Beto Yedisa Mayele na Beto na Kisalu ya Kusamuna—Pesa Bansamuni ya Mpa Formasio

Mfunu na Yo: Balongoki ya mpa ya Yezu fwete longuka na kuzitisa “mambu yonso” yina Yezu ke lombaka bo, mu mbandu kulonga bantu ya nkaka kieleka. (Mat. 28:19, 20) Balongoki mingi ya mpa ke salaka dezia masolo na Nzo-Nkanda ya Kisalu ya Teokrasi mpi bo lenda ta kimbangi ya dibaku ya mbote na bantu ya mabuta na bo to na banduku na bo. Yo yina, sambu bo ke monisa ntonda na mambu ya bo ke longuka mpi me zaba nde Yehowa ke zola bantu yonso kuwa nsangu ya mbote, bo lenda monisa mpusa ya kusala kisalu ya kusamuna. (Bar. 10:13, 14) Kana balongoki ya Biblia me kuma bansamuni ya me bakaka ntete ve mbotika, yo ke lomba kupesa bo formasio yina ta sadisa bo na kuditudila ntima ntangu bo ke yantika kuyela na kimpeve.—Luka 6:40.

Mutindu ya Kusala Yo:

Sadisa nsamuni ya mpa na kubaka mikanda yina yandi ta vanda na yo mfunu sambu na kusamuna mpi kulongila. Songa yandi mutindu nge ke yidikaka sakosi na nge ya kisalu ya kusamuna mpi songa yandi lukanu ya konso mukanda ya nge ke baka.
Beno pona mbandu mosi ya bangogo ya kukotila na masolo na Kisalu na Beto ya Kimfumu mpi beno meka kusadila yo. Siamisa nsamuni ya mpa na kutuba bangogo ya kukotila na masolo na bangogo na yandi mosi. Beno sadila mukanda Nzo-Nkanda ya Kisalu na lutiti 82 sambu na kupona bakadre ya ke monisa mambu yina ke salamaka na teritware na beno. Monisa yandi mfunu ya kulwata mpi ya kuyidika nitu mbote.—2 Bak. 6:3, 4.
Pesa yandi formasio mbala na mbala. Songa nsamuni ya mpa karte ya teritware mpi longa yandi mutindu ya kusadila noti ya kisalu ya kusamuna nzo na nzo. Songa yandi mutindu ya kubaka banoti ya bantu yina me monisa mpusa. Longa yandi mutindu ya kusadila jw.org mpi kamukanda Une bonne nouvelle pour des gens de toutes nations na kisalu ya kusamuna. Sadisa yandi na kuyedisa mpusa ya bantu yina me sepela ti nsangu.—1 Bak. 3:6.
Vanda ntima-nda mpi sikisa yandi. (Bing. 25:11) Pesa mbandu ya mbote. Kikesa na nge mpi dikebi ya nge ke tudila yandi ta buta mbuma ya mbote na bamvula ya ke kwisa.

Sadila Yo Ngonda ya Mvimba:

Nata longoki na nge ya Biblia ntangu nge ke sala kisalu ya nzo na nzo, ntangu nge ke sala bamvutukilu ya mpa mpi ntangu nge ke longuka Biblia ti muntu. Kana nge kele ve ti longoki ya Biblia, lomba nsamuni ya kele ve na eksperiansi mingi na kusamuna ti nge.