Mutindu ya Kulonga Bantu ya Mpa na Kusamuna
1. Inki mutindu nge kudiwaka mbala ya ntete ya nge vukanaka na kisalu ya kusamuna?
1 Keti nge keyibuka mbala ya ntete ya nge vukanaka na kisalu ya nzo na nzo? Ntembe kele ve nde nge vandaka na boma. Kana nge vandaka kusamuna ti longi na nge ya Biblia to nsamuni yankaka, ntembe kele ve nde nge vandaka na kyese ya kubaka lusadisu na yandi. Ntangu yai ya nge mekumaka ti eksperiansi bonso ministre, nge mefwana na kusadisa sambu na kulonga bantu ya mpa na kusamuna.
2. Bansamuni ya mpa fwete longuka inki?
2 Bansamuni ya mpa fwete longuka mutindu ya kuyantika masolo ti bawi, kusadila Biblia na kyelo, kusala bamvutukilu ya mpa, mpi kuyantika ti kutwadisa kulonguka ya Biblia. Bo fwete longuka mpi mutindu ya kuvukana na bitini ya kuswaswana ya kisalu ya kusamuna, bonso kuta kimbangi na balabala mpi kukwenda kutala bantu na bisika ya mumbongo. Na mbandu mpi na bangindu na nge, nge lenda sadisa bo na kutoma na bitini yai ya kisalu ya kusamuna.
3. Inki mutindu beto lenda sadisa bankaka na mbandu na beto?
3 Longa na Mbandu na Nge: Yezu kumonisaka balongoki na yandi mutindu ya kusamuna. (Luka 8:1; 1 Pie. 2:21) Ntangu nge kekudibongisa na kusamuna ti nsamuni mosi ya mpa, yidika bangogo ya pete ya kukotila na masolo yina nsamuni yango lenda landa, ziku na kusadilaka mbandu mosi ya bangogo ya kukotila na masolo yina kele na mikanda na beto. Na nima, songa yandi nde nge muntu tayantika na kyelo ya ntete to na bakyelo zole ya ntete na mpila nde yandi lenda widikila mutindu nge ketuba. Na ntwala ya kukuma na kyelo yankaka, nge lenda lomba yandi na kuzabisa nge kana nge salaka mbote. Dyambu yai tasadisa yandi na kumona mfunu ya kusala ti bankaka na kisalu ya kusamuna, mpi yo tasala nde yo vanda pete sambu yandi ndima konso dibanza yina nge tapesa yandi na nima ya kusolula ti muntu mosi.
4. Inki mutindu beto lenda sadisa longoki ya mpa na nima ya kuwidikila yandi?
4 Pesa Bangindu: Yezu kupesaka mpi balongoki na yandi bantuma ya ketadila mutindu ya kusamuna. (Mat. 10:5-14) Nge lenda sadisa nsamuni ya mpa na mutindu mosi. Kana yo mekuma ntangu na yandi ya kutuba, widikila yandi na dikebi yonso. Na nima, ntangu beno tabikisa kyelo yina, nge fwete sikisa yandi na sikisiki mpi na masonga yonso, ata nge monaka nde yandi fwete sala bansoba na mambu yankaka na mutindu na yandi ya kuzabisa nsangu. Na ntwala ya kupesa ngindu, nge lenda pona na kutala kana yandi tatomisa dyambu yina na kyelo ya kelanda. Mbala yankaka yandi vandaka na boma. Kuvila mpi ve nde, bansamuni yonso kevandaka ve ti makuki ya mutindu mosi, mpi mbala mingi yo kevandaka ti mitindu mingi ya mbote ya kusala kima mosi.—1 Kor. 12:4-7.
5. Inki beto lenda tuba ntangu beto kebaka lukanu ya kupesa bangindu?
5 Bantangu yankaka nsamuni ya mpa talomba nge na kupesa yandi bangindu. Kansi kana yandi sala yo ve, baka lukanu ya kusadisa yandi. Inki mutindu nge lenda sala yo na mayele yonso? Bansamuni yankaka ya kele ti eksperiansi keyulaka kaka nde, “Keti mu lenda pesa nge dibanza?” to, “Nge keyindula nde yo salamaka inki mutindu?” Dibanza yankaka kele ya kutuba nde, “Ntangu mu vandaka nsamuni ya mpa, mu vandaka kukuka ve na . . . , kansi dyambu yai kusadisaka munu mingi. . . .” Bantangu yankaka yo kevandaka mfunu na kutala kumosi mukanda Comment raisonner. Sambu nge fulusa yandi ve ti bangindu mingi-mingi, pesa yandi kaka ngindu mosi na yina metala mutindu yandi zabisaka nsangu.
6. Na yina metala kisalu ya kusamuna, inki mutindu “bibende ke pesaka makasi na bibende ya nkaka”?
6 Bibende Kepesaka Makasi na Bibende Yankaka: Polo kusyamisaka Timoteo, nsamuni mosi ya vandaka ti eksperiansi, na kulanda na kudipesa na kulonga mpi na kuyela. (1 Tim. 4:13, 15) Ata yo lenda vanda nde bamvula mingi melutaka banda nge vukanaka na kisalu ya kusamuna na mbala ya ntete, nge fwete yambula ve na kumeka kutomisa mayele na nge. Longuka na bansamuni yina nge kesamuna ti bo, ata na bayina kele ti eksperiansi mingi ve na kisalu ya kusamuna, mpi tula dikebi na kusadisa bankaka na ntima-mbote, mingimingi bantu ya mpa, sambu bo kuma baministre ya mayele ya nsangu ya mbote.—Bing. 27:17.