Landa Mbandu Yina Yezu Kubikaka

1. Inki mbandu Yezu kubikaka?

¹ Na ntangu beto kesalaka kisalu ya kukumisa bantu balongoki, beto fwete vila ve nde mbandu na beto lenda vanda na bupusi na bantu yina ketalaka beto. Yezu kulongaka na bangogo mpi na bisalu. Bantu yina vandaka kutala yandi vandaka kumona kikesa na yandi, zola na yandi sambu na bantu, mpusa na yandi ya kukumisa ntete zina ya Tata na yandi, mpi lukanu na yandi ya kulungisa luzolo ya Tata na yandi.​—⁠1 Pie. 2:⁠21.

2. Na nki mitindu mbandu na beto lenda vanda na bupusi na bantu yina kesalaka kumosi ti beto na kisalu ya kusamuna?

² Na Ntangu Beto Kesamuna Nzo na Nzo: Bonso Yezu, mbandu na beto kevandaka na bupusi na bantu yina kesalaka kumosi ti beto na kisalu ya kusamuna. Ntangu bansamuni ya mpa mpi yina kele ti eksperiansi fyoti kemonaka beto kesamuna na kikesa yonso, bo tayindula mutindu ya kutomisa kisalu na bo ya kusamuna. Ntangu bo kemonaka kyese na beto mpi dikebi ya masonga ya beto ketudilaka bankaka, yo tayibusa bo mfunu ya kumonisa bikalulu ya mutindu mosi na kisalu na bo ya kulonga. Ntangu bo kemonaka kikesa na beto na ntangu beto kesadilaka Biblia, kevutukilaka bantu, mpi ketwadisaka kulonguka ya Biblia, yo tapusa bo na kusala mpi mutindu mosi.

3. Inki mutindu mbandu na beto lenda longa balongoki ya Biblia, mpi nki bo lenda longuka?

³ Na Ntangu Beto Ketwadisaka Kulonguka ya Biblia: Balongoki na beto ya Biblia tamona mpenza bikalulu na beto. Mu mbandu, ata beto lenda tendudila bo mfunu ya kuyidika kulonguka na ntwala, kusosa baverse, mpi kutenda bangindu ya mfunu, bo tamona kana beto mpi kesalaka kiteso mosi. (Roma 2:21) Kana beto kezitisa ntangu yina beto wakanaka sambu na kulonguka, bo tasalaka na mpila nde mambu yankaka kukanga bo ve nzila ya kulonguka Biblia. Ntembe kele ve nde, bo tamona mpi kikalulu na beto ya kudipesa na kisalu ya kusamuna mpi lukwikilu na beto ya ngolo. Mpila ya kuyituka kele ve nde mbala mingi, balongoki ya bantu yina kelandaka mpenza mbandu ya Yezu kekumaka bansamuni ya kikesa mpi ya kebutaka mbuma.

4. Mbandu na beto kelongaka nki na ntangu beto kekwendaka na balukutakanu?

⁴ Na Balukutakanu ya Dibundu: Bantu yonso yina kele na kati ya dibundu ya Bukristu kele ti mukumba ya kulonga na mbandu na balukutakanu. Bantu yina kesepelaka na kyeleka mpi ya keyantikaka kukwenda na balukutakanu kebakaka mambote na mbandu ya mbote ya bo kemonaka na kati ya dibundu. Bo tamona zola ya kimpangi, bumosi ya Bukristu, mpi mutindu ya mbote ya kulwata mpi ya kudiyika. (Nk. 133:⁠1) Bo tamonaka mpi mbandu na beto ya kukwenda mbala na mbala na balukutakanu mpi ya kupesa bakomantere. Muntu mosi ya kukwendaka na balukutakanu kumonaka mutindu mwana mosi ya nkento ya fyoti vandaka kumona mbala mosi baverse na Biblia na yandi mpi mutindu yandi vandaka kulanda lutangu na dikebi yonso. Mbandu ya mwana yina kupusaka muntu yina na kulomba kulonguka Biblia.

5. Sambu na nki beto fwete monaka ve mpamba bupusi ya mbandu na beto?

⁵ Masonuku kesyamisa beto na kulanda mbandu ya mbote ya bankaka. (Filp. 3:17; Baeb. 13:⁠7) Yo yina, beto fwete yibuka nde kana beto kelanda mbotembote mbandu yina Yezu kubikaka, bankaka tamonaka yo mpi yo lenda vanda na bupusi ya mbote na bo. Sambu beto kebakisa dyambu yai, bika beto landa mambu yai ya kele na 1 Tim. 4:16: “Keba nge mosi, keba na malongi na nge.”