BAMVUTU NA BANGIUFULA YA BIBLIA
Sambu na nki beto fwete sungimina lufwa ya Yezu?
Nki Mambote Lufwa ya Yezu ta Natila Bantu na Bilumbu ke Kwisa?—YEZAYA 25:8; 33:24
Lufwa ya Yezu kele diambu mosi ya mfunu na luzingu ya bantu. Yandi fwaka sambu na kupesa diaka bantu luzingu. Nzambi gangaka ve bantu sambu na kusala mambi, na kubela mpi na kufwa. (Kuyantika 1:31) Kansi, disumu kotaka na nsi-ntoto na nzila ya muntu mosi, Adami. Yezu pesaka luzingu na yandi sambu na kugulusa beto na disumu mpi na lufwa.—Tanga Matayo 20:28; Baroma 6:23.
Nzambi monisaka zola ya kuluta nene ntangu yandi tindaka Mwana na yandi na ntoto na kufwa sambu na beto. (1 Yoane 4:9, 10) Yezu songaka balongoki na yandi na kuyibuka lufwa na yandi na mutindu mosi ya kukonda mindondo mpi na kusadila dimpa ti vinu. Beto ke monisaka ntonda na Nzambi mpi na Yezu ntangu beto ke salaka mutindu yai konso mvula.—Tanga Luka 22:19, 20.
Banani fwete dia dimpa mpi kunwa vinu?
Ntangu Yezu songaka balongoki na yandi na kuyibuka lufwa na yandi, yandi salaka kuwakana ti bo. (Matayo 26:26-28) Kuwakana yango pesaka balongoki na yandi ti ndambu ya bantu ya nkaka dibaku ya kukuma bantotila mpi banganga-nzambi sambu na kuyala ti Yezu na zulu. Bantu mingi ke sungiminaka lufwa ya Yezu, kansi kaka bantu yina kele na kati ya kuwakana yango ke diaka dimpa mpi ke nwaka vinu.—Tanga Kusonga 5:10.
Bamvula 2 000 ke zola kulunga tuka Yehowa ke ponaka bantu yina ta vanda bantotila. (Luka 12:32) Ntalu na bo kele fioti kana beto fwanisa bo ti ntalu ya bantu yina ta zinga na ntoto kimakulu.—Tanga Kusonga 7:4, 9, 17.