“Keti Nge Lenda Baka Mambote ya Kuvanda ti Teritware na Nge Mosi?”
1. Teritware na nge mosi kele inki?
1 Teritware na nge mosi kele inki? Mabundu yina ke vandaka ti teritware ya nene ke sadilaka ngidika yai. Yo kele teritware na nge, ziku yina kele pene-pene ya nzo na nge. Mukanda Beto Mevukana, na lutiti 103, ke tuba nde: “Kuvanda ti teritware yina ke na kisika ya mbote ta sadisa nge na kusadila mbote ntangu yina nge lenda lutisa na kisalu ya bilanga. Diaka, nge lenda lomba nsamuni yankaka na kusala ti nge na teritware na nge.”
2. Inki mutindu beto lenda sadila teritware na beto mosi, katula kuta kimbangi na kimvuka?
2 Na Zulu ya Ngidika ya Kuta Kimbangi na Kimvuka: Kana nge baka teritware na nge mosi pene-pene ya kisika nge ke salaka, nge lenda samuna na ntangu beno ke pemaka sambu na kudia to na ntwala ya kuvutuka na nzo; ziku nge lenda samuna ti nsamuni ya nkaka ya ke salaka pene-pene ti nge. Kana nge baka teritware pene-pene ya nzo na nge, nge ti dibuta na nge lenda sadila yo mbote-mbote sambu na kuta kimbangi na nkokila. Kansi, kana nge ta kwenda ve na lukutakanu sambu na kisalu ya bilanga, yo kele mbote na kulomba lutwadisu ya Yehowa na kisambu na ntwala ya kuyantika kusamuna. (Bafi. 4:6) Diaka, nge fwete yidika mbote-mbote ntangu yina nge ke lutisa na teritware na nge mosi mpi ntangu yina nge ke sadila sambu na kupesa maboko na bangidika ya dibundu, na yina me tala kuta kimbangi na kimvuka. Mingi-mingi na bawikendi, ntangu bansamuni mingi ke vukana na lukutakanu ya kisalu ya bilanga, yo kele mbote na kupesa maboko na kimvuka na beno.
3. Inki mambote beto ke bakaka kana beto kele ti teritware na beto mosi?
3 Mambote: Teritware na nge mosi ta sadisa nge na kusamuna ntangu yonso yina manaka na nge ke pesa nge nzila. Nge lenda lutisa ntangu ya mingi na kisalu ya kusamuna mpi kufiotuna ntangu ya kukwenda na teritware. Yo ke sadisaka ba nkaka na kuzwa ntangu ya kusala kisalu ya kimupasudi-nzila nsadisi to ya ntangu yonso. Sambu muntu yina me monisa mpusa kele ntama ve, yo ta vanda mpasi ve na kuvutukila yandi mpi kulonguka Biblia. Bansamuni mingi ke monaka nde kuta kimbangi na teritware na bo mosi ke sadisaka bo na kuzaba mbote-mbote bawi mpi kusadisa bawi na kutudila bo ntima, mingi-mingi kana bo ta sala teritware yina mbala mingi na ntwala ya kuvutula yo, mpidina bansamuni ya nkaka lenda lomba yo. Keti kusala na teritware na nge mosi ke sadisaka nge mpi dibuta na nge na kulungisa mbote-mbote kisalu na beno?—2 Tim. 4:5.