Kudibongisa Mbote-Mbote Sambu na Lusungiminu

Yo kevandaka kyese mpi lukumu ya nene sambu na balongoki ya Kristu na kudibongisa mbote-mbote sambu na mpimpa yina beto kesungiminaka lufwa ya Yezu Kristu! (Luka 22:19) Inki mambu ya mfunu beto fwete sala sambu beto kudibongisa sambu na Lusungiminu?

◼ Ntangu ti Kisika: Bantu nyonso fwete zaba mbote-mbote ntangu mpi kisika yina Lusungiminu tasalama. Kana mabundu mingi tasala Lusungiminu na Nzo ya Kimfumu mosi, yo kele mfunu na kukuma na ntangu ya mbote mpi kubasika kukonda kusukinina, sambu ntangu yina kekabula balukutakanu kele ve mingi. Beno fwete sala bikesa sambu bantu kufuluka ve mpamba-mpamba na kyelo, na bisika ya kulutila, mpi na parkingi.

◼ Baemvitasio: Keti bansamuni yonso mebaka dezia baemvitasio na bo, mpi keti bo mezaba mambu yina kele na kati? Keti nge meyidika dezia mutindu nge tapesa emvitasio yai? Banani nge tapesa emvitasio? Beno fwete sala ngolo sambu na kukabula baemvitasio yonso.

◼ Transpore: Bantu yankaka ya kesepela na kyeleka mpi bampangi yankaka ya babakala ti ya bankento lenda vanda ti mfunu ya transpore to ya lusadisu. Inki bangidika beno mebaka sambu na kulungisa bampusa na bo?

◼ Bidimbu: Beno fwete zikisa nde bidimbu kuluta ve na ntwala ya kudinda ya ntangu. Beno fwete baka bangidika sambu na kupesa bidimbu na konso mupakulami yina menuna, yina kele ti kifu na nitu, yina kebela to yina takuka ve kuvanda na kisika ya Lusungiminu. Beno fwete sosa mampa ti vinu yina mefwana mpi kuyidika yo na ntwala sambu na kusadila yo.​—⁠Tala Nzozulu ya Nkengi ya Marsi 1, 2003, balutiti 10-11, paragrafe 14, 17.

◼ Nzo ya Kimfumu: Beno fwete tula bunkete mbote-mbote na Nzo ya Kimfumu na ntwala mpenza. Beno tanata malonga, makopa ya tala-tala, ti mesa ya kitoko mpi lele na yo na kisika yina beno tasala Lusungiminu, mpi beno tayidika yo na ntwala. Kana beno tasala Lusungiminu kisika yankaka, beno fwete zikisa nde beno tavanda ti masini ya mbote ya kubasisa ndinga na mpila nde bawi kulanda mutubi mbote. Beno fwete pona na ntwala kibeni bampangi yina talutisa bidimbu ti bayina tasala kisalu ya kuyamba bantu. Beno tapesa bo na ntwala bantuma ya metala mikumba na bo, bansiku yina bo talanda, mpi mfunu ya kulwata mpi ya kuyidika nsuki mbote.

Na dibaku yai ya kuluta mfunu, Lusungiminu ya lufwa ya Yezu Kristu, beto kezola nde beto mosi mpi dibundu ya mvimba kudibongisa mbote-mbote. Ntembe kele ve nde Yehowa tasakumuna mingi bantu yonso yina tamonisa ntonda ya masonga na mambu yonso ya yandi mesalaka sambu na bantu na nzila ya kimenga ya Mwana na yandi ya yandi kezolaka mingi, Yezu Kristu.