Inki Mutindu Mambu Ke Salamaka na Feti ya Makwela ya Bambangi ya Yehowa?

Mbala mingi bafeti ya Bambangi ya Yehowa ke vandaka ve bafeti ya mindondo-mindondo mpi yo ke vandaka ntangu mosi ya lukumu. Bo ke salaka diskure mosi ya nkufi ya me simbama na Biblia. Na nima, bantu lenda kutana sambu na feti. Kuna bantu ke diaka mpi ke nwaka mwa kima.a Yezu kwendaka mpi na feti ya mutindu yina na mbanza Kana ntangu yandi yantikaka kisalu na yandi ya kulonga nsangu ya mbote.​—Yoane 2:1-11.

• Inki mutindu mambu ke salamaka na feti yango?

• Bafeti ya makwela ya Bambangi ya Yehowa ke salamaka na wapi?

• Banani lenda kwenda na feti yango?

• Muntu fwete lwata inki mutindu sambu na kukwenda na feti yango?

• Bantu ke kwendaka ti bakado sambu na bankwelani?

• Bantu ta nangula makopa ya malafu?

• Keti bantu yina ta vanda na feti ya makwela ta losila bankwelani loso?

• Keti bima ya kudia mpi malafu ta vanda?

• Keti miziki ta vanda to bantu ta kina?

• Keti Bambangi ya Yehowa ke salaka feti ya aniversere ya makwela na bo?

Inki mutindu mambu ke salamaka na feti yango?

Kima ya kuluta mfunu na feti ya makwela kele diskure ya makwela. Bo ke salaka diskure yango na minuta 30 mpi Mbangi mosi ya Yehowa muntu ke salaka yo. Diskure yango ke simbaka bantima ya bantu mpi yo ke pesaka bo kikesa. Diskure yango ke monisaka mutindu Biblia lenda sadisa bantu yina me kwelana na kuvanda na makwela yina ta wumela, ya zola mpi ya kiese.​—Baefezo 5:33.

Na bansi mingi, guvernema ke pesaka Bambangi ya Yehowa nswa kukwedisa. Yo yina na nsuka ya diskure ya makwela, bantu ya me kwelana ke salaka lusilu ya makwela mpi bo ke lwatisanaka lupetu na misapi. Na nima, Mbangi ya Yehowa yina salaka diskure ya makwela ta tuba nde bankwelani yango me kuma sesepi nkento ti bakala na kutadila nsiku.

Na bansi ya nkaka, nsiku ke lombaka nde bantu kukwenda kukwelana na biro ya leta ya ke tadilaka mambu ya makwela. Bakala ti nkento ke kwendaka na biro yango ya leta bilumbu fioti na ntwala nde bo landa diskure ya makwela. Kana bakala ya makwela mpi nkento ya makwela salaka ve lusilu ya makwela na biro ya leta yina ke tadilaka mambu ya makwela, bo lenda sala lusilu yango na nsuka ya diskure ya makwela. Kansi kana bo salaka dezia lusilu yina, bo lenda pona kana bo ta sala yo diaka, kansi ture yai, bo ta sala yo na bangogo yina ke monisa nde bo salaka yo dezia. Na nsuka ya diskure ya makwela, bo ta sala kisambu sambu na kulomba Nzambi yandi sakumuna bankwelani yina ya mpa.

Bafeti ya makwela ya Bambangi ya Yehowa ke salamaka na wapi?

Bambangi mingi ya Yehowa ke ponaka kusala nkinsi na bo ya makwela na Nzo ya Kimfumu kana mpila kele.b Kana bankwelani ta sala feti na nima ya diskure, bo ke ponaka kisika ya nkaka sambu na kusala feti yango.

Banani lenda kwenda na feti yango?

Kana makwela me salama na Nzo ya Kimfumu, mbala mingi bantu yonso ke kwisaka, yo vanda bo kele Bambangi ya Yehowa to ve. Kana bankwelani yina ta sala feti sambu na makwela na bo, bo mosi ta pona bantu yina bo ta bingisa na feti yango.

Muntu fwete lwata inki mutindu sambu na kukwenda na feti yango?

Ata yo ke vandaka ve ti mutindu mosi buna ya kulwata sambu na kukwenda na makwela yina ke salama na Nzo ya Kimfumu, Bambangi ya Yehowa ke salaka bikesa sambu na kulanda ndongisila ya Biblia ya kulwata na mutindu ya kukonda mindondo mpi na luzitu sambu na kupesa lukumu na nkinsi yina ya mfunu mingi. Bo ke sepelaka mpi kana bantu ya nkaka me sala mpidina. (1 Timoteo 2:9) Ya kieleka, bo ke sadilaka mpi ndongisila yina sambu na konso kisika yina feti ya makwela ke salama, kana bankwelani me baka lukanu ya kusadisa feti.

Bantu ke kwendaka ti bakado sambu na bankwelani?

Biblia ke siamaisaka bantu na kukaba. (Nkunga 37:21) Bambangi ya Yehowa ke sepelaka kukabila bantu ya nkaka mpi kubaka bakado. (Luka 6:38) Kansi, bo ke lombaka ve bantu na kunata bakado mpi bo ke tangaka ve bazina ya bantu yina me pesa bakado. (Matayo 6:3, 4; 2 Bakorinto 9:7; 1 Piere 3:8) Bikalulu yina ke wakanaka ve ti mambu yina Biblia ke tubaka mpi yo lenda sala nde bantu yina me kwisa na feti kudiwa ve mbote.

Bantu ta nangula makopa ya malafu?

Ve. Bambangi ya Yehowa ke nangulaka ve makopa ya malafu sambu kikalulu yina me katuka na mambu yina mabundu ya luvunu vandaka kusala.c Bambangi ya Yehowa ke songaka bantu yina me katuka kukwelana nde, bo ke zola nde bo vanda na makwela ya kiese, kansi bo ke salaka yo ve na nzila ya kunangula makopa.

Keti bantu yina ta vanda na feti ya makwela ta losila bankwelani loso?

Ve. Na bisika ya nkaka, bo ke losilaka bankwelani loso to kima mosi ya me fwanana ti yo. Bo ke yindulaka nde yo ta natila bakwelani mambote, kiese mpi luzingu ya nda. Kansi Bambangi ya Yehowa ke buyaka mambu yina sambu yo me katukaka na mambu yina bantu ke yindulaka. Na kati ya mambu yango, beto lenda tanga kuzodila bantu shanse ya mbote, mambu yai ke fwa bansiku ya Biblia.​—Yezaya 65:11.

Keti bima ya kudia mpi malafu ta vanda?

Na nkinsi ya makwela ya ke salamaka na Nzo ya Kimfumu, bantu ke diaka ve bima ya feti to bo ke nwaka ve. Bankwelani ya nkaka ke ponaka kisika yina bo ta sala feti na bo ya makwela sambu na kudia mpi kunwa malafu. (Longi 9:7) Kana bo me baka lukanu ya kupesa bantu malafu, bo ke zikisaka nde bo ta pesa bantu malafu na mutindu yina bo ta lutisa ve ndilu mpi yo ke vandaka kaka bantu yina kele bambuta na kutadila nsiku ya leta, bantu fwete nwa malafu yango.​—Luka 21:34; Baroma 13:1, 13.

Keti miziki ta vanda to bantu ta kina?

Kana bankwelani ta sadisa feti, bo lenda yidika miziki yina ta bula mpi makinu. (Longi 3:4) Bo fwete pona mbote miziki yina bo ta tula yina ta sepedisa bo mpi ya bantu ta kwisa na feti. Mbala mingi na nkinsi yina ke salamaka na Nzo ya Kimfumu, bo ke tulaka miziki yina ntu-diambu na yo me katuka na Biblia.

Keti Bambangi ya Yehowa ke salaka feti ya aniversere ya makwela na bo?

Bansiku ya Biblia ke ndimaka ve mpi ke buyisaka ve bantu na kusala ba-aniversere ya makwela. Yo yina Bambangi ya Yehowa yina me kwelaka ke ponaka na kusala to ve feti ya aniversere ya makwela na bo. Kana bo me pona kusala feti yina, bo ke salaka yo bo mosi to ti banduku na bo mpi bantu ya mabuta na bo.