BAMVUTU NA BANGIUFULA YA BIBLIA
Keti beto lenda zaba kieleka ya me tala Nzambi?
Sambu na nki Nzambi ke zola nde beto zaba kieleka? Tanga Yoane 17:3
Nzambi solulaka ti bantu. Yandi sadilaka mpeve santu to ngolo na yandi sambu na kukotisa bangindu na yandi na mabanza ya bansoniki ya Biblia. (2 Piere 1:20, 21) Beto lenda zaba kieleka ya me tala Nzambi kana beto ke tanga Biblia.—Tanga Yoane 17:17; 2 Timoteo 3:16.
Na Biblia, Nzambi ke tubaka mambu mingi ya me tala yandi. Yandi ke zabisaka beto kikuma yina yandi me gangaka bantu, mambu ya yandi ta sala sambu na bo mpi mutindu yandi ke zolaka nde bantu kuzinga. (Bisalu 17:24-27) Yehowa Nzambi ke zolaka nde beto zaba kieleka ya me tala yandi.—Tanga 1 Timoteo 2:3, 4.
Sambu na nki Nzambi ke sepelaka ti bantu yina ke zolaka kieleka?
Yehowa kele Nzambi ya ke tubaka kieleka. Yo yina yandi tindaka mwana na yandi Yezu sambu na kulonga bantu kieleka. Yezu ke sepelaka ti bantu yina ke zolaka kieleka. (Yoane 18:37) Nzambi ke zola nde bantu ya mutindu yai kusambila yandi.—Tanga Yoane 4:23, 24.
Satana Diabulu me panzaka malongi mingi ya luvunu ya me tala Nzambi sambu na kukanga bantu nzila ya kuzaba Nzambi. (2 Bakorinto 4:3, 4) Bantu yina ke zolaka ve mambu ya mbote ke sepelaka ti malongi ya luvunu. (Baroma 1:25) Bantu mingi ya ntima-masonga ke tangaka Biblia sambu na kuzaba kieleka ya me tala Nzambi.—Tanga Bisalu 17:11.