Bangiufula ya Batangi
Sambu na nki mambu ya lubutuku mpi kileke ya Yezu yina Matayo sonikaka me swaswana ti ya Luka?
Disolo ya Matayo ke tubila mingi luzingu ya Yozefi. Yo ke monisa mambu yina Yozefi tubaka ntangu yandi zabaka nde Maria kele ti divumu, yo ke tubila mpi ndosi yina Yozefi monaka wanzio ke tendudila yandi divumu ya Maria, mpi mutindu Yozefi lemfukaka na mambu yina wanzio zabisaka yandi. (Matayo 1:19-25) Diaka, yo ke tubila mutindu wanzio songaka Yozefi na ndosi na kutina na Ezipte ti dibuta na yandi mpi mutindu Yozefi lemfukaka. Matayo ke tuba diaka nde Yozefi monaka wanzio mosi na ndosi ke zabisa yandi na kuvutuka na Izraele, mutindu Yozefi vutukaka mpi kwendaka kuzinga ti dibuta na yandi na Nazareti. (Matayo 2:13, 14, 19-23) Na kapu ya ntete mpi ya zole, Matayo me tanga zina ya Yozefi mbala nana, kansi ya Maria mbala iya mpamba.
Kansi Luka ke tubila mingi-mingi Maria. Yandi ke tubila mutindu wanzio Gabriele monanaka na Maria, mutindu Maria kwendaka kutala mpangi na yandi Elizabeti mpi mutindu Maria kumisaka Yehowa. (Luka 1:26-56) Luka ke tubila mpi mambu yina Simeoni zabisaka Maria sambu na bampasi yina ta kumina Yezu. Na nima, yandi tubilaka mutindu Yezu kwendaka na tempelo ti bibuti na yandi ntangu yandi vandaka ti bamvula 12. Ata na disolo yai, Luka ke tuba kaka mambu yina Maria tubaka kansi ya Yozefi ve, yandi ke tuba nde Maria tulaka dikebi mingi na mambu yina salamaka. (Luka 2:19, 34, 35, 48, 51) Na kapu ya ntete mpi ya zole, Luka me tanga zina ya Maria mbala 12, kansi ya Yozefi mbala 3 mpamba. Matayo tubilaka mingi mambu yina Yozefi tubaka mpi salaka. Luka tubilaka mingi-mingi mambu ya Maria.
Diaka, mukanda ya Matayo mpi ya Luka me tubila ve ndonga ya bantu ya dikanda ya Yezu kiteso mosi. Matayo me tubila ndonga ya bantu ya dikanda ya Yozefi, mpi nswa yina mwana yina Yozefi sansaka kele ti yo na kimfumu ya Davidi. Sambu na nki? Sambu Yozefi butukaka na ndonga ya bantekolo ya Salomo mwana ya Davidi. (Matayo 1:6, 16) Kansi, Luka tubilaka ndonga ya bantu ya dikanda ya Maria mpi monisaka nde Yezu kele ti nswa ya kubutuka na kimfumu ya Davidi. (Baroma 1:3) Sambu na nki? Sambu Maria vandaka ntekolo ya Natani, mwana ya Davidi. (Luka 3:31) Tata ya maria kele Eli, kansi sambu na nki Luka tubaka ve nde Maria kele mwana ya Eli? Sambu mikanda ya leta vandaka kutubila mingi kaka babakala. Ntangu Luka tangaka ndonga ya bantu ya dikanda ya Yozefi mpi tubaka nde Yozefi kele mwana ya Eli, bantu bakisaka mbote nde Yozefi vandaka bokilo ya Eli.—Luka 3:23.
Ndonga ya bantu ya dikanda ya Yezu na mukanda ya Matayo mpi ya Luka ke monisa nde Yezu kele Mesia yina Nzambi silaka. Bantu zabaka nde Yezu vandaka ntekolo ya ntotila Davidi, nkutu Bafarize mpi Basaduse vandaka kundima yo. Ndonga ya bantu ya dikanda ya Yezu yina Matayo mpi Luka tubilaka ke kumisa lukwikilu na beto ngolo, yo ke ndimisa beto nde balusilu yonso ya Nzambi ta lungana.