Inki Mutindu Bambangi ya Yehowa Ke Sadilaka Makabu?
Beto ke sadilaka makabu na beto sambu na mambu ya lusambu mpi sambu na kusadisa bampangi ya organizasio na beto yina ke kutana ti bampasi. Beto ke salaka mambu yina sambu na kulungisa mukumba na beto ya ntete-ntete: kusadisa bantu na kukuma balongoki ya Yezu Kristu.—Matayo 28:19, 20.
Beto ke sadilaka ve ata fioti makabu na beto sambu na kukumisa muntu mosi buna mvwama. Beto ke futaka ve bampangi yina ke twadisaka mabundu to bampangi ya nkaka ya ke vandaka ti mikumba, mpi bo ke futaka ve Bambangi ya Yehowa sambu na kisalu ya kulonga yina bo ke kwendaka kusala nzo na nzo. Bampangi yina ke salaka na Babetele na beto mpi na babiro yina ke twadisaka kisalu na beto na ntoto ya mvimba, yo vanda bampangi ya Nto-Kimvuka, ke vandaka ve ti salere.
Mwa Mambu ya Beto Ke Salaka
Kubasisa Mikanda: Konso mvula, beto ke balulaka bamilio ya Babiblia mpi ya mikanda ya nkaka, beto ke niemeka yo, beto ke tindaka yo na mabundu, mpi beto ke kabudilaka yo bantu kukonda kulomba bo mbongo. Kiteso mosi, beto ke tulaka mikanda na beto na site Internet na beto jw.org mpi na aplikasio JW Library. Bantu lenda baka yo ya ofele.
Kisalu ya Kutunga mpi ya Kutanina Bisika ya Lusambu: Na ntoto ya mvimba, beto ke tungaka mpi beto ke taninaka bisika yina beto ke sambilaka Yehowa sambu bampangi na beto yina kele na mabundu kuvanda ti bisika ya mbote ya kukutana sambu na kusambila Nzambi mpi kukumisa yandi. Beto ke tungaka mpi Babetele mpi babiro yina beto ke salaka kisalu ya kubalula mikanda ti bavideo. Bampangi yina ke salaka kisalu yai ke vandaka mingi-mingi bampangi yina me kudipesaka na luzolo na bo mosi. Yo yina beto ke basisaka ve mbongo mingi.
Kutwadisa Kisalu: Bisalu yina ke salamaka na babiro na beto ya ke twadisaka kisalu na ntoto ya mvimba, na babiro yina beto ke salaka kisalu ya kubalula mikanda ti bavideo mpi bisalu yina bampangi ya ke salaka banzietelo sambu na kupesa bampangi ya nkaka kikesa ke salaka, ke salamaka na nsadisa ya makabu yina bampangi ya ntoto ya mvimba ke pesaka.
Kulonga Nsangu ya Mbote: Bo ke futuka ve Bambangi ya Yehowa sambu na kisalu ya kulonga nsangu ya mbote yina bo ke salaka to sambu na kulonga bantu ya nkaka “ndinga ya Nzambi.” (2 Bakorinto 2:17) Kansi, kaka mutindu Bakristu ya mvu-nkama ya ntete vandaka kusala, yo kele ti bampangi yina bo me ponaka mpi ya bo me pesaka formasio, bayina ke kudipesaka mingi kibeni na kisalu ya kulonga nsangu ya mbote. Organizasio na beto ke pesaka bampangi yango bisika ya kulala mpi bima ya nkaka ya bo ke vandaka ti yo mfunu sambu na kuzinga.—Bafilipi 4:16, 17; 1 Timoteo 5:17, 18.
Malongi: Mbongo ya beto ke basisaka sambu na kusala balukutakanu na beto ya nziunga mpi ya distrike ke katukaka na mbongo ya makabu. Beto ke basisaka mpi malongi ya Biblia yina muntu lenda widikila mpi bavideo. Bampangi yina ke twadisaka mabundu na beto mpi bampangi yina ke kudipesaka mingi kibeni na kisalu ya kulonga nsangu ya mbote ke bakaka formasio na banzo-nkanda sambu na kulungisa mikumba na bo mbote-mobte.
Kusadisa Bampangi Yina Me Bwila Mpasi: Beto ke pesaka bampangi yina ke bwilaka bisumbula ya lungangu mpi bisumbula yina ke salamaka sambu na mambu ya bantu ke sala bima ya kudia, masa mpi bisika ya kuvanda. Beto ke sadisaka kaka ve “bantu yina kele bampangi na beto na lukwikilu,” kansi beto ke sadisaka mpi bantu yina kele ve Bambangi ya Yehowa.—Bagalatia 6:10.