Boma ya Bigonsa

Alona ke tuba nde: “Kana mono me wa makelele ya kamio yina ke kebisaka bantu sambu na kigonsa mosi buna, ntima na mono ke bulaka ngolo mpi mono ke tinaka sambu na kubumbana na kisika yina bantu ke kuditaninaka na babombe. Ata mono me bumbana, ntima na mono ke vandaka zulu-zulu. Yo ke vandaka mbi kuluta kana mono me basika mpi kele ve ti kisika ya kubumbana. Kilumbu mosi ntangu mono vandaka kutambula na bala-bala, mono yantikaka kudila mpi mpema kangamaka mono. Bangunga mingi lutaka sambu mono kudiwa mbote. Na nima, makelele ya kamio yango yantikaka diaka.”

Bitumba kele kima mosi ya ke tulaka luzingu ya bantu na kigonsa. Kana bo me zabisa nge nde nge to muntu mosi ya nge ke zolaka mingi kele ti maladi mosi ya mbi kibeni, yo lenda pusa nge na kudiwa bonso nde bo me bula nge bombe. Sambu na bantu ya nkaka, kuwa boma ya makwisa lenda pusa bo na kudiyangisa. Bo lenda kudiyula nde: ‘Keti bana mpi bantekolo na beto ta zinga na nsi-ntoto yai ya kubeba, ya me fuluka ti bitumba, mubulu, maladi ya nsambukila mpi nsoba ya klima?’ Inki mutindu beto lenda nwana ti mambu ya mutindu yai?

Biblia ke tuba nde: “Muntu ya mayele kana yandi mona mpasi ke kwisa, yandi fweti tina yo.” (Bingana 27:12) Kaka mutindu beto ke taninaka mavimpi na beto, beto lenda tanina mpi mabanza ti mawi na beto. Bansaka ya mubulu ya kulutisila ntangu mpi bansangu ya ke monisaka bifwanisu ya ke pesa boma ke yikaka beto ti bana na beto basusi. Kubuya kutala bifwanisu ya mutindu yai ke tendula ve nde beto ke buya kundima mambu ya ke salama. Nzambi salaka ve mabanza na beto sambu na kuyindula mambu ya mbi. Kansi, beto fwete fulusa yo ti “mambu yonso yina kele ya kieleka, . . . ya lunungu, . . . ya bunkete, . . . yina ke pusaka na zola.” Kana beto ke sala mutindu yai, “Nzambi ya ngemba” ta pesa beto ngemba ya mabanza mpi ya ntima.​—Bafilipi 4:8, 9.

MFUNU YA KISAMBU

Kuvanda ti lukwikilu ya kieleka ke sadisaka beto na kunwana ti basusi. Biblia ke longisila beto na ‘kukangula meso na yina me tala bisambu.’ (1 Piere 4:7) Beto lenda lomba Nzambi lusadisu, mayele, kikesa sambu na kunwana ti basusi, mpi kutula ntima nde “yandi ke wa beto sambu na konso kima yina beto ke lomba.”​—1 Yoane 5:15.

Biblia ke tuba nde Satana muntu kele “mfumu ya nsi-ntoto yai” kansi Nzambi ve, mpi nde “nsi-ntoto ya mvimba kele na nsi ya kiyeka ya muntu ya mbi.” (Yoane 12:31; 1 Yoane 5:19) Yo yina, Yezu vandaka ti bikuma ya mbote ya kulonga beto na kusamba Nzambi nde: “Gulusa beto na maboko ya muntu ya mbi.” (Matayo 6:13) Alona ke tuba nde: “Konso ntangu ya mono ke waka makelele ya kamio yina ke kebisaka bantu sambu na kigonsa mosi buna, mono ke sambaka Yehowa sambu yandi sadisa mono na kuyala mawi na mono. Diaka, bakala na mono ke bingaka mono na telefone mpi ke salaka kisambu. Bisambu ke sadisaka kibeni.” Biblia ke tuba nde: “Yandi [Yehowa] kele pene-pene na bantu yonso yina ke bingaka yandi, bayina ke bingaka yandi na ntima ya mbote.”​—Nkunga 145:18.

KIVUVU NA BETO SAMBU NA BILUMBU YINA KE KWISA

Na Disolo ya Yezu na Zulu ya Ngumba, yandi longaka balongoki na yandi na kusamba nde: “Bika nde Kimfumu na nge kukwisa.” (Matayo 6:10) Kimfumu ya Nzambi ta katula basusi yonso kimakulu. Na nzila ya Yezu, Mfumu ya Ngemba, Nzambi ta ‘sukisa bitumba na nsi-ntoto yonso.’ (Yezaya 9:6; Nkunga 46:10) Biblia ke tuba nde: ‘Yandi [Nzambi] ta sambisa bantu ya nsi-ntoto . . . Bantu ta kwenda diaka ve na bitumba. Bo ta yilama mpi diaka ve sambu na kunwana bitumba. . . . Ata muntu mosi ve ta kwisa kupesa bo boma.’ (Mika 4:3, 4) Yo ke tuba diaka nde: Bantu “ta tunga banzo, bo ta zinga muna; bo ta kuna bilanga ya vinu, bo ta dia bambuma na yo.” (Yezaya 65:21) Yo ke yika nde: “Ata muntu mosi ve ta tuba diaka nde: ‘Mono ke bela.’”​—Yezaya 33:24.

Bubu yai, ata beto me baka bangidika sambu na kuditanina, yo kele ve pete na kutina mambu ya kukonda kukana to na kubuya kuvanda na kisika ya mbi mpi na ntangu ya mbi. (Longi 9:11) Tuka bamvu-nkama mingi, bitumba, mubulu mpi maladi ke landa na kufwa bantu ya mbote. Inki kivuvu bantu ya mutindu yai kele ti yo?

Bamilio ya bantu ya me fwaka yina Nzambi mpamba ke zaba ntalu na bo ta zinga diaka. Bubu yai, bo kele na mabanza ya kukuka ya Nzambi tii kilumbu yina “bantu yonso ya kele na maziamu ya mbambukilu ta . . . basika.” (Yoane 5:28, 29) Sambu na lufutumuku, Biblia ke sila beto nde: “Beto kele ti kivuvu yai bonso longo sambu na moyo, yo kele ya kieleka mpi ngolo.” (Baebreo 6:19) Diaka, Nzambi “me pesaka bantu yonso kipiku na mutindu yandi me futumunaka [Yezu] na bafwa.”​—Bisalu 17:31.

Bubu yai, ata bantu yina ke sala ngolo sambu na kusepedisa Nzambi ta kutana ti bampasi. Kansi, kusadila mayele, kukwenda pene-pene na Nzambi na nzila ya kisambu mpi kutula lukwikilu na lusilu ya Biblia sambu na bilumbu ke kwisa me sadisaka Paul, Janet mpi Alona na kunwana ti basusi. Kaka mutindu yandi me sadisaka bo, “bika nde Nzambi yina ke pesaka kivuvu kufulusa beno ti kiese mingi mpi ngemba mingi na nzila ya ntima yina beno ke tudilaka yandi.”​—Baroma 15:13.