Beto Longuka Mambu na Bansamuni ya Kele ti Eksperiansi Mingi
Na dibundu, beto ke bakaka mpenza na mbalu bansamuni ya kele ti eksperiansi mingi. Bankaka me sadilaka Yehowa na kwikama yonso bamvula mingi. Kansi, bankaka me kuma ti eksperiansi na kisalu ya kusamuna ata bo me sadilaka ve Yehowa bamvula mingi. Bansamuni yai me monaka mutindu Yezu ke twadisaka dibundu ya Bukristu na bilumbu yai ya nsuka disongidila mutindu kisalu ya kusamuna mpi ya kukumisa bantu balongoki ke landa na kukwenda na ntwala. (Mat. 28:19, 20) Sambu bo ke salaka kisalu yai, bo ke bakaka “ngolo yina me luta ngolo ya bantu” ntangu bo ke kutanaka ti bampasi. (2 Bak. 4:7) Beto lenda longuka mambu mingi na bansamuni yai ya kele ti eksperiansi. Kana bo me zwa dibaku, bo ke sepelaka mingi na kulonga bankaka mambu ya bo me longukaka. (Nk. 71:18) Yo yina, beto fwete sosa mabaku ya kulonguka mambu mingi na bo. Inki mutindu beto lenda sala yo?
Na Kisalu ya Kusamuna. Sambu nde bansamuni ya mpa to bansamuni ya kele ve ti eksperiansi kusamuna mbote, yo ke lombaka kulonga bo. Bo lenda longuka mambu mingi kana bo ke tala mutindu bansamuni ya kele ti eksperiansi ke sala kisalu ya kusamuna. (Tala disolo “Tanina Kikesa na Nge na Kisalu ya Kusamuna,” ya kele na Nzozulu ya Nkengi ya Februari 15, 2015 na kantu-diambu “Sadisa Bansamuni ya Mpa, par. 3.”) Inki mambote nge me bakaka ntangu nge ke samunaka ti bo?
Keti nge lenda lomba nsamuni ya kele ti eksperiansi na kusamuna ti nge? Kana nsamuni yango kele ti kifu na nitu to mavimpi na yandi kele mbote ve, bantangu ya nkaka nge lenda nata longoki na nge ya Biblia na nzo na yandi. Na nima ya kulonguka, nge lenda lomba nsamuni yango na kutuba mambu ya yandi me mona mpi kupesa nge bandongisila.
Lutisa Ntangu ti Bo: Lutisa ntangu ti bansamuni ya kele ti eksperiansi sambu na kuzaba bo mbote-mbote. Bingisa nsamuni mosi ya kele ti eksperiansi na Lusambu na nge ya Dibuta mpi yula yandi bangiufula. Kana nsamuni yango kele ti kifu na nitu to mavimpi na yandi kele mbote ve, keti nge lenda baka bangidika sambu na kusala lusambu ya dibuta na nzo na yandi? Sosa kuzaba mutindu yandi zabaka kieleka. Inki mambote yandi me bakaka? Inki kuyela yandi me monaka na kisalu ya Bambangi ya Yehowa na kisika ya beno ke zingaka? Inki kiese yandi me monaka na kusadila Yehowa?
Bakisa bo mpi vanda ti bukati-kati ntangu nge ke lomba bo lusadisu. Bonso bantu yonso, bansamuni ya ntama kele ti makabu ya kuswaswana sambu na kisalu ya kusamuna. (Bar. 12:6-8) Bankaka kele bambuta mpi bo lenda kuka diaka ve kulutisa ntangu mingi ti beto. Kansi, beto lenda longuka mambu mingi na bo sambu bo me sadilaka Yehowa na kwikama yonso bamvula mingi.