Sadisa Mpangi Yina Ke Samuna ti Nge
1. Inki mutindu beto lenda landa mbandu ya ntumwa Polo ntangu beto ke samuna ti bampangi ya nkaka?
1 Ntumwa Polo monaka ntangu yina yandi lutisaka ti bampangi-Bakristu bonso mabaku ya mbote ya ‘kupesana kikesa.’ (Bar. 1:12) Ntangu nge ke samunaka ti nsamuni ya nkaka, keti nge ke sadilaka ntangu yina sambu na kusiamisa mpi kusadisa yandi? Na kisika ya kuvanda pima, zabisa mpangi yango mambu yina sadisaka nge na kukuma nsamuni ya mbote?
2. Inki beto lenda sala sambu na kusadisa mpangi yina beto ke sala ti yandi kisalu ya bilanga na kuditudila ntima, mpi sambu na nki yo kele mfunu?
2 Beto Sadisa Bo na Kuditudila Ntima: Bansamuni ya nkaka ke kuditudilaka ve ntima mpi yo lenda monana na luse to na ndinga na bo. Beto lenda sadisa bo na kuditudila ntima kana beto ke sikisa bo na masonga yonso. Inki kele mwa mitindu ya nkaka ya kusadisa bo na kuditudila ntima? Nkengi-ntambudi zabisaka nsamuni mosi mutindu yandi ke waka boma mpi mutindu yandi ke sambaka mbala na mbala sambu na kubaka lusadisu ya kununga mawi yina. Mpangi ya nkaka sonikaka diambu yai ya ke sadisaka yandi na kuditudila ntima: “Mono ke yantikaka ntete na kuseka fioti. Bantangu ya nkaka, yo ke lombaka nde mono samba sambu na kubaka lusadisu ya kutuba kukonda mpasi.” Keti diambu mosi sadisaka nge na kuditudila kibeni ntima na kisalu ya kusamuna? Zabisa yo mpangi yina beno ke sala ti yandi kisalu ya bilanga.
3. Inki mambu beto lenda zabisa mpangi na beto yina lenda sadisa yandi na kusala kisalu ya kusamuna mbote-mbote?
3 Beto Zabisa Bo Bametode ya Beto Ke Sadilaka: Keti nge me zwaka nsa to ngiufula mosi ya kukonda mpasi, ziku ya ke tadila diambu mosi ya me salamaka na kisika ya nge ke zingaka yina lenda vanda mbote sambu na kuyantika disolo ti muntu? Keti nge ke bukaka mbuma ya mbote kana nge tuba na bangogo na nge mosi mbandu ya bangogo ya kukotila na masolo yina bo ke pesaka? Zabisa yo mpangi na nge. (Bing. 27:17) Ntangu nge ke sala mvutukilu ya mpa, nge lenda zabisa mpangi lukanu ya mvutukilu yango mpi mutindu nge kudibongisaka sambu na kulungisa yo. Na nima ya kulonguka Biblia ti muntu, nge lenda tendudila mpangi sambu na nki nge ponaka disolo, verse, to metode mosi buna ya kulongila sambu na kulungisa bampusa ya longoki.
4. Sambu nki beto fwete tula dikebi na kusadisa bampangi na beto bansamuni?
4 Bansamuni ya mvu-nkama ya ntete vandaka kusadisa bantu yina vandaka ve Bakristu. Bo bakisaka mpi mfunu ya kupesana kikesa ti ngolo. (Bis. 11:23; 15:32) Ntumwa Polo longaka toko Timoteo mpi siamisaka yandi na kuzabisa bantu ya nkaka mambu yina yandi longukaka. (2 Tim. 2:2) Kana beto ke sadila bampangi na beto Bakristu mambu ya mbote na kisalu ya kusamuna, beto ke kumisaka kaka ve kiese na bo mingi mpi kusadisa bo na kuvanda bansamuni ya mbote kansi beto ke sepedisaka mpi Tata na beto ya zulu.—Baeb. 13:15, 16.