Sambu na Nki Beto Fwete Longuka Biblia?

Keti nge me kudiyulaka dezia bangiufula ya mutindu yai? Kana ee, nge mpamba ve ke kudiyulaka yo. Bantu mingi na ntoto ya mvimba ke kudiyulaka bangiufula ya mfunu ya me tala luzingu. Keti nge lenda baka bamvutu na bangiufula yango?

Bantu mingi ta pesa mvutu nde “Ee!” Sambu na nki? Sambu bo me bakaka bamvutu ya mbote ya Biblia na bangiufula na bo. Keti nge ke zola kuzaba mambu yina Biblia ke tubaka? Kana mpidina, nge lenda lomba nde Bambangi ya Yehowa kulonguka ti nge Biblia ya ofele.a

Kana beto ke zola kulonguka Biblia ti bantu, bantu ya nkaka ke tubaka nde: “Beto kele na kisalu mingi.” Bankaka ke tubaka nde: “Kulonguka ke vandaka mpasi.” Bankaka diaka nde: “Beto ke sepelaka ve na kulonguka.” Kansi, bantu ya nkaka ke ndimaka. Bo ke sepelaka na kulonguka Biblia. Beto tadila mwa bambandu:

• “Mono kotaka na dibundu ya Katolika, ya Misioni, na tempelo ya ba Sikh, na monastère ya Babudiste mpi mono longukaka teolozi na iniversite. Kansi, mono bakaka ve bamvutu na bangiufula ya me tala Nzambi. Mbangi mosi ya Yehowa kwisaka kutala mono na nzo. Bamvutu yina yandi pesaka mono na nsadisa ya Biblia yitukisaka mono kibeni mpi mono ndimaka kulonguka Biblia.”—Gill, na Angleterre.

• “Mono vandaka ti bangiufula mingi ya me tala luzingu, kansi bamvutu yina pastere ya dibundu na beto pesaka mono sepedisaka mono ve. Mbangi mosi ya Yehowa sadilaka Biblia mpamba sambu na kupesa bamvutu na bangiufula na mono. Ntangu yandi sosaka kuzaba kana mono ke zola kulonguka mambu mingi, mono ndimaka na kiese yonso.”—Koffi, na Bénin.

• “Mono vandaka na mfunu ya kuzaba mambu yina ke kuminaka bantu kana bo me fwa. Mono vandaka kukwikila nde bafwa lenda kota bantu nsoki, kansi mono vandaka na mfunu ya kuzaba mambu yina Biblia ke tubaka sambu na diambu yai. Yo yina, mono yantikaka kulonguka Biblia ti nduku mosi ya vandaka Mbangi ya Yehowa.”—José, na Brésil.

• “Mono mekaka kutanga Biblia kansi mono kukuka ve kubakisa yo. Bambangi ya Yehowa kwisaka kutala mono mpi tendudilaka mono mbote-mbote bambikudulu mingi ya Biblia. Mono kumaka na nzala ya kulonguka diaka mambu ya nkaka.”—Dennize, na Mexique.

• “Mono vandaka kudiyula kana Nzambi ke kudibanzaka sambu na mono. Yo yina, mono bakaka lukanu ya kusambila Nzambi. Kilumbu yina landaka, Bambangi ya Yehowa kwisaka kutala mono na nzo mpi mono ndimaka kulonguka Biblia.”—Anju, na Népal.

Bambandu yai ke yibusa beto mambu yai ya Yezu tubaka: “Kiese na bantu yina kele na nzala ya mambu ya kimpeve.” (Matayo 5:3) Ya kieleka, bantu ke butukaka ti nzala ya kuzaba Nzambi mpi yandi mpamba muntu lenda lungisa mpusa yai. Yandi ke lungisaka yo na nzila ya Ndinga na yandi, Biblia.

Kulonguka Biblia ke lombaka nki? Inki mutindu yo lenda natila nge mambote? Disolo ya ke landa ta pesa mvutu na bangiufula yai.