Pesa Kikesa na Bantu ya Ntima ya Kulemba

¹ Bubu yai, bantu kele mpenza na mfunu ya kikesa kuluta na bantangu yonso yina melutaka. Sambu beto kelandaka mbandu ya Ntotila na beto, Kristu Yezu, beto mpi kesalaka kisalu ya “kutala bayina” ke na ntima ya kulemba.​—⁠Yez. 61:⁠1.

² Mutindu ya Kupesa Bankaka Kikesa: Sambu na kupesa bantu kikesa, bangogo na beto ya kukotila na masolo na kisalu ya kusamuna fwete vanda mbote mpi na bukatikati. Kana beto ketubila ve mingimingi mambu ya mbi ya keluta na nsi-ntoto mpi malongi ya luvunu, kyeleka ya Biblia mpi kivuvu ya kyese ya balusilu ya Nzambi yina kepesa kikesa tavanda mambu ya kuluta mfunu yina beto tatubilaka. Yo ketendula ve nde beto fwete tubila ve Armagedoni. Mukumba na beto kele ya kusonga “bantu nde yai kele ntangu ya Nzambi ta kwisa kugulusa bantu na yandi ti kuvutula mbi na bambeni na yandi,” mpi ya kukebisa bantu ya mbi “na kubika nzila na [bo] ya mbi.” Kansi, kukebisa bantu sambu na Armagedoni mpi kutendula mambu yina tasalama na nima fwete fika ve ntu-dyambu ya nsangu ya mbote ya Kimfumu ya Nzambi.​—⁠Yez. 61:2; Ezek. 3:18; Mat. 24:⁠14.

³ Na Kisalu ya Nzo na Nzo: Mbala mingi beto kekutanaka ti bantu yina melembaka nitu sambu na maladi, lufwa ya muntu mosi ya bo kezolaka, kukonda lunungu, to bampasi ya mbongo. Sambu beto kele balongoki ya Kristu, beto ‘kewaka mawa’ mpi beto kekuditulaka na kisika ya bantu yina beto kekutanaka ti bo na kisalu ya kusamuna. (Luka 7:13; Roma 12:15) Ata beto lenda tanga verse mosi to baverse zole ya ketadila dikambu yina muntu kele na yo, beto fwete vanda “ya kuyilama na kuwa” sambu na kusadisa muntu yango na kutuba mambu yina yandi keyindula. (Yak. 1:19) Kana beto widikila ntete muntu, beto tazaba mutindu ya kupesa yandi kikesa.

⁴ Na ntangu beto kesolula, beto lenda pona ntangu ya mbote sambu na kutuba nde: “Mu kezola kutangila nge mwa mambu ya ke na Biblia ya kepesa kikesa.” Beto fwete sadila luswasukusu sambu na kumonisa ve na muntu nde mabanza na yandi yonso kele ya mbi. Kansi, beto fwete tula dikebi na beto kaka na kusadila Masonuku sambu na kupesa ntima kikesa. Sambu na dyambu yai, nge lenda tala mukanda Comment raisonner à partir des Écritures na balutiti 119-122, na nsi ya kantu-dyambu “Encouragement.” To, nge lenda pesa muwi trakiti Lusadisu sambu na bantu kenyokwama na mabanza mpi kutadila malongi ya kepesa kikesa yina kele na kati.

⁵ Sosa Mabaku ya Kupesa Bankaka Kikesa: Keti nge mezaba muntu mosi ya kartie na nge, nduku mosi ya kisalu, ya nzo-nkanda, to muntu mosi ya dibuta na nge yina kele na mfunu ya kikesa? Nge lenda sala yonso sambu na kukwenda kutala bo na banzo na bo ti lukanu ya kupesa bo kikesa ya kekatuka na Masonuku. Kana nge kezaba sambu na nki bo kele na mfunu ya kikesa, nge lenda kudibongisa sambu na dyambu yina ya sikisiki. Sambu na kupesa kikesa, bampangi mingi mesonikilaka bantu yango mikanda to mebingaka bo na telefone. Zola ya kyeleka sambu na nkweno fwete pusa beto na kuditula na kisika na bo mpi kupesa bo kikesa ya kekatuka na Masonuku yina bo kele na yo mfunu.​—⁠Luka 10:​25-37.

⁶ Ya kyeleka, beto kele ti mukumba ya kupesa kikesa na bantu yina mefwilaka bantu ti na bayina kele na mawa, mpi na kupesa bo kivuvu sambu na bilumbu kekwisa. Yai kele lusadisu yina bantu ya ntoto ya mvimba kele na yo mfunu. Kutubila na kyese yonso mambu mingi ya mbote yina Nzambi mesilaka tapesa kikesa mpi kivuvu na bantu ya ntima ya kulemba. Bika nde beto yibuka ntangu yonso mfunu ya kutala bayina ke na ntima ya kulemba.