“Kiese na Muntu Yina Kelanda Kukanga Ntima na Bampasi”
1 Bakristu yonso kekutanaka ti bampasi. (2 Tim. 3:12) Bampasi yango lenda vanda maladi, mpasi ya kuzwa mbongo, mpukumuna, minyokudi to bampasi ya mutindu yankaka. Lukanu ya bampasi yina Satana kenatilaka beto kevandaka ya kulembisa beto, ya kupusa beto na kutula ve dikebi na kisalu na beto ya Bukristu, to nkutu ya kukanga beto nzila sambu beto sadila dyaka ve Nzambi. (Yobi 1:9-11) Inki mutindu kukanga ntima na bampasi kesadisaka muntu na kuvanda na kyese?—2 Pie. 2:9.
2 Kudibongisa Sambu na Bampasi: Yehowa mepesaka beto Ndinga na yandi ya kyeleka. Na kati na yo, beto kele ti disolo ya luzingu mpi ya malongi ya Yezu. Kana beto kewa mambu ya Yezu kutubaka mpi kesadila yo, beto ketula fondasio ya ngolo mpi beto kekudiyidika sambu na bampasi. (Luka 6:47-49) Beto kebakaka mpi ngolo na bangidika yankaka, bonso bampangi na beto Bakristu, balukutakanu ya dibundu, mpi mikanda ya ketendulaka Biblia yina kimvuka ya mpika ya kwikama mpi ya mayele kebasisaka. Beto kesadilaka mpi mbala na mbala dikabu ya kisambu yina Nzambi mepesaka beto.—Mat. 6:13.
3 Yehowa mepesaka beto mpi kivuvu. Kana beto kuma ti lukwikilu ya ngolo na balusilu ya Yehowa, kivuvu na beto takuma “bonso kibende yina ke kangaka maswa.” Yo kepesaka kikesa ti “ngolo” na ntima. (Baeb. 6:19) Na ntangu ya ntama, maswa vandaka kukatuka ve na dibungu kukonda kibende ya bo kekangaka yo, ata na nsungi ya mbote. Mpidina, kana mupepe ya ngolo kuyantika na kintulumukina, kulosa kibende yango na masa vandaka kusadisa sambu maswa kukwenda kututana ve ti matadi. Mutindu mosi, kuyedisa lukwikilu na balusilu ya Nzambi ntangu yai takumisa kivuvu na beto ngolo kana beto kutana ti bampasi ya ngolo. Bampasi lenda basika na kintulumukina mpenza. Ata na luyantiku bantu ya Listre kusepelaka na kisalu ya kusamuna ya Polo ti Barnabasi, mambu kusobaka na kintulumukina na ntangu bambeni ya Bayuda kwisaka na bwala yina.—Bis. 14:8-19.
4 Kukanga Ntima Kenataka Kyese: Kulanda na kusala kisalu ya kusamuna na ntwala ya kimbeni kepesaka beto ngemba ya mabanza. Beto kevandaka na kyese ntangu Nzambi kemonaka nde beto mefwana na kumona nsoni sambu na Kristu. (Bis. 5:40, 41) Kukanga ntima na bampasi kesadisaka beto na kuyedisa mbotembote bikalulu yai: kudikulumusa, bulemfu, mpi kukanga ntima. (Kul. 8:16; Baeb. 5:8; Yak. 1:2, 3) Yo kelongaka beto na kutula ntima na Yehowa ti na balusilu na yandi, mpi na kukwenda kubumbana na yandi.—Bing. 18:10.
5 Beto mezaba nde bampasi kele sambu na mwa ntangu fyoti. (2 Kor. 4:17, 18) Bampasi kepesaka beto mabaku ya kumonisa zola yina beto kele na yo sambu na Yehowa. Kana beto kekanga ntima na bampasi, beto lenda pesa mvutu na mambu ya luvunu yina Satana kukusilaka Nzambi. Yo yina, beto keyambulaka ve. “Kiese na muntu yina [kelanda kukanga ntima na, NW] bampasi, sambu kana yandi me nunga kumeka yango imene, yandi ta baka moyo.”—Yak. 1:12.