Mambu ya Mbi Me Kuma Mingi!

Smita,a nkento mosi ya bamvula 35 na Dacca, na Bangladesh vandaka mama mosi ya zola mpi ya ke tudilaka bantu dikebi. Yandi zabanaka bonso nkento mosi ya kiese yina vandaka kuzola kisalu mingi. Diaka, yandi vandaka kusadisa bantu ya nkaka na kuzaba mambu yina yandi longukaka sambu na Nzambi. Dibuta mpi banduku na yandi waka mpasi ya ngolo kibeni ntangu yandi belaka na kintulumukina mpi fwaka na mposo yina!

James ti nkento na yandi kwelanaka ntama mingi ve mpi vandaka ti bamvula na kati ya 30 ti na 40. Bo vandaka ti bikalulu bonso ya Smita. Na printemps, bo kwendaka kutala banduku na bo na ndambu ya Westi ya États-Unis. Bo vutukaka diaka ve na nzo na bo na New York. Ntangu bo vandaka na nzietelo, bo salaka aksida mosi ya ngolo na kamio mpi bo fwaka. Yo pesaka bantu yina vandaka kuzola bo mpi banduku na bo ya kisalu mpasi mingi.

Bubu yai, yo kele mpasi ve na kubakisa nde mambu ya mbi mpi bampasi ke kuma mingi. Yo vanda basoda to bantu yina kele basoda ve ke fwaka na bitumba. Bantu yina me sala mbi ve ke kutana ti mambu ya mubulu mpi ya nku. Bisumbula yina ke nataka lufwa mpi maladi ya ngolo ke kuminaka bantu kukonda kutadila bamvula mpi luzingu na bo. Bisumbula ya lugangu ke bwilaka bantu yonso. Kukonda lunungu mpi kubakila bantu ya nkaka bangindu ya mbi me panzana bisika yonso. Ntembe kele ve nde nge me kutanaka dezia ti mambu yai.

Yo me fwana mpenza nde beto yula bangiufula bonso yai:

• Sambu na nki mambu ya mbi ke bwilaka bantu ya mbote?

• Keti Nzambi muntu kele na kisina ya mambu ya mutindu yai?

• Keti bampasi ke bwilaka bantu kaka na kintulumukina to bantu bo mosi kele na kisina na yo?

• Keti yo lenda vanda Karma, disongidila mambu yina muntu me salaka ntama ke natila yandi bampasi?

• Kana Nzambi nkwa-ngolo yonso vandaka, sambu na nki yandi ke taninaka ve bantu ya mbote na mambu ya mbi?

• Keti kilumbu kele mambu ya mbi mpi bampasi ta vanda diaka ve na luzingu?

Sambu na kubaka bamvutu na bangiufula yai, beto fwete bakisa ntete bamvutu na bangiufula yai zole ya mfunu: Sambu na nki mambu ya mbi ke salamaka mpi Nzambi ta sala nki?