“Yandi Ke Pesaka Ngolo na Muntu Yina Me Lemba”
1 Beto yonso kelembaka mbala na mbala. Yo lenda vanda ve kaka sambu na kisalu ya beto kesalaka to bisalu yankaka ya ngolo, kansi mpi sambu na bampasi yina beto kekutana ti yo na ‘bilumbu yai ya mpasi mingi.’ (2 Tim. 3:1) Inki mutindu beto bansadi ya Yehowa kebakaka ngolo ya kimpeve yina beto kevandaka na yo mfunu sambu beto lemba ve na kisalu na beto ya kusamuna? Beto kebakaka ngolo yango na ntangu beto ketulaka ntima na muntu yina kele na ‘ngolo ya nene mpenza,’ Yehowa. (Yez. 40:26) Yandi mezaba bampusa na beto, mpi yandi kele na mpusa ya masonga ya kusadisa beto. (1 Pie. 5:7)
2 Bangidika ya Yehowa: Yehowa kepesaka beto ngolo na nzila ya mpeve santu na yandi, ngolo yina yandi sadilaka sambu na kuganga luyalanganu. Mpeve ya Nzambi ‘keyikaka beto dyaka ngolo’ kana beto melemba. (Yez. 40:31) Kudiyula nde: ‘Inki kuvandaka mbala ya nsuka ya mu lombaka mpeve santu sambu yo pesa munu ngolo ya kulungisa mikumba na munu ya Bukristu?’—Luka 11:11-13.
3 Kana beto ketanga Ndinga ya kupemama ya Nzambi mbala na mbala mpi keyindulula mambu ya beto ketanga, mpi kana beto kelonguka mbala na mbala mikanda na beto ya Bukristu sambu na kudya na kimpeve, beto tavanda bonso “nti yina ke menaka penepene na mwa-masa; yo ke butaka bambuma na yo konso mvula, matiti na yo mpi ke yumaka ve.”—Nk. 1:2, 3.
4 Yehowa kesadilaka mpi bampangi Bakristu, yina lenda ‘pesa beto kikesa mingi.’ (Kol. 4:10, 11) Bo kepesaka beto ngolo na balukutakanu ya dibundu na nzila ya masolo na bo, ya bakomantere, mpi ya badiskure ti badevware na bo ya ketungaka. (Bis. 15:32) Mingimingi bankuluntu kepesaka beto kikesa mpi lusadisu ya kimpeve.—Yez. 32:1, 2.
5 Kisalu ya Kusamuna: Kana nge kemona nde nge mekuma kulemba, kuyambula ve kusamuna! Na kuswaswana ti bisalu mingi yankaka, kusamuna mbala na mbala kepesaka beto kikesa. (Mat. 11:28-30) Kusamuna nsangu ya mbote kesadisaka beto na kutula dikebi na beto na Kimfumu ya Nzambi mpi na kuyindula ntangu yonso luzingu ya kukonda nsuka ti mambote yonso yina yo tanatila beto.
6 Beto kele ti kisalu mingi ya kusala na ntwala nde ngidika yai ya mbi kufwa. Beto kele ti bikuma mingi ya kubikala ngolo na kisalu na beto, mpi ya kutula ntima na “ngolo yina ya Nzambi ke pesaka.” (1 Pie. 4:11) Beto tamanisa kisalu na beto ti lusadisu ya Yehowa, sambu yandi “ke pesaka ngolo na muntu yina me lemba.”—Yez. 40:29.