Pesa Kikesa na Bayina Mefwilaka Bantu
1. Sambu na nki bayina kefwila bantu ke na mfunu ya kikesa?
1 Kufwisa muntu ya beto kezolaka kevandaka dyambu mosi ya mpasi kibeni, mingimingi sambu na bantu yina kevandaka ve ti kivuvu ya Kimfumu. (1 Tes. 4:13) Mbala mingi, bantu kekudiyulaka nde: ‘Sambu na nki bantu kefwaka? Inki kisika bo kekwendaka? Keti mu tamona dyaka muntu yina mu kezolaka ya mefwaka?’ Mwa bangindu kele awa na nsi yina lenda sadisa beto na kupesa kikesa na bantu ya beto kekutana ti bo na kisalu ya bilanga yina kedila sambu na lufwa ya muntu mosi ya dibuta to ya nduku mosi.—Yez. 61:2.
2. Kana muwi kuzabisa beto nde yandi mekatuka kufwila muntu, keti beto fwete tuba mambu mingi?
2 Na Kisalu ya Nzo na Nzo: Muwi mosi lenda songa beto nde bo mekatuka kufwila muntu na dibuta na bo. Keti yo kemonana nde yandi kedila to kele na mawa? Keti nzo kele ya kufuluka ti bantu ya dibuta ya ke na mpasi? Na mabaku ya mutindu yai, yo lenda vanda mbote na kutuba ve mambu mingi. (Lo. 3:1, 7) Na ntwala ya kukwenda, ziku beto lenda monisa mawa na beto ebuna kubikila yandi trakiti, zulunalu, to kamukanda yina mefwana. Na nima, beto lenda vutuka na ntangu yina mefwana sambu na kupesa yandi dyaka kikesa ya mekatuka na Biblia.
3. Kana mpila kele, inki baverse beto lenda tangila muwi yina mefwila muntu?
3 Na mabaku yankaka, beto lenda bakisa nde beto lenda tuba mambu mingi na mbala ya ntete. Ata yo kele ve ntangu ya kubuya bangindu ya mbi, beto lenda tanga ti bo balusilu ya Biblia yina ketubila lufutumuku. (Yoa. 5:28, 29) To, beto lenda tubila mambu yina Biblia ketuba na yina metala nkadilu ya bafwa. (Lo. 9:5, 10) Kutubila mpi disolo mosi ya Biblia ya metala lufutumuku lenda pesa kikesa. (Yoa. 11:39-44) Dibanza yankaka lenda vanda ya kutadila bangogo ya kivuvu yina Yobi, muntu ya kwikama, kutubilaka Yehowa. (Yobi 14:14, 15) Na ntwala ya kubikisa yandi, beto lenda pesa yandi Inki Kekuminaka Beto Kana Beto Mefwa?, Ntangu Muntu ya Nge Kezolaka Mefwa, to kamukanda yankaka to trakiti yina mefwana. To, beto lenda bikila yandi mukanda Biblia Kelongaka, ebuna kubenda dikebi na yandi na mambu yina kele na kapu ya 6, mpi kudibongisa sambu na kutubila disolo yango ntangu beto tavutukila yandi.
4. Inki mabaku yankaka beto kele na yo sambu na kupesa kikesa?
4 Na Mabaku Yankaka: Kana diskure ya kuzika mvumbi kesalama na Nzo ya Kimfumu, keti bantu yina kele ve Bakristu tavanda pana? Beno lenda basisila bo mikanda yina kepesa kikesa. Bantangu yankaka, bansangu ya mafwa yina bo ketubilaka na bazulunalu mepesaka bampangi yankaka nzila ya kusonika mwa noti mosi ya kepesa kikesa na bantu yina mefwila bantu. Mu mbandu, na nima ya kuzwa mukanda mosi ya kuvandaka ti mwa batrakiti na kati, mufwidi mosi ti mwana na yandi ya nkento kukwendaka na nzo ya nsamuni yina kutindaka yo mpi kuyulaka nde: “Keti beno bantu kutindilaka munu mukanda yai? Mu kezola kuzaba mambu mingi ya metala Biblia!” Mufwidi yango ti mwana na yandi ya nkento kundimaka na kulonguka Biblia, mpi bo yantikaka kukwenda na balukutakanu ya Bukristu.
5. Sambu na nki beto fwete zaba mabaku ya kupesa kikesa na bantu yina mefwila bantu?
5 Longi 7:2 ketuba nde: “Kele mbote na kwenda na kisika mafwa kele, kansi kele mbote ve na kwenda kisika bo ke sala fete.” Mbala mingi, muntu yina mefwila muntu kevandaka ti mabanza ya kuyilama sambu na kuwa Ndinga ya Nzambi, kuluta muntu yina kesala feti. Beto yonso fwete zaba mabaku ya mefwana sambu na kupesa kikesa na bayina mefwila bantu yina bo kezolaka.