Baka Lusadisu Sambu na Kubakisa Biblia

Yindula nde nge me kwenda na insi mosi ya nzenza sambu na mbala ya ntete. Nge me mona bantu, binkulu, madia mpi mbongo ya nge me yikamaka ntete ve ti yo. Yo kele pwelele nde nge lenda wa kiseku.

Nge lenda wa mutindu mosi kana nge me tanga Biblia na mbala ya ntete. Ntangu nge ke tanga yo, nge ta zaba mambu ya ntama yina nge me zabaka ntete ve. Mu mbandu, nge ta zaba bantu ya Filistia, binkulu ya nge me zabaka ve bonso ‘kupasula bilele,’ to madia ya bo vandaka kubinga mana mpi mbongo ya kibende ya bo vandaka kubinga drakime. (Kubasika 16:31; Yozue 13:2; 2 Samuele 3:31; Luka 15:9) Nge lenda mona mambu yai yonso mpasi na kubakisa. Bonso muntu yina me kwenda kutala insi mosi, keti nge ta zola ve nde muntu mosi kutendudila nge mambu?

MUTINDU BANTU BAKAKA LUSADISU NA NTANGU YA NTAMA

Banda bo yantikaka kusonika Biblia na mvu-nkama ya 16 N.T.B., bo vandaka kusadisa bantu na kubakisa yo. Mu mbandu, Moize, ntwadisi ya ntete ya dikanda ya Izraele, “yantikaka kutendula” mambu yina vandaka ya kusonika.​—Kulonga 1:5.

Kiteso ya bamvu-nkama kumi na nima, balongi ya Masonuku landaka na kulonga bantu Ndinga ya Nzambi. Na mvu 455 N.T.B., Bayuda mingi ti bana mingi vukanaka na bala-bala mosi ya nene na Yeruzalemi. Balongi ya Masonuku vandaka pana sambu na “kutanga mukanda yina [ya santu] na ndinga ya ngolo.” Katula kutanga Biblia, “bo sadisaka bantu na kubakisa mambu yina bo vandaka kutanga.”​—Nehemia 8:1-8.

Bamvu-nkama tanu na nima, Yezu Kristu mpi salaka kisalu ya kulonga bantu. Yo yina, yandi zabanaka ntete-ntete bonso longi. (Yoane 13:13) Yandi vandaka kulonga bantu na bimvuka mpi bantangu ya nkaka muntu mosi-mosi. Na Disolo yina yandi salaka na Zulu ya Ngumba, yandi longaka bantu mingi, ebuna “bimvuka ya bantu yitukaka mingi na mutindu na yandi ya kulonga.” (Matayo 5:1, 2; 7:28) Na mvu 33 ya T.B., Yezu solulaka ti balongoki na yandi zole ntangu bo vandaka kukwenda na bwala mosi ya vandaka pene-pene ti Yeruzalemi. Biblia ke tuba nde: ‘Yandi vandaka kutendudila bo Masonuku mbote-mbote.’​—Luka 24:13-15, 27, 32.

Balongoki ya Yezu vandaka mpi balongi ya Ndinga ya Nzambi. Kilumbu mosi, mfumu mosi ya Etiopia vandaka kutanga Masonuku. Filipo, longoki ya Yezu, kwendaka pene-pene na yandi mpi yulaka yandi nde: “Keti nge ke zaba kibeni mambu ya nge ke tanga?” Muntu ya Etiopia vutulaka nde: “Ya kieleka, inki mutindu mono lenda zaba kana muntu kutendudila mono ve?” Yo yina, Filipo tendudilaka yandi mambu yina yandi vandaka kutanga.​—Bisalu 8:27-35.

MUTINDU BANTU KE BAKAKA LUSADISU BUBU YAI

Bonso balongi ya Biblia ya ntangu ya ntama, bubu yai Bambangi ya Yehowa ke salaka kisalu ya kulonga bantu na bansi 239. (Matayo 28:19, 20) Konso mposo, Bambangi ya Yehowa ke sadisaka bantu kuluta bamilio uvwa na kubakisa Biblia. Mingi na kati ya bantu yango me yelaka ve na mabuta ya Bakristu. Bo ke longukaka ti bantu ya ofele, mpi yo lenda vanda na nzo na nge to na kisika ya nkaka ya nge me zola. Nkutu, bantu ya nkaka ke sepelaka kulonguka na nzila ya telefone to ya Internet.

Beto ke lomba nge na kusolula ti Mbangi mosi ya Yehowa sambu yandi zabisa nge mutindu nge lenda baka mambote kana nge longuka Biblia. Na kisika ya kumona nde Biblia kele mukanda mosi ya bantu lenda bakisa ve, nge ta mona nde yo kele mfunu “sambu na kulonga, sambu na kunganina, sambu na kusungika mambu, sambu na kupesa ndola na lunungu” na mpila nde nge ‘vanda ya kukuka kibeni mpi ya kufwana kibeni sambu na konso kisalu ya mbote.’​—2 Timoteo 3:16, 17.