Inki Mambote Kisambu Lenda Natila Nge?

Kana nge ke zola kusala kima mosi, nge ke kudiyulaka nde: ‘Inki mambote yo ta natila mono?’ Keti yo kele mbi na kuyula ngiufula ya mutindu yai sambu na kisambu? Mpenza ve. Beto ke sosaka kuzaba kana kisambu lenda natila beto mambote. Nkutu, Yobi muntu ya mbote yulaka nde: ‘Kana mono binga yandi, keti yandi ta ndima?’​—Yobi 9:16.

Na masolo ya me luta, beto me mona nde kisambu ke tendula mambu mingi. Yo kele kaka ve kima yina mabundu ke salaka mbala na mbala to kima mosi ya ke belulaka mabanza ya muntu. Nzambi ya kieleka ke waka mpenza bisambu na beto. Kana beto ke samba na mutindu ya mbote mpi ke lomba yandi mambu ya ke wakana ti luzolo na yandi, yandi ta wa bisambu na beto. Nkutu, yandi ke lomba beto na kukwenda pene-pene na yandi. (Yakobo 4:8) Inki mambote beto lenda baka kana beto ke samba konso kilumbu? Beto tadila mambote ya beto lenda baka.

Ngemba ya mabanza.

Ntangu nge ke kutanaka ti bampasi, keti nge ke monaka nde mambu me lutila nge? Na bantangu ya mutindu yai, Biblia ke siamisa beto na ‘kusamba ntangu yonso’ mpi na ‘kuzabisa balombilu na beto na Nzambi.’ (1 Batesalonika 5:17; Bafilipi 4:6) Biblia ke zabisa beto nde kana beto samba Nzambi, “ngemba ya Nzambi yina me luta mambu yonso yina bantu lenda bakisa ta tanina bantima na [beto] mpi mabanza na [beto].” (Bafilipi 4:7) Beto lenda vanda na ngemba kana beto ke zabisa Tata na beto ya zulu bampasi na beto. Yo yina, Nzambi ke siamisa beto na kuzabisa yandi bampasi na beto. Nkunga 55:23 ke tuba nde: “Bikila Mfumu Nzambi kilo na nge, yandi ta sadisa nge.”

Kisambu me sadisaka bantu mingi na ntoto ya mvimba na kuvanda na ngemba ya mabanza. Hee Ran, muntu mosi ya Corée du Sud, ke tuba nde: “Kana mono me samba sambu na bampasi ya ngolo ya mono ke kutana ti yo, mono ke waka bonso nde bo me katula mono kizitu mpi mono ke bakaka ngolo ya kukanga ntima.” Cecilia, nkento mosi ya ke zingaka na Philippines, ke tuba nde: “Mutindu mono kele mama ya dibuta, mono ke kudiyangisaka mingi sambu na bana na mono ya bankento mpi sambu na mama na mono ya ke kukaka diaka ve kuzaba mono. Kisambu ke sadisaka mono na kuvanda ve ti basusi mingi. Mono ke zabaka nde Yehowa ta sadisa mono na kulungisa bampusa na bo.”

Ngolo mpi kikesa na ntangu ya mpasi.

Keti nge ke niokwama ngolo na mabanza, mu mbandu nge ke kutana ti bampasi ya ngolo to diambu mosi ya ke tula luzingu na nge na kigonsa? Kusamba “Nzambi ya ndembikilu yonso” lenda sadisa nge mingi. Biblia ke tuba nde Nzambi “ke lembikaka beto na bampasi na beto yonso.” (2 Bakorinto 1:3, 4) Mu mbandu, ntangu Yezu vandaka kudiyangisa mingi, ‘yandi fukamaka mpi yantikaka kusamba.’ Inki mambote yandi bakaka? Biblia ke tuba nde: “Wanzio mosi yina katukaka na zulu monanaka na yandi mpi pesaka yandi kikesa.” (Luka 22:41, 43) Nehemia, muntu ya nkaka ya kwikama, niokwamaka na mabanza sambu bantu ya mbi sosaka kukanga yandi nzila ya kusala kisalu ya Nzambi. Yandi sambaka nde: “Ntangu yai Nzambi, pesa mono ngolo.” Mambu yina salamaka na nima monisaka nde Nzambi sadisaka yandi kibeni na kuwa diaka ve boma mpi na kusala kisalu na yandi. (Nehemia 6:9-16) Reginald, muntu mosi ya ke zingaka na Ghana, ke tuba mutindu kisambu ke sadisaka yandi: “Ntangu mono ke sambaka, mingi-mingi na bantangu ya mpasi, mono ke kudiwaka nde mono me zabisa bampasi na mono na muntu ya me fwana na kusadisa mono mpi ya ke zabisa mono nde mono kele ve na mfunu ya kuwa boma.” Ya kieleka, Nzambi ke sadisaka beto ntangu beto ke sambaka yandi.

Mayele ya ke katukaka na Nzambi.

Badesizio ya nkaka ya beto ke bakaka lenda vanda ti bupusi na luzingu na beto mpi na luzingu ya bantu ya beto ke zolaka. Inki mutindu beto lenda baka badesizio ya mbote? Biblia ke tuba nde: “Kana muntu mosi na kati na beno me konda mayele [mingi-mingi na ntangu ya mpasi], bika nde yandi landa kulomba yo na Nzambi, sambu yandi ke pesaka na bantu yonso na ntima ya mvimba mpi kukonda kunganina; ebuna Nzambi ta pesa yandi yo.” (Yakobo 1:5) Kana beto ke samba Nzambi sambu na kulomba mayele, yandi lenda twadisa beto na kubaka badesizio ya mbote na nsadisa ya mpeve santu na yandi. Beto lenda lomba mpeve santu sambu Yezu zabisaka balongoki na yandi nde: “Tata yina kele na zulu ta pesa mpeve santu na bantu yina ke lombaka yandi yo!”​—Luka 11:13.

Yezu vandaka kumona nde kulomba Tata na yandi lusadisu vandaka mfunu na ntwala ya kubaka badesizio ya nene. Biblia ke zabisa beto nde na ntwala ya kupona bantumwa 12, “yandi lutisaka mpimpa ya mvimba na kusamba Nzambi.”​—Luka 6:12.

Bonso Yezu, bantu mingi bubu yai ke tudilaka Nzambi ntima ntangu bo me monaka mutindu yandi me sadisaka bo na kubaka badesizio ya mbote. Regina, nkento mosi ya ke zingaka na Philippines, ke tubila bampasi yina yandi kutanaka na yo. Mu mbandu, yandi vandaka kukuka ve kulungisa bampusa na yandi mpi ya dibuta na yandi ntangu bakala na yandi fwaka. Yandi vandaka diaka ve ti kisalu mpi vandaka kuniokwama sambu na kusansa bana na yandi. Inki sadisaka yandi na kubaka badesizio ya mbote? Yandi ke tuba nde: “Yehowa vandaka kusadisa mono na nzila ya kisambu.” Kwabena, muntu mosi ya ke zingaka na Ghana, ke monisa kikuma yina yandi lombaka lusadisu ya Nzambi: “Bo katulaka mono na kisalu ya kutunga yina bo vandaka kufuta mono mbongo mingi.” Sambu na bisalu yina vandaka kumonana, yandi ke tuba nde: “Mono vandaka kusamba Yehowa ntangu yonso sambu yandi sadisa mono na kubaka badesizio ya mbote.” Yandi ke yika nde: “Mono monaka nde Yehowa sadisaka mono na kupona kisalu yina ke pesaka mono nzila ya kulungisa bampusa na mono ya kinsuni mpi ya kimpeve.” Nzambi lenda twadisa nge kana nge ke samba sambu na mambu yina lenda vanda ti bupusi na bangwisana na nge ti yandi.

Beto me tubila mambote yina kisambu lenda natila nge. (Sambu na bambandu ya nkaka, tala lupangu “Mambote ya Kisambu.”) Kansi, sambu nge baka mambote yai, nge fwete zaba ntete Nzambi mpi luzolo na yandi. Kana nge ke zola kusala mambu yai, beto ke siamisa nge na kulonguka Bibliaa ti Bambangi ya Yehowa. Yai diambu ya ntete ya nge lenda sala sambu na kukwenda pene-pene ya Muntu yina “ke ndimaka bisambu.”​—Nkunga 65:3.