukanu ya kusadila bantu mambu ya mbote. Mutindu beto me tubila yo, beto ke landaka mbandu ya Yezu, ntangu beto ke zolaka bantu. Zola yina ke pusaka beto na kusadila bantu yonso mambu ya mbote ata bayina ke sadilaka beto mambu ya mbi. (Mat. 7:12; Bar. 12:17) Yehowa ke sepelaka ntangu beto ke sadilaka bantu yonso mambu ya mbote.​—Tanga Bakolosai 3:10, 11.

15. Inki mutindu malongi ya Biblia ke sadisaka bantu yina ke sadilaka bankaka mambu ya mbi?

15 Mutindu ya kuluta mbote ya kusadisa bantu kele, kulonga bo kieleka. Sambu malongi ya Yehowa lenda sala nde muntu yina vandaka ntete muntu ya nku mpi ya mubulu kukuma muntu ya mbote mpi ya ke tulaka ngemba. (Yez. 11:6, 7, 9) Na ntwala ya kuzaba kieleka, mpangi Jemal kotaka na kimvuka mosi yina vandaka kunwana sambu na kusoba luyalu, sambu yandi vandaka kumona nde luyalu yina vandaka mbi. Yandi ke tuba nde: “Nge lenda soba ve muntu na kingolo-ngolo. Bo sobaka mono ve na kingolo-ngolo kansi malongi ya Biblia sobaka mono.” Mambu yina mpangi Jemal vandaka kulonguka sadisaka yandi na kuyambula kunwana. Yo yina kana beto ke longa bantu malongi ya Biblia, beto lenda sadisa bo na kuyambula kusadila bantu ya nkaka mambu ya mbi.

16. Sambu na nki nge fwete longa bantu nsangu ya Kimfumu ya Nzambi?

16 Bonso Yezu, beto ke kudipesaka na kusonga bantu nde kaka Kimfumu ya Nzambi mpamba ta manisa mambu yonso ya mbi. Yo ke pesaka bantu yina bo ke sadilaka mambu ya mbi kikesa. (Yer. 29:11) Mpangi Stacy yina beto me tubila ke tuba nde: “Kuzaba kieleka me sadisaka mono na kudiyala ntangu bo ke sadila mono mpi bantu ya nkaka mambu ya mbi. Yehowa ke sadilaka mambu yina kele na Biblia sambu na kupesa beto kikesa.” Yo yina, nge fwete kudibongisa mbote na ntwala ya kukwenda kulonga bantu nsangu ya Nzambi ya ke pesa kikesa ya ke tuba nde bantu ta sadilaka diaka ve bankaka mambu ya mbi. Kana nge me ndima kibeni nde malongi ya Biblia ya beto me tubila na disolo yai kele kieleka, yo ta sadisa nge na kuzaba mutindu ya mbote ya kutadila mambu ya mutindu yai, kana yo salama na nzo-nkanda to na kisalu.b

17. Inki mutindu Yehowa ke sadisaka beto ntangu bo me sadila beto to bantu ya nkaka mambu ya mbi?

17 Na bilumbu yai ya Satana kele ntete “mfumu ya nsi-ntoto yai,” bantu ta landa kaka kusadila beto mpi bantu ya nkaka mambu ya mbi. Na ntangu yai ya beto ke vingila nde bo “losa” yandi na nganda, beto me konda ve lusadisu mpi kivuvu. (Yoa. 12:31) Yehowa ke tendudila beto na Biblia sambu na nki mambu ya mbi kele mingi mpi mutindu yandi ke kudiwaka ntangu yandi ke monaka mambu yango. (Nk. 34:17-19) Yehowa ke longa beto na nzila ya Mwana na yandi, mambu yina beto fwete sala ntangu bantu me sadila beto to bantu ya nkaka mambu ya mbi mpi mutindu Kimfumu na yandi ta katula mambu ya mbi kimakulu. (2 Pie. 3:13) Yo yina, beto fwete landa kulonga nsangu ya mbote ya Kimfumu ti kikesa mpi kuvingila na kiese yonso ntangu yina ntoto ta fuluka ti “lunungu.”​—Yez. 9:7.

INKI MVUTU NGE TA PESA?

  • Sambu na nki beto lenda wa makasi ntangu bo me sadila beto to bantu ya nkaka mambu ya mbi?

  • Sambu na nki beto ke ndimaka ve nde bantu ta manisa mambu ya mbi?

  • Inki beto lenda sala ntangu bo me sadila beto to bantu ya nkaka mambu ya mbi?

NKUNGA 158 “Yo Ta Sukinina Ve!”

a Beto me soba bazina ya nkaka.

b Tala mpi bangindu ya nkaka A, tubantu-diambu 24-27 ya kamukanda Zola Bantu​—Kumisa Bo Balongoki.

    Mikanda ya Kikongo (1982-2025)
    Basika
    Kota
    • Kikongo (Rép. dém. du congo)
    • Kabula
    • Mambu ya Nge Me Zola
    • Copyright © 2025 Watch Tower Bible and Tract Society of Pennsylvania
    • Bantuma ya Kulanda na Ntwala ya Kusadila
    • Bansiku ya Ke Tadila Kinsweki
    • Paramètres de confidentialité
    • JW.ORG
    • Kota
    Kabula