Dibaku ya Kudya na Kimpeve mpi ya Kusepela
1. Inki mutindu Yehowa kekudibanzaka sambu na bampusa ya kimpeve ya bansadi na yandi?
1 Yehowa kekudibanzaka na zola yonso sambu na bampusa ya kimpeve ya bansadi na yandi. Na ntangu bantu mingi ya nsi-ntoto kefwa na nzala ya kimpeve, beto kedya mbote kibeni na kimpeve. (Yez. 65:13) Mosi na kati ya mitindu yina Yehowa kedisaka beto na kimpeve kele na nzila ya balukutakanu ya distrike yina kesalamaka konso mvula. Keti nge kekudibongisa sambu na kuvanda na bitini yonso ya Lukutakanu ya Distrike yina kekwisa “Mpeve ya Nzambi Ketwadisaka Beto”? Bo meyidika nkinsi ya kimpeve yina tavanda ti madya ya kitoko.
2. Kudibongisa na ntwala sambu na lukutakanu kelombaka inki?
2 Kudibongisa na Ntwala: “Kana nge yindula mbote-mbote mambu ya nge zola sala, mambu yango fweti bonga.” (Bing. 21:5) Yo yina, na ntangu nge keyidika manaka na nge sambu na kuvanda pana bilumbu yonso tatu ya lukutakanu, kuvila ve na kulomba mfumu na nge konzie sambu nge kwenda na lukutakanu. Kana nge tavanda na mfunu ya kisika ya kulala, keti nge mebaka dezia bangidika? Yo tavanda mpi mbote nde nge baka bangidika sambu na madya ya midi na mpila nde nge dya yo kumosi ti bampangi na nge na kisika ya lukutakanu. Baka bangidika sambu na kukuma na lukutakanu konso kilumbu na ntwala sambu na kubaka bisika ya kuvanda mpi kuyimba nkunga ti kuwidikila kisambu ya luyantiku.
3. Inki mutindu ya bilele beto fwete yidika na kulwata?
3 Beto fwete zikisa nde bilele ya beto talwata tavanda ya kukonda mindondo mpi ya kuyidika mbote. (1 Tim. 2:9, 10) Balukutakanu ya distrike kepesaka beto dibaku ya kitoko kibeni ya kuta kimbangi na bantu ya nzyunga na beto. Ntangu beto kelwataka mbote na ntangu beto kele na mbanza yina lukutakanu kesalama mpi kelwataka makaro na beto, beto keswaswanaka ti bantu yina kele ve Bakristu, mpi bantu yina ketalaka beto ketubaka mambu ya mbote sambu na beto.
4. Inki tasadisa beto ti mabuta na beto na kubaka mambote mingi na programe ya lukutakanu?
4 Widikila ti Dikebi Yonso: Ntembe kele ve nde beto kezola ve kukonda ata dilongi mosi ya fyoti ya bo tapesa na nkinsi yai ya kimpeve! (Bing. 22:17, 18) Kulanda na Biblia na beto na ntangu mitubi ketanga baverse mpi kubaka mwa banoti tasadisa beto na kutula mabanza na beto na programe mpi na kubuya kuvwalangasa yo. Ebuna, na nkokila, beto lenda sadila banoti na beto sambu na kutadila ti bankaka mwa bangindu ya mfunu ya programe. Na bamvula ya mekatuka kuluta, yo memonanaka nde baleke mingi kevandaka kisika mosi na lukutakanu mpi kesolulaka ntangu lukutakanu kesalama to ketindaka ba message na batelefone na bo. Kana beto kele na bana, ti bayina kele batoko, yo lenda vanda mbote na kuvanda kisika mosi ti bo mpi kuwidikila programe ya lukutakanu na dibuta, na kisika ya kubikisa bo na kuvanda kisika yankaka ti baleke yankaka.
5. Inki mutindu beto lenda baka kyese mingi na lukutakanu?
5 Sepela ti Kimpangi ya Bukristu: Madya ya ntomo kepesaka kyese kuluta kana beto kedya yo ti banduku. (Bing. 15:17) Mutindu mosi, kuvukana ti bampangi na beto ya babakala ti ya bankento keyikaka beto kyese na lukutakanu. Yo yina, ntangu programe meyantika ntete ve, yo tavanda mbote kibeni na kubaka lukanu ya kupesa bampangi yankaka mbote mpi kusepela na kimpangi na beto. (Nk. 133:1) Kana ntwadisi kulomba beto na kuvanda na ntwala nde miziki kuyantika, beto fwete zenga masolo na beto mpi kuvanda sambu programe kuyantika.
6. Ta eksperiansi mosi ya nge kutanaka na yo ya kemonisa mutindu beto lenda ta kimbangi na bantu yina kele na nzyunga ya mbanza yina lukutakanu kesalama.
6 Sadila Konso Dibaku Sambu na Kuta Kimbangi: Mbala mingi, balukutakanu kepesaka mabaku ya mbote mpenza sambu na kuta kimbangi. Ntangu bantu mingi yina kevandaka na lukutakanu kekwendaka kusumba bima ya kudya na nima ya lukutakanu, bantu yankaka mpi bayina ketekaka keyulaka bo ntu-dyambu ya lukutakanu ya kevandaka na makaro. Mambu ya mutindu yai menataka na masolo mpi mesadisaka bampangi mingi na kuta kimbangi ya mbote na kyeleka. Ebuna, bampangi yina bo yulaka bangyufula kubingisaka bantu yango na kukwisa na lukutakanu.
7. Sambu na nki beto fwete kwenda na lukutakanu ya distrike yina kekwisa?
7 Sambu na kuyidika programe, bisika, ba departema, mpi badiskure ya lukutakanu, yo kebakaka ntangu mingi mpenza. Bikesa yonso ya zola yina bampangi kesalaka sambu na kuyidika nkinsi yai ya kimpeve kemonisaka nde Yehowa kekudibanzaka na zola yonso sambu na bantu na yandi. Bika nde beto yonso kuvanda pana mpi kudya madya yango ya kimpeve! Na ntangu beto kesala mutindu yina, na kuswaswana ti bantu ya nsi-ntoto, beto ‘tasepela mpi tayimba ti kiese na ntima.’—Yez. 65:14.
[Box on page 4]
Bangibusa ya Lukutakanu ya Distrike
◼ Bangunga: Bilumbu yonso tatu manaka tayantikaka na 9:20. Bakyelo takangukaka na 8:00. Na ntangu miziki ya Kimfumu tayantika kubula, beto yonso fwete vanda na bisika na beto na ntangu yina na mpila nde lukutakanu kuyantika na mutindu mosi ya kepesa lukumu. Manaka tasuka na 16:55 na Kitanu ti na Mposo, mpi na 16:00 na Lumingu.
◼ Kubumba Bisika: Beno lenda bumba bisika ya kuvanda kaka sambu na bantu yina kekwisa kumosi ti beno na vwatire to bantu yina kezingaka ti beno nzo mosi.
◼ Madya ya Midi: Beto kelomba beno na kunata madya ya kukonda kilo kansi ya mefwana na kudisa nitu, mu mbandu: mampa, bambuma (mankondo), nguba, mikati to bagato. Beno fwete tula bima bonso masa, kafe to te na kima mosi yina kepasukaka ve sambu na kubuya ba aksida. Ata muntu mosi ve kele ti nswa ya kunata malafu na lukutakanu ya distrike. Kana beno nata madya na beno ti bima yina beno lenda nwa, beno tavanda ve na mfunu ya kusumba yo na bateki. (Beno simba nde: bateki kele ve ti nswa ya kukota na kisika ya lukutakanu na konso ntangu yina.—Yoa. 2:13-17.) Bantu yina tasadila bambabula sambu na kulamba na kisika lukutakanu tasalama fwete lomba ntete nswa na bampangi yina kele na mukumba ya kutala kisika ya lukutakanu ya distrike sambu bo songa bo kisika ya bo lenda sadila yo. Beno fwete keba sambu na kubasisa ve ba aksida.—Luka 10:38-42.
◼ Makabu: Beto lenda tula makabu ya luzolo ya mbote na Nzo ya Kimfumu na beto to na lukutakanu ya distrike sambu na kumonisa ntonda na beto na kisalu yina kesalama na ntoto ya mvimba.
◼ Ba Aksida mpi Maladi ya Kintulumukina: Bampangi yina kesalaka na departema ya ketalaka maladi ya kintulumukina kubokutaka nde bampangi mingi kebingaka bo sambu na mambu ya fyoti kibeni. Kana maladi kukanga muntu na kintulumukina na kisika ya lukutakanu ya distrike, beto kelomba beno na kusolula ti mpangi mosi ya kisalu ya kuyamba bantu, ebuna yandi tasukinina ve na kuzabisa departema ya Lusadisu ya Ntete na mpila nde bampangi yina kele na lukutakanu mpi ya mezaba kisalu yango mbote kutala nene ya maladi yango mpi kupesa lusadisu na bo.
◼ Kubaka Ndinga: Beno fwete kangisa ve konso masini yina ya kubakila ndinga na kura to na bansinga ya mikro ya kisika ya lukutakanu, kansi beno lenda baka ndinga na mutindu yina tavwalangasa ve dikebi ya bantu yankaka.
◼ Kubaka Bafoto: Kana beno kebaka bafoto na ntangu programe kesalama, beto kelomba beno na kusadila ve flashe. Beto kelomba beno mpi na kubinga ve bantu yina kekangaka bafoto na kukwisa na kisika ya lukutakanu. Kana beno mona bantu yango kekanga bafoto na kisika ya lukutakanu, beno kwenda ve na bo sambu bo kanga beno bafoto.—Yoa. 2:13-17.
◼ Batelefone: Beno fwete sala na mpila nde yo bebisa ve dikebi ya bawi.
◼ Bunkete: Mbala mingi, yo kemonanaka nde bantu yina kesumbaka madya na bateki kelosaka bapapie na ntoto to basashe ya bo kekangilaka bo bima yango. Yo kesalaka nde kibansala ya mvimba kufuluka ti bapapie, basashe, babusho ya milangi mpi buna na buna. Kana muntu mebaka lukanu ya kusumba kima mosi na bantu yina ketekaka (mu mbandu: bazoka, babisikwiti, bagato, bitini ya bambisi to konso kima yankaka), pana yandi kele ti mukumba ya kulosa papie to sashe yina bo kangilaka yo na kati ya bitunga ya bima ya mvindu kansi na ntoto ve. Kana beto memona nde muntu mosi melosa papie to sashe na ntoto, beto fwete lokuta yo mpi kulosa yo na bitunga ya bima ya mvindu. Bampangi, beto kelomba beno na kusala mpenza kikesa sambu kisika ya beto kesadila lukutakanu na beto ti nzyunga na yo kubikala bunkete. Konso muntu yina kele na lukutakanu fwete tadila dyambu ya bunkete na ntima mosi. Kana konso muntu kusala dikabu na yandi, na nsuka ya kilumbu, kisika ya lukutakanu tabikala bunkete. Beto kezola kumonisa bikalulu ya Nzambi yina beto kesambilaka sambu yandi kele santu.—1 Pie. 1:15, 16; Kub. 19:10; Kul. 23:14.
◼ Na Bisika na Beto ya Kulala: (1) Kana bo mepesa beto kisika ya kulala, beto fwete lutisa ve ntalu ya bantu yina munkwa nzo mepesila nswa. (2) Kana nge tazola ve kuvanda na nzo yina bo mepesa nge, beto kelomba nge na kutuba yo kukonda kusukinina. (3) Na ntwala ya kulamba, lomba ntete nswa na munkwa nzo to na bampangi yina kele na mukumba ya kutadila bisika ya kulala na Nzo ya Kimfumu na mpila nde bo baka konso ngidika yina kele mfunu. (4) Kusadila ve na mutindu ya mbi konso ngidika yina bampangi mebaka sambu na banzenza. Beto fwete sadilaka bukatikati. (5) Bunkete kekwendaka kumosi ti kikalulu ya kukangama na Nzambi. Kisika na beno ya kulala fwete vanda ntangu yonso bunkete mpi na ndonga. Dyambu yai ketadila mpi Nzo ya Kimfumu, yina beno lenda sadila bonso kisika ya kulala sambu na bampangi yina kekatukaka na mabundu ya ntama. (6) Monisa mbuma ya mpeve na mutindu na nge ya kuzinga ti bankaka, yo vanda ti munkwa nzo to ti bampangi Bakristu yankaka yina lenda vanda nzo mosi to kisika mosi ti nge.—Gal. 5:22, 23.