Inki Mambu Biblia Ke Tubaka?

Diabulu kele nani to kele inki?

NGE TA TUBA nde Diabulu kele . . .

• Kigangwa mosi ya kimpeve?

• Mbi ya kele na kati ya muntu?

• Kima mosi ya bantu ke yindulaka?

MAMBU YINA BIBLIA KE TUBAKA

Diabulu solulaka ti Yezu mpi ‘mekaka’ yandi. (Matayo 4:1-4) Yo yina, Diabulu kele ve kima mosi ya bantu ke yindulaka. Yo kele mpi ve mbi mosi na kati ya muntu. Kansi, yandi kele kigangwa mosi ya mbi ya kimpeve.

INKI MAMBU YA NKAKA BETO LENDA LONGUKA NA BIBLIA?

• Na luyantiku, Diabulu vandaka wanzio mosi ya santu, kansi “yandi kangamaka ve ngolo na kieleka.” (Yoane 8:44) Yandi kumaka muntu ya luvunu mpi kolamaka na Nzambi.

• Bawanzio ya nkaka landaka Satana.—Kusonga 12:9.

• Diabulu ke fwaka meso ya bantu mingi sambu bo zaba ve nde yandi kele.—2 Bakorinto 4:4.

Keti Diabulu lenda twadisa luzingu ya bantu?

BANTU YA NKAKA KE TUBAKA nde yo kele luvunu na kutuba nde Diabulu ke twadisaka luzingu ya bantu, kansi bankaka ke waka boma nde bampeve ya mbi lenda kotila bo. Nge ke yindula nki?

MAMBU YINA BIBLIA KE TUBAKA

“Nsi-ntoto ya mvimba kele na nsi ya kiyeka ya muntu ya mbi.” (1 Yoane 5:19) Diabulu ke vandaka ti bupusi ya ngolo na bantu kansi yandi lenda twadisa ve bantu yonso.

INKI MAMBU YA NKAKA BETO LENDA LONGUKA NA BIBLIA?

• Diabulu ke sadilaka luvunu sambu yandi vanda ti bupusi mingi na bantu.—2 Bakorinto 11:14.

• Na bantangu ya nkaka, bampeve ya mbi lenda twadisa bantu.—Matayo 12:22.

• Nzambi lenda sadisa nge na ‘kuvanda mbeni ya Diabulu.’—Yakobo 4:7.