BAMVUTU NA BANGIUFULA YA BIBLIA

Sambu na nki beto fwete samba sambu Kimfumu ya Nzambi kukwisa?

Yezu Kristu na zulu ya mpunda ke nwanisa bambeni ya Kimfumu ya Nzambi — Keti nge kele na mfunu ya kuzaba mambu mingi ya me tala Kimfumu ya Nzambi mpi mambu yina yo ta sala?

Kimfumu ya Nzambi kele luyalu yina kele na zulu. Yezu songaka balongoki na yandi na kusamba sambu Kimfumu ya Nzambi kukwisa sambu yo tula diaka lunungu mpi ngemba na ntoto. Ata luyalu mosi ve lenda manisa mubulu, kukonda lunungu, mpi maladi kimakulu, kansi Kimfumu ya Nzambi ta manisa yo. Nzambi me ponaka Mwana na yandi Yezu na kuvanda Ntotila ya Kimfumu. Yehowa me ponaka mpi kibuka mosi ya balongoki ya Yezu sambu bo yala ti yandi na Kimfumu.—Tanga Luka 11:2; 22:28-30.

Ntama mingi ve, Kimfumu ya Nzambi ta katula bantu yonso ya ke telaminaka luyalu ya Nzambi. Yo yina, ntangu beto ke sambaka nde Kimfumu ya Nzambi kukwisa, beto ke lombaka nde luyalu ya Nzambi kuyinga baluyalu yonso.—Tanga Daniele 7:13, 14; Kusonga 11:15, 18.

Sambu na nki bantu ta baka mambote na Kimfumu ya Nzambi?

Yezu kele Ntotila ya kuluta mbote sambu yandi ke wilaka bantu mawa. Sambu Yezu kele Mwana ya Nzambi, yandi kele mpi ti kiyeka ya kusadisa bantu yonso ya ke dila sambu na kulomba lusadisu na Nzambi.—Tanga Nkunga 72:8, 12-14.

Kimfumu ya Nzambi ta nata mambote na bantu yonso ya ke sambaka na masonga nde Kimfumu kukwisa mpi ya ke zingaka na kuwakana ti luzolo ya Nzambi. Nge ta tuba ve ata kilumbu mosi nde mono lutisaka ntangu sambu na kulonguka mambu yina Biblia ke tubaka sambu na Kimfumu ya Nzambi.—Tanga Luka 18:16, 17; Yoane 4:23.

Sambu na kuzaba mambu mingi, tala kapu ya 8 ya mukanda yai Inki Biblia Kelongaka Mpenza?, yina Bambangi ya Yehowa me basisaka

Nge lenda baka yo mpi na www.jw.org