Ntangu Bantu Kevandaka Ve na Nzo
1. Inki dyambu ya mpasi beto kekutanaka ti yo mingi ntangu beto kesalaka kisalu ya kusamuna kyelo na kyelo?
1 Na bisika mingi, yo kekuma mpasi na kukuta bantu na banzo. Na bantangu yai ya “mpasi mingi,” bantu mingi fwete sala bangunga mingi na kisalu sambu na kuzwa bima ya kuzingila. (2 Tim. 3:1) Bankaka lenda vanda ve na banzo sambu bo mekwenda kusumba bima na bamagazini, to kusala bansaka. Inki mutindu beto lenda kutana ti bantu yai sambu na kuzabisa bo nsangu ya mbote?
2. Inki mutindu beto lenda zikisa nde beto talanda kutula dikebi na bantu yina beto takuta ve na nzo?
2 Baka Banoti ya Mbote: Kima ya ntete ya kusala kele kusonika adresi ya bantu yina beto mekuta ve na nzo. Yo kele mfunu mingimingi kana beno kesamunaka mbala na mbala na teritware na beno. Keti nge kesonikaka zina ya balabala, nimero ya teritware, zina na nge, mpi dati ya nge mesala teritware? Nge lenda bika kisika sambu na kuyika banoti yankaka ntangu nge to nsamuni yankaka tavutuka kusamuna na banzo yina beno kutaka ve bantu. Kana nge manisa kusamuna, kuvila ve na kupesa banoti ya nge bakaka na nsamuni yina kele na karti ya teritware yina, kansi nge lenda bikala ti yo kana yandi ndima nde nge vutukila banzo yina nge kutaka ve bantu. Sadila formilere yankaka sambu na kusonika bazina ya bantu yina kumonisaka mpusa mpi yina nge tavutukila.
3. Inki kele mwa bangindu ya lenda sadisa beto na kukutana ti bantu yina kele ve na nzo?
3 Meka na Kuvutuka na Ntangu Yankaka: Mbala yankaka, bantu yina kuvandaka ve na nzo na kilumbu mosi ya mposo tavanda na nzo na nkokila to na bawikendi. Keti nge lenda yidika manaka na nge sambu na kuvutukila bo na ntangu mosi ya kuluta mbote? (1 Kor. 10:24) Kana ve, nge lenda pesa ba adresi ya bantu yina nge kutaka ve na nzo na nsamuni mosi yina lenda vutukila bo na ntangu yankaka. To nge lenda sonikila bantu yina nge kutaka ve na nzo mukanda. Bansamuni yina mavimpi na bo kepesaka bo ve nzila ya kusamuna kyelo na kyelo lenda vanda na kyese ya kusadisa nge na kusonikila bantu yina mikanda.
4. Inki mbandu kemonisa mfunu ya kuvutukilaka bantu yina beto kekutaka ve na banzo?
4 Mbandu mosi kemonisa mfunu ya kumeka kukutana ti bantu yina kevandaka ve na nzo. Na nima ya kukwenda mbala na mbala na nzo mosi na nsungi ya bamvula tatu, nsukansuka bansamuni kukutanaka ti nkento mosi. Nkento yango kuzabisaka bo nde na nsungi yina yonso, yandi vandaka kukinga Bambangi ya Yehowa sambu yandi vutukila kulonguka na yandi ya yandi vandaka kusala na ntwala ya kukwisa kuzinga na kisika yina.
5. Inki ntangu beto lenda tuba nde teritware memana?
5 Manisa Teritware: Inki ntangu beto lenda tuba nde teritware memana? Mbala mingi, yo kevandaka ntangu nsamuni kesalaka mpenza bikesa sambu na kukutana ata ti muntu mosi na konso nzo. Yo lenda vanda mbote na kubika trakiti to periodike mosi ya ntama na banzo yina beno kekuta ve bantu na kisika yina bantu ya keluta lenda mona ve, mingimingi na bateritware yina beno kesalaka ve mbala na mbala. Beno fwete manisa na kusala teritware yonso na nsungi ya bangonda iya. Na nima, nsamuni fwete pesa yo na nsadi na teritware sambu yandi kusala bansoba ya mefwana na bansangu ya metala bateritware yina yandi kele na yo.
6. Sambu na nki beto fwete sala kikesa sambu na kuzabisa konso muntu ya teritware na beto nsangu ya mbote?
6 Beto kezola nde bantu mingi kibeni kuzwa dibaku ya kulonguka na kusamba zina ya Yehowa sambu na kuguluka. (Roma 10:13, 14) Na kati ya bantu yai, beto lenda tanga mpi bantu yina kevandaka ve na banzo na bo ntangu beto kesamunaka nzo na nzo. Bonso ntumwa Polo, vanda ti mpusa ya kuta kimbangi ya “nsangu ya mbote” ya mambote ya Nzambi ya bantu mefwana ve na kubaka.—Bis. 20:24.