DISOLO YINA KELE NA LUTITI YA ZULU | BAMBANGI YA YEHOWA KELE BANANI?
Sambu na Nki Beto Ke Samunaka?
Ziku, beto me zabanaka mingi sambu na kisalu na beto ya kusamuna nzo na nzo, na bisika ya bantu mingi mpi na bisika ya nkaka yina beto lenda kuta bantu. Sambu na nki beto ke salaka yo?
Bambangi ya Yehowa ke samunaka sambu na kupesa Nzambi lukumu mpi sambu na kuzabisa bantu zina na yandi. (Baebreo 13:15) Diaka, beto ke landaka ntuma yina Yezu Kristu pesaka nde: “Yo yina, beno kwenda mpi beno kumisa bantu ya makanda yonso balongoki, . . . beno longa bo na kuzitisa mambu yonso ya mono tumaka beno.”—Matayo 28:19, 20.
Diaka, beto ke zolaka bantu yonso. (Matayo 22:39) Beto ke zabaka nde bantu mingi kele ti mabundu na bo mpi nde bantu yonso ve ke sepelaka ti nsangu na beto. Kansi, beto ke bakisaka nde malongi ya Biblia ke gulusaka luzingu ya bantu. Yo yina, beto ke landaka “kukonda kulemba na kulonga mpi kuzabisa nsangu ya mbote ya me tala Kristu,” kaka mutindu Bakristu ya mvu-nkama ya ntete salaka.—Bisalu 5:41, 42.
Antonio Cova Maduro, muntu mosi ya siansi tubilaka “bikesa yina Bambangi ya Yehowa ke salaka mpi bampasi yina bo ke kutanaka ti yo . . . , sambu Ndinga ya Nzambi kukuma na bisika ya ntama na ntoto.”—El Universal newspaper, Venezuela
Bantu mingi ya ke tangaka mikanda na beto kele ve Bambangi ya Yehowa. Nkutu, bantu mingi ya ke longukaka Biblia ti beto kele ti mabundu na bo. Kansi, bo ke sepelaka mutindu Bambangi ya Yehowa ke kwendaka kutala bo.
Ya kieleka, nge lenda vanda ti bangiufula ya nkaka sambu na Bambangi ya Yehowa. Sambu na kubaka bamvutu, beto ke lomba nge na
Kuyula Mbangi ya Yehowa mosi.
Kukota na site Internet na beto www.jw.org.
Kukwenda na balukutakanu na beto. Yo kele sambu na bantu yonso.