Mambu ya Kuyibuka Sambu na Lusungiminu
Bankuluntu fwete tula dikebi na mambu yai ya melanda ntangu bo kebongisa Lusungiminu:
◼ Beno fwete zikisa nde bidimbu kuluta ve na ntwala ya kudinda ya ntangu.
◼ Beno fwete sosa mampa ti vinu yina mefwana mpi kuyidika yo na ntwala sambu na kusadila yo.—Tala Nzozulu ya Nkengi ya Marsi 1, 2003, balutiti 10-11.
◼ Beno tanata malonga, makopa ya tala-tala, ti mesa ya kitoko mpi lele na yo na kisika yina beno tasala Lusungiminu, mpi beno tayidika yo na ntwala.
◼ Beno tatula bunkete mbote-mbote mpi na ntwala na Nzo ya Kimfumu to na kisika yankaka ya beno tasadila lukutakanu yango.
◼ Beno fwete pona na ntwala kibeni bampangi yina tasala kisalu ya kuyamba bantu yina takwisa ti bayina talutisa bidimbu. Beno tapesa bo na ntwala bantuma ya metala mikumba na bo, bansiku yina bo talanda, mpi mfunu ya kulwata mpi ya kuyidika nsuki mbote.
◼ Beno fwete baka bangidika sambu na kupesa bidimbu na konso mupakulami yina menuna mpi kele ti kifu na nitu, kebela, to yina takuka ve kuvanda na kisika ya Lusungiminu.
◼ Kana mabundu mingi tasadila Nzo ya Kimfumu mosi, bo fwete wakana mbote na mpila nde bantu kufuluka ve mpamba-mpamba na kyelo, na bisika ya kulutila, mpi na parkingi.
◼ Kana beno tasala Lusungiminu kisika yankaka, beno fwete zikisa nde beno vanda ti masini ya mbote ya kubasisa ndinga na mpila nde bawi takuka kulanda mutubi mbote.