BAMVUTU NA BANGIUFULA YA BIBLIA

Nani ke yalaka kibeni nsi-ntoto?

Bifwanisu ya bitumba, ya mubulu, ya nku, mpi ya bisumbula — Kana Nzambi vandaka kuyala nsi-ntoto yai, keti bampasi zolaka kuvanda mingi?

Bantu mingi ke yindulaka nde Nzambi muntu ke yalaka nsi-ntoto yai. Kana yo kele ya masonga, keti ntoto zolaka kufuluka ti bampasi? (Kulonga 32:4, 5) Biblia ke tubaka nde nsi-ntoto kele na nsi ya kiyeka ya muntu ya mbi.—Tanga 1 Yoane 5:19.

Inki mutindu muntu ya mbi kumaka kuyala bantu? Na luyantiku ya disolo ya luzingu ya bantu, wanzio mosi kolamaka na Nzambi mpi pusaka bankwelani ya ntete na kukolama mpi. (Kuyantika 3:1-6) Bankwelani yina lemfukilaka Satana, wanzio yina kolamaka, ebuna yandi kumaka kuyala bo. Nzambi Nkwa-Ngolo Yonso kele Mfumu mosi ya me fwana, yina ke sepelaka nde bantu yina ke zolaka yandi kupona luyalu na yandi. (Kulonga 6:6; 30:16, 19) Yo ke mawa na kumona nde Satana me kusaka bantu mingi na kusala nsola yai ya mbi mutindu bakala ti nkento ya ntete salaka.—Tanga Kusonga 12:9.

Nani ta manisa bampasi ya bantu?

Keti Nzambi ta pesa Satana nzila ya kulanda kuyala bantu? Ata fioti ve! Nzambi ta sadila Yezu na kukatula mambu ya mbi yina Satana me salaka.—Tanga 1 Yoane 3:8.

Nzambi ta pesa Yezu ngolo ya kufwa Satana. (Baroma 16:20) Na nima, Nzambi ta yala bantu mpi ta pesa bo diaka luzingu ya kiese mpi ya ngemba mutindu vandaka lukanu na yandi ya kisina.—Tanga Kusonga 21:3-5.

Sambu na kuzaba mambu mingi,tala kapu ya 3 ya mukanda yai, Inki Biblia Kelongaka Mpenza? yina Bambangi ya Yehowa me basisaka

Nge lenda baka yo na www.jw.org