DISOLO YINA KELE NA LUTITI YA ZULU | KETI SATANA KELE MPENZA?
Keti Satana Kele?
Kifwanisu mosi na Madrid na Espania ke monisa Satana muntu ya luvunu mpi wanzio ya bo losaka
“Mono yelaka na El Salvador. Ntangu mono vandaka kulemfukila ve mama, yandi vandaka kusonga mono nde: ‘Diabulu ke kwisa kukanga nge!’ Mono vandaka kuvutula nde: ‘Yandi kwisa!’ Mono ke kwikilaka na Nzambi kansi na Satana ve.”—ROGELIO.
Keti nge ke ndima dibanza yai ya Rogelio? Inki ngindu me fwana sambu na nge na bangindu yai na nsi?
Satana kele ve kigangwa ya kieleka, kansi kele mbi yina kele na ntima ya muntu.
Satana kele, kansi yandi ke tudilaka ve bantu dikebi.
Satana kele kigangwa ya kimpeve ya ngolo yina kele na bupusi ya mingi na bantu.
Ziku bantu mingi ke ndimaka bangindu yai yonso. Keti yo kele kibeni mfunu na kuzaba ngindu ya kieleka na bangindu yai? Kana Satana kele ve, bantu yina ke kwikilaka nde yandi kele ke kudikusaka. Kana Satana kele kansi yandi ke tudilaka ve bantu dikebi, mpidina bantu mingi ke waka boma ya mpamba to ke tambulaka na mayele kukonda kikuma. Kansi, kana Satana ke kusaka bantu, yo ke pwelele nde bantu mingi ke zabaka ve nde yandi kele kigonsa mpenza.
Bika beto tadila mutindu Masonuku ya Santu ke pesa mvutu na bangiufula yai: Satana kele nani? Keti yandi kele mbi yina kele na ntima ya muntu to kigangwa mosi ya kimpeve? Kana Satana kele kigangwa, keti yandi kele kigonsa sambu na nge? Kana mpidina, nki mutindu nge lenda kuditanina?