Mbongo ya Ke Sadisaka Beto na Kusala Kisalu ya Kusamuna Ke Katukaka na Wapi?

Konso mvula, beto ke niemaka mpi ke kabulaka Babiblia ti mikanda ya nkaka mingi kuluta. Na ntoto ya mvimba, beto ke tungaka babiro ya filiale sambu na kutwadisa bisalu na beto mpi beto ke sadilaka bamasini yina ke niemaka mikanda. Beto ke vukanaka na bisika ya lusambu ya kitoko yina bo ke bingaka Banzo ya Kimfumu. Mbongo ya kusala bisalu yai yonso ke katukaka na wapi?

Yo ke katukaka na makabu ya luzolo ya mbote yina bampangi ke pesaka. (2 Bakorinto 9:7) Na 1879, nimero ya zole ya zulunalu yai tubaka nde: “Beto ke kwikila nde ‘Nzozulu ya Nkengi ya Sioni’ [mutindu bo vandaka kubinga zulunalu yai na ntangu yina] ke basikaka na lusadisu ya YEHOWA, mpi kana yo kele mutindu yina, yo ta lomba ve ata fioti lusadisu ya bantu.” Mutindu yai ya kusala mambu me sobaka ve.

Bantu ke tindaka makabu mbala mosi na babiro ya filiale na beto to bo ke tulaka yo na bakesi ya makabu ya ke vandaka na Banzo ya Kimfumu. Beto ke kungulaka ve mbongo mpi beto ke lombaka ve bantu na kupesa ntalu mosi buna ya mbongo sambu na bisalu to na mikanda na beto. Bo ke futaka beto ve ntangu beto ke samunaka, ke longaka na dibundu mpi ke pesaka maboko sambu na kutunga bisika ya lusambu. Yezu tubaka nde: “Beno me baka ya ofele, beno pesa mpi ya ofele.” (Matayo 10:8) Bampangi yonso ya ke salaka na babetele, na babiro ya ke twadisaka kisalu na beto na ntoto ya mvimba mpi bampangi ya Nto-Kimvuka ya Bambangi ya Yehowa ke vandaka ve ti salere.

Diaka, beto ke sadilaka mbongo yina bampangi ke pesaka sambu na kusadisa bampangi yina me kutana ti bisumbula. Bakristu ya mvu-nkama ya ntete vandaka kusepela na kusadisa bampangi yina vandaka na mpasi. (Baroma 15:26) Yo yina, beto ke sadisaka bampangi ya ke kutanaka ti bisumbula. Mu mbandu, beto ke tungaka diaka banzo na bo, bisika ya lusambu, ke pesaka bo madia, bilele mpi bankisi.