3 Lusadisu Sambu na Kunwana ti Bampasi

Bubu yai kele ti bampasi yina nge lenda tina ve mpi yina nge lenda manisa ve. Mu mbandu, kana nge me fwisa muntu yina nge ke zolaka to kana nge ke belaka maladi yina ke manaka ve, kima ya nge fwete sala kele kaka kusosa mutindu ya kunwana ti yo. Keti Biblia lenda sadisa nge na mambu ya mutindu yai?

MALADI YINA KE MANAKA VE

Rose ke tuba nde: “Mono ke belaka maladi mosi ya ke vandaka na kati ya baselile mpi yo ke landaka kupesa mono mpasi mingi. Yo me bebisaka luzingu na mono.” Diambu yina vandaka kibeni kuyangisa yandi kele nde bantangu ya nkaka yandi vandaka ve kukuka kulonguka Biblia mpi kusala mambu ya kimpeve. Kansi mambu yina Yezu tubaka na Matayo 19:26 sadisaka yandi mingi: “Nzambi lenda sala mambu yonso.” Rose longukaka nde kele ti mitindu mingi ya kulonguka. Sambu bantangu ya nkaka maladi na yandi vandaka kusala nde yandi kuka kibeni ve kutanga, yandi kumaka kuwidikila masolo ya Biblia mpi ya mikanda na beto yina bo me kotisaka ndinga.a Yandi ke tuba nde: “Kana mambu yai vandaka ve, mono me zaba ve mutindu mono zolaka kutanina kinduku na mono ti Nzambi.”

Ntangu Rose ke vandaka na mawa sambu yandi ke kukaka ve kusala mambu yina yandi vandaka kusala ntete, yandi ke bakaka kikesa na mambu yina kele na 2 Bakorinto 8:12: “Kana luzolo ya mbote kele ntete, Nzambi ke ndimaka yo mingi-mingi na kutadila yina muntu kele na yo, kansi ve na kutadila yina muntu kele na yo ve.” Mambu yai ke yibusaka Rose nde Nzambi ke sepelaka ti mambu yina yandi ke salaka, sambu yandi ke salaka yonso yina yandi lenda sala na kutadila ngolo na yandi.

MPASI YA LUFWA

Delphine, yina beto tubilaka dezia, ke yibuka nde: “Ntangu mwana na mono ya nkento ya bamvula 18 fwaka, mono waka mpasi ya ngolo yo yina mono vandaka kibeni ve kundima nde mono ta kuka kulanda kuzinga. Mambu ta vanda diaka ve mutindu mosi.” Ata mpidina, yandi zwaka kikesa ya mingi na mambu yina muyimbi-bankunga songaka Nzambi na Nkunga 94:19: “Ntangu basusi lutilaka mono, nge pesaka mono kikesa mpi nge lembikaka mono.” Delphine ke tuba nde: “Mono sambaka Yehowa sambu yandi sadisa mono na kuzaba mambu ya kusala yina ta lembika mpasi na mono.”

Delphine kudipesaka na luzolo yonso na kusadisa bantu. Na nima, yandi kumaka kudifwanisa ti crayon yina bana ke sadilaka; ata ba crayon yina kele ya kubukana ke vandaka mfunu sambu na kutula ba kulere. Mutindu mosi, ata yandi vandaka na mpasi, yandi bakisaka nde yandi lendaka kaka kusadisa bantu ya nkaka. Yandi ke tuba nde: “Mono bakisaka na mbala mosi nde ntangu mono vandaka kusadila minsiku mpi baverse ya Biblia sambu na kupesa balongoki na mono ya Biblia kikesa, yo vandaka mutindu yina Yehowa vandaka kulembika mpi kupesa mono kikesa.” Yandi sonikaka bazina ya bantu yonso yina Biblia ke tubilaka yina kutanaka ti bampasi ya lufwa. Yandi bakisaka nde: “Bantu yina yonso kudipesaka na kusamba.” Diaka, yandi bakisaka nde “nge lenda kanga ntima na bampasi kaka kana nge ke tanga Biblia.”

Kulonguka Biblia me longaka Delphine mambu ya nkaka—kutula dikebi na bilumbu ke kwisa, kansi ve na mambu ya ntama. Kivuvu yina kele na Bisalu 24:15 ke pesaka yandi kikesa: “Bantu ya lunungu ti bantu ya kukonda lunungu ta futumuka.” Inki ke ndimisaka yandi nde Yehowa ta futumuna mwana na yandi? Delphine ke tuba nde: “Mono ke monaka na mabanza mwana na mono na bilumbu ke kwisa. Mono ke vandaka ti kivuvu nde mono ta mona yandi diaka na ntangu yina Yehowa me yidikaka. Mono ke kudimonaka ti yandi na kilanga na beto kaka mutindu mono vandaka kumona mpi kuzola yandi kilumbu yina yandi butukaka.”

a Bandinga mingi yina bo me kotisaka kele na site internet jw.org.

Biblia lenda sadisa nge na kuzwa lusadisu ata na bantangu ya mpasi ya ngolo

INKI MUTINDU NZAMBI LENDA SADISA BETO?

Biblia ke pesa mvutu ya pwelele. Yo ke tuba nde: “Yehowa kele pene-pene ya bantu yonso yina ke bingaka yandi, ya bantu yonso yina ke bingaka yandi na kieleka. Yandi ke lungisaka nzala ya bantu yina ke waka yandi boma; yandi ke waka kudila na bo sambu na kulomba lusadisu, mpi yandi ke gulusaka bo.” (Nkunga 145:18, 19) Keti yo ke pesa ve kikesa? Ebuna nki mutindu Nzambi ke waka bisambu ya bantu yina ke sosaka na masonga yonso lutwadisu na yandi?

YANDI KE PESAKA BETO NGOLO:

Mbala mingi bampasi lenda lembisa beto mpi kumanisa beto ngolo na nitu, na mabanza mpi na kimpeve. (Bingana 24:10) Kansi Yehowa ke “pesaka ngolo na muntu yina me lemba mpi ngolo ya mingi na bantu yina me konda kikesa.” (Yezaya 40:29) Ntumwa Polo yina kangaka ntima na bampasi ya ngolo tubaka nde: “Sambu na mambu yonso, mono kele ti ngolo na nzila ya muntu yina ke pesaka mono ngolo.” (Bafilipi 4:13) Mpeve santu ya Nzambi pesaka Polo ngolo. Nge lenda lomba mpi Nzambi na kupesa nge mpeve santu.—Luka 11:13.

YANDI KE PESAKA BETO MAYELE:

Ebuna kana nge kele na mfunu ya lusadisu sambu na kubakisa mpi kusadila bandongisila ya Biblia? Longoki Yakobo sonikaka nde: “Kana muntu mosi na kati na beno me konda mayele, bika yandi landa kulomba na Nzambi, sambu yandi ke kabaka mingi na bantu yonso mpi kukonda kunganina, mpi Nzambi ta pesa yandi yo.” (Yakobo 1:5) Nge lenda sala na kuwakana ti bisambu na nge kana nge ke tanga Biblia mpi ke sadila malongi na yo. (Yakobo 1:23-25) Kana nge ke sala mutindu yai, nge ta longuka nge mosi nde bandongisila na yo ke vandaka mbote.

YANDI KE PESAKA BETO NGEMBA:

Ata ntangu nge ke kudiyangisa mingi, Yehowa lenda sadisa nge na kuvanda na ngemba. Ndinga na yandi ke tuba nde: “Beno kudiyangisa ve sambu na konso kima yina, kansi na mambu yonso na nzila ya kisambu mpi ntangu beno ke bondila ti kupesa matondo, beno zabisa Nzambi mambu ya beno ke lomba; ebuna ngemba ya Nzambi yina me luta mayele yonso ya kubakisa mambu ta tanina bantima na beno mpi mabanza na beno na nzila ya Kristu Yezu.” (Bafilipi 4:6, 7) Sambu na nki ve kulomba Yehowa na kupesa nge ngemba?

Ebuna kana bampasi na nge ke mana nswalu ve? Kutuba ve nde Yehowa me yambula nge. Ata bampasi na nge ke baka ntangu mingi, Nzambi lenda pesa nge kikesa mpi ngolo ya kukanga ntima. (1 Bakorinto 10:13) Diaka, Biblia ke sila nde kilumbu kele bampasi na beto ta mana kimakulu!