“Inki Mvutu Nge Tapesa?”

1. Inki mpasi bantu mingi na kati na beto kekutanaka ti yo?

¹ Keti nge kezolaka Ndinga ya Nzambi kansi nge kekukaka ve kuyibuka mambu ya fyotifyoti ya bo ketubilaka na masolo ya Biblia to kisika bo mesonikaka mambu ya sikisiki na Masonuku? Keti nge kezolaka nde bana na nge kubaka nzayilu ya sikisiki ya mambu ya kyeleka yina Biblia ketubilaka mpi ya malongi na yo ya mfunu? Disolo “Inki Mvutu Nge Tapesa?” ya kebasikaka konso ngonda na lutiti 31 ya Réveillez-vous! lenda sadisa baleke ti bambuta na kuzaba Ndinga ya Nzambi mbote.​—⁠Bis. 17:⁠11.

2. Inki mutindu beto lenda sadila bitini ya kuswaswana ya disolo “Inki Mvutu Nge Tapesa?”

² Inki mutindu nge lenda sadila mbote kibeni disolo yai? Réveillez-vous! ya Yanuari 2006, kupesaka bangindu yai: “Baka mwa ntangu ya kutala lutiti 31 . . . Bitini yankaka ya lutiti yina tasepedisa baleke; yankaka tayangisa mabanza ya bantu yina kelongukaka Biblia banda ntama. Kitini, ‘Inki Ntangu na Disolo ya Bantu?’ tasadisa nge na kutenda nzila ya kele ti bamvula ya kemonisa ntangu yina bantu ya Biblia ketubilaka kuzingaka mpi ntangu yina mambu ya mfunu kusalamaka. Nge takuta bamvutu na kitini ‘Na Nimero Yai’ na kati ya zulunalu, kansi bamvutu ya bangyufula mingi yankaka tamonana na lutiti mosi ya bo meponaka dezia na nimero yina mosi, kisika bo menyema yo na nsi mpi na mutindu ya kubaluka. Sambu na nki ve kusala mwa bansosa na ntwala ya kutanga bamvutu yina mpi na nima kuzabisa bankaka mambu yina nge melonguka? Nge lenda sadila nkutu disolo yai ya mpa, ‘Inki Mvutu Nge Tapesa?’ sambu na masolo na dibuta to ti bampangi yankaka.”

3. Inki mutindu mabuta yankaka mebakaka mambote ya disolo yai, mpi nki bitini kesepedisaka nge mingi?

³ Ya kyeleka, mabuta mingi kesepelaka kusadila disolo yai na kulonguka na bo ya dibuta. Mama mosi kusonikaka nde: “Munu ti bakala na munu, beto yindulaka nde yo tavanda mbote na kukotisa disolo ‘Bana Kesosa Kifwanisu’ na kulonguka na beto ya dibuta sambu yo sepedisa mpi yo simba dikebi ya mwana na beto ya nkento ya bamvula tatu. Beto kesepelaka kutala yandi kebaka na kyese yonso kopi na yandi ya Réveillez-vous! mpi kekangula lutiti mosi-mosi tii kuna yandi tazwa kifwanisu yina yandi kesosa.” Tata mosi na Brésil kutubaka nde: “Munu ti mwana na munu ya bamvula nsambwadi, beto kezolaka mingi kibeni disolo yai ya Réveillez-vous! Yo mesadisaka Moize na kutula dikebi, na kuzwa baverse ya Biblia, na kubakisa ntendula ya bifwanisu, mpi na kuzaba badati.” Ashley ya kele ti bamvula nana, kusonikaka nde: “Mersi na beno sambu na disolo ‘Inki Mvutu Nge Tapesa?’ ya kele na nsuka ya Réveillez-vous! Mu kelongukaka mambu mingi ya mekatuka na Biblia na nsadisa na yo.”

⁴ Sambu na nki ve kusadila “Inki Mvutu Nge Tapesa?” mbala na mbala na kulonguka na beno ya dibuta? Beno lenda sadila Index to Watchtower Library na CD-ROM sambu na kusosa bamvutu na bangyufula yankaka ya kuluta mpasi. Kana beno kesala mpidina, beno talonga bana na beno mutindu ya kusala bansosa. Kana bana na beno meyelaka, sambu na nki ve kulomba bo na kusala kisalu ya ngolo ya kusosa bamvutu na kitini “Munu Kele Nani?” to “Inki Ntangu na Disolo ya Bantu?” na ntwala ya kulonguka ya dibuta? Na nima, bo lenda zabisa beno bamvutu ya bo zwaka na bansosa na bo na ntangu beno talonguka. Kusadila lutiti yai mbote-mbote kele mutindu mosi yina bibuti lenda kotisa Ndinga ya Nzambi na bana na bo, mpi kusadisa bo na kuzaba “Mukanda ya Nzambi” banda na bumwana.​—⁠2 Tim. 3:15; Kul. 6:⁠7.

4. Inki mutindu dibuta lenda sadila kitini yai na kulonguka na bo ya dibuta?