Beto Yedisa Mayele na Beto na Kisalu ya Kusamuna—Vanda Nsamuni Yina Ke Sadisa

Mfunu na Yo: Yezu bakisaka mfunu ya kusamuna ti muntu ya nkaka. Yo yina, ntangu yandi tindaka balongoki na yandi 70 na kisalu ya kusamuna, yandi kabulaka bo zole-zole. (Luka 10:1) Nsamuni yina ke samuna ti nge lenda sadisa nge ntangu nge me kutana ti diambu mosi ya mpasi to ntangu nge ke kuka ve kupesa muwi mvutu. (Lo. 4:9, 10) Yandi lenda tela nge eksperiansi na yandi mpi bantangu ya nkaka kupesa nge dibanza yina lenda sadisa nge na kukuma nsamuni ya mbote. (Bing. 27:17) Yandi lenda siamisa nge na nsadisa ya masolo ya ke pesaka kikesa na ntwala ya kukuma na kielo ya nkaka.—Bafi. 4:8.

Mutindu ya Kusala Yo:

Tula dikebi ntangu nsamuni yina ke samuna ti nge ke ta kimbangi. (Yak. 1:19) Ntangu yandi ke tanga verse mosi, landa yo na Biblia na nge. Yo ta pesa nge nzila ya kusadisa yandi kana mpila kele.
Sadila luswasukusu sambu na kuzaba inki ntangu nge fwete pesa komantere. (Bing. 25:11) Kana nge ke fidisa nsamuni ya nkaka sambu na kulonguka Biblia ti muntu, ntembe kele ve nde bakomantere na nge ta vanda mfunu mingi. Kansi ntangu beno ke samuna nzo na nzo, nsamuni yina ke samuna ti nge lenda sepela nde nge bikila yandi ntangu ya kutuba kana yo me kuma ntangu na yandi. Ya kieleka, kana yandi kele nsamuni ya mpa to yandi ke kuka ve kupesa mvutu na ngiufula to kununga ntembe mosi, ziku yandi ta vanda na kiese kana nge sadisa yandi. Kansi kana nge ke fidisa nsamuni ya nkaka na kisalu ya nzo na nzo, na mvutukilu ya mpa to na kulonguka Biblia ti muntu, kuzenga yandi ndinga ve mpi kukotisa ve disolo ya nkaka.
Tela yandi eksperiansi na nge. Kana dibaku kumonana, kubuya ve na kupesa nsamuni yina ke samuna ti nge dibanza yina ta sadisa yandi na kukuma nsamuni ya mbote na kisalu ya kusamuna. (Bing. 3:27) Na ntangu ya me fwana, nge lenda tuba nde: “Nge ke yindula nki sambu na disolo ya me luta?” to “Keti mu lenda pesa nge dibanza?” to “Mu ke salaka mutindu yai.” Zaba nde bampangi ya nkaka ta sepela ti dibanza na nge bantangu ya nkaka, kansi bo ta lemba nitu kana nge ke tubila bifu na bo mbala na mbala.

Sadila Yo Ngonda ya Mvimba:

Na nima ya kusamuna ti mpangi mosi na kisalu ya bilanga, zabisa yandi mambu yina yandi tubaka mpi yina yandi salaka ya ke monisa nde yandi kele nsamuni yina ke sadisa.