BAMVUTU NA BANGIUFULA YA BIBLIA
Inki mutindu lufwa ya Yezu ke natilaka beto mambote?
Ntangu Nzambi gangaka bantu, lukanu na yandi vandaka nde bo zinga kimakulu na ntoto kukonda maladi mpi lufwa. Kansi, Adami muntu ya ntete lemfukilaka ve Ngangi mpi vidisaka kivuvu ya kuzinga kimakulu. Beto ke fwaka sambu beto kele bana ya Adami. (Baroma 5:8, 12; 6:23) Yehowa, Nzambi ya kieleka, tindaka Mwana na yandi Yezu na ntoto sambu na kufwa mpi na kusumba diaka luzingu yina Adami vidisaka.—Tanga Yoane 3:16.
Yezu fwaka sambu bantu kubaka luzingu ya kukonda nsuka. Inki mutindu nge ke tadilaka luzingu ya kukonda nsuka awa na ntoto?
Lufwa ya Yezu me pesaka nzila na ndolula ya masumu na beto mpi na luzingu ya kukonda nsuka. Biblia ke monisa beto mutindu luzingu ta vanda na ntoto, ntangu yina beto ta nuna diaka ve, ta bela diaka ve mpi ta fwa diaka ve.—Tanga Yezaya 25:8; 33:24; Kusonga 21:4, 5.
Inki mutindu beto fwete yibuka lufwa ya Yezu?
Na nkokila na ntwala ya lufwa na yandi, Yezu songaka balongoki na yandi na kuyibuka lufwa na yandi na mutindu mosi ya kukonda mindondo. Kusungimina lufwa ya Yezu konso mvula ke sadisaka beto na kuyindulula mutindu Yezu ti Yehowa ke zolaka bantu mingi.—Tanga Luka 22:19, 20; 1 Yoane 4:9, 10.
Na mvula yai, Lusungiminu ya lufwa ya Yezu, ta salama na Kintete, Aprili 14, na nima ya kudinda ya ntangu. Beto ke binga nge na kuvukana ti Bambangi ya Yehowa na kisika yina nge ke zingaka.—Tanga Baroma 1:11, 12.