Beto Pesana Kikesa na Ntangu Beto Kele na Kisalu ya Kusamuna
1 Beto yonso kevandaka na kyese na kuwa bangogo ya kepesa kikesa mpi ya bo metuba na ntangu ya “mbote.” (Bing. 25:11) Na ntangu beto kele ti bankaka na kisalu ya kusamuna, nki mutindu beto lenda zikisa nde masolo na beto kepesa kikesa?
2 Masolo ya Kepesaka Kikesa: Yo kepesaka kikesa mpenza na ntangu beto kekotisaka mambu ya kimpeve na masolo na beto na ntangu beto kele na kisalu ya kusamuna! (Nk. 37:30) Beto lenda tubila mutindu na beto ya kukotila na masolo to kuta baeksperiansi ya kepesa kikesa yina beto kutanaka na yo na kisalu ya kusamuna ntama mingi ve. (Bis. 15:3) Keti beto monaka dyambu mosi ya mfunu na lutangu na beto ya Biblia, na baperiodike ya mekatuka kubasika, to na lukutakanu ya dibundu? Beto lenda tubila mambu ya bo tubaka na diskure mosi ya beto waka ntama mingi ve na Nzo ya Kimfumu.
3 Beto lenda wa mpasi na ntima kana muwi kubasisa ntembe yina beto mekuka ve na kununga. Na nima ya kukabwana ti muwi yina, yo kele mbote kibeni na kubaka mwa minuta sambu na kusolula ti mpangi ya beto kesamuna ti yandi na yina metala mutindu beto lenda nunga ntembe yango to kupesa mvutu na ngyufula mosi buna na bilumbu kekwisa, ziku na kutadilaka mukanda Comment raisonner. Mpi kana beto sepelaka na kima mosi yina mpangi ya beto kesamuna ti yandi kutubaka na bangogo na yandi ya kukotila na masolo, beto lenda sikisa yandi sambu na kupesa yandi kikesa.
4 Baka Lukanu: Keti na kimvuka na beto ya kulonguka ya mukanda kele ti bampangi yankaka yina beto mesamunaka mwa ntama ti bo? Kulomba bo na kusamuna ti beto lenda sadisa na ‘kupesana kikesa.’ (Roma 1:12) Bapasudi-nzila nsadisi mpi ya ntangu yonso kesepelaka kusamuna ti bampangi yankaka, mingimingi na sukasuka to na nkokila, ntangu bansamuni kevandaka ve mingi na kisalu ya kusamuna. Beto lenda sadisa bapasudi-nzila na kusamunaka ti bo. Keti beno kele ti nsamuni mosi ya kele kikata mpi yina mavimpi na yandi kepesaka yandi ve nzila ya kusala kisalu ya kusamuna? Yo lenda vanda mbote na kubaka bangidika sambu nde mpangi ya mutindu yai kusamuna ti beto, ziku na ntangu beto kelonguka Biblia ti muntu.—Bing. 27:17.
5 Kusikisa mpi kumonisa ntonda, ata na mambu ya fyoti, kepesaka ntangu yonso kikesa. Beto fwete vila ve dyambu yai na ntangu beto kele na kisalu ya kusamuna ti bankaka, sambu beto kezola kulanda ‘kupesana kikesa.’—1 Tes. 5:11.