Vanda Nsamuni ya Keyela

¹ Tata na beto ya zulu kesepelaka ntangu bansadi na yandi keyelaka na kimpeve. Kuyela na kimpeve kelombaka mpi kuvanda nsamuni ya kuyela mpi ya mbote ya nsangu ya mbote. Polo kusyamisaka nkengi Timoteo na kulanda na kusala bikesa na mpila nde bantu yonso kumona nde bisalu na yandi kekwenda na ntwala. (1 Tim. 4:​13-15) Beto yonso fwete sala bikesa sambu na kutomisa kisalu na beto ya kusamuna, ata bayina mesalaka mingi.

² Kuditudila Balukanu: Kuyela na kimpeve kelombaka kuditudila balukanu. Inki kele mwa balukanu yina beto lenda kuditudila? Beto lenda tomisa mayele ya kusadila mbote mbele na beto ya kimpeve, Biblia. (Ef. 6:17) Ziku kele ti mutindu mosi ya kisalu ya kusamuna yina beto kele na mfunu ya kutomisa, bonso kuta kimbangi na balabala, na telefone to kusamuna na teritware ya bantu ya mumbungu. To beto lenda sala ngolo sambu na kusala bamvutukila mingi ya kebuta mbuma. Lukanu yankaka ya mbote lenda vanda ya kutomisa mayele na beto ya kuyantika mpi kulonguka Biblia ti bantu.

³ Bangidika: Balukutakanu ya dibundu, mingimingi Nzo-Nkanda ya Kisalu ya Teokrasi mpi Lukutakanu ya Kisalu, kele ti lukanu ya kusadisa beto na kuvanda bansamuni ya keyela. Kana beto kebaka ntangu ya kuyidika mpi ya kukwenda na balukutakanu yai mpi kesadila mambu ya beto kelonguka, ntembe kele ve nde beto tabaka mambote mingi.​—⁠2 Kor. 9:⁠6.

⁴ Sambu na kuyela, beto kele mpi na mfunu ya kusadisana. (Bing. 27:17) Kuwidikila na dikebi yonso bangogo ya kukotila na masolo ya bantu yina beto kesamuna ti bo tasadisa beto na kuyela. Dyaka, nkengi na beto ya kulonguka ya mukanda lenda baka bangidika sambu beto baka lusadisu. Yo kele lusakumunu mpenza kana mupasudi nzila mosi ya kele ti eksperiansi mingi to nsamuni yankaka kusadisa beto na kubuta mbuma mpi na kubaka kyese ya mingi na kisalu ya kusamuna. Keti beto kele ti nsamuni mosi ya mpa na kulonguka na beto ya mukanda? Ziku beto lenda baka lukanu ya kubinga yandi na kusamuna ti beto.

⁵ Kisalu ya kuluta mfunu yina ke na kusalama bubu yai kele kisalu ya kusamuna. Na ntangu beto kepesa Yehowa ‘makabu na beto ya lukumu,’ beto kezola kupesa yandi makabu ya kuluta mbote. (Baeb. 13:15) Kana beto kesala kikesa sambu na kuvanda bansamuni ya keyela, beto tavanda bantu ya kisalu ‘yina ya bo lenda baka mbi ve sambu na kisalu na beto, sambu beto ke zabisaka nsangu ya kieleka mbote-mbote.’​—⁠2 Tim. 2:⁠15.