BAMVUTU NA BANGIUFULA YA BIBLIA
Kilumbu ya Kusambisa kele nki?
Sambu na nki kilumbu ya kusambisa ta vanda ntangu mosi ya kiese?
Na ntangu ya ntama, Nzambi vandaka kusadila bazuzi sambu na kugulusa bansadi na yandi na mambu ya kukonda lunungu. (Bazuzi 2:18) Biblia ke tubila Kilumbu ya Kusambisa bonso ntangu ya kiese yina Yehowa, Zuzi ya ntoto ya mvimba, ta gulusa bantu yonso na mambu ya kukonda lunungu.—Tanga Nkunga 96:12, 13; Yezaya 26:9.
Nzambi me ponaka Yezu sambu na kusambisa bantu ya kele na luzingu mpi bafwa. (Bisalu 10:42; 17:31) Bantu mingi me fwaka kukonda bo zaba Nzambi. Na Kilumbu ya Kusambisa, Yezu ta futumuna bantu ya mutindu yai sambu bo zaba Nzambi ya kieleka mpi bo zola yandi.—Tanga Bisalu 24:15.
Sambu na nki Kilumbu ya Kusambisa ta sala bamvula funda?
Bo ta futumuna bafwa na nsungi ya bamvula funda. (Kusonga 20:4, 12) Nzambi ta pesa bo ntangu ya kulonguka banzila na yandi mpi kulemfukila yandi. Biblia ke tuba nde bo ta sambisa bantu na nsadisa ya mambu yina bo ta sala na nima ya lufutumuku na bo.—Tanga Baroma 6:7.
Biblia ke tubila mpi kilumbu mosi ya kusambisa yina ta kwisa na kintulumukina na ntwala nde bamvula funda kuyantika. Mutindu masolo ya luyantiku ya zulunalu yai ke monisa yo, Biblia ke bingaka mpi kilumbu yango nde kilumbu ya nsuka. Na kilumbu yina, Nzambi ta fwa bantu yonso ya mbi. (2 Piere 3:7) Yo yina, beto fwete monisa nde beto ke zola Nzambi.—Tanga 2 Piere 3:9, 13.